Home Hudicial Bida largo den prison exigi pa Jairo Chalgus sospecha di viola, maltrata...

Bida largo den prison exigi pa Jairo Chalgus sospecha di viola, maltrata y mata Sarahi na De Vuyst

2273
0
SHARE
- Advertisement -

ORANJESTAD (AAN): Diabierna den oranan di mainta te den oranan di merdia, den Corte di Husticia a trata e lamentable y hororoso caso di mata e dama Sarahi na De Vuyst riba 3 November 2017.

E sospechoso Jairo A. Chalgut ta para riba cu e no a mata Sarahi mientras cu Hues a confront’e cu a haya  su DNA den e sperma cu a haya riba e victima y tambe riba e tape y saco di plastic cu tabata tapa e victima su cabez.

Aki Jairo Chalgut a admiti di tabatin relacion sexual cu Sarahi un dia promer pero e no a mat’e. Fiscal ta haya Jairo Chalgut culpable y a exigi e castigo maximo di bida largo den prison.

   ACUSACION:

E sospechoso Jairo A. Chalgut a presenta den Corte y den sala di Corte tabata sinta mama di e victima y familiarnan. Fiscal a bisa cu e acusacion contra Jairo Chalgut ta cu riba 3 November 2017, el a viola Sarahi, priva su libertad, maltrata y mata. Hues a bisa e famia y mama cu e caso ta hopi serio y emoocional pero ta importante e caso keda trata y den trankilidad. Si durante tratamento un persona por ta sinti malo of rabia, e por sali un rato.

   SOSPECHOSO TA PARA RIBA INOCENTE:

E sospechoso Jairo Chalgut a presenta cu papelnan den man, cual ta  un declaracion di dje na Papiamento cu e kier a bisa den sala di Corte. Hues a puntra Jairo Chalgut kico e ta pensa di e acusacion. Jairo Chalgut a bisa Hues cu e ta inocente.

Hues a puntra Jairo Chalgut si e lo papia awor den Corte. Jairo Chalgut a bisa cu el a duna Recherche e chens pa detene e culpable pesey e no a papia nada cu Recherche.

   MORTO HOROROSO:

Hues a bisa cu e relato di Recherche ta mustra culpabilidad di Jairo Chalgut.  Dia 3 November 2017, Sarahi a worde mira 7.30’or di mainta ta hiba su yiu creche.  Bisiña a mira un homber cu sombre den cura di Sarahi.

Un bisiña pa 8.30’or di mainta a bati na porta di Sarahi pasobra cortinanan y porta tabata sera. Banda 9.30’or un bisinja a scucha sla duro y kehamento. A manda un mensahe di Whatsapp, pero no tabatin reaccion.

E ruman muher chikito di Sarahi (13) a yega cas y haya Sarahi drumi morto den un camber cu su parti abao sunu. Hues a bisa cu Sarahi su mannan tabata getape y mara. Su cabez tabata getape y tambe su boca. Tabatin un saco getape riba cabez. Su garganta getape y mara cu waya. Banda di dje a haya un cuchiu y mira un hinca na su garganta.

Docter a constata cu Sarahi tabatin slanan fuerte na su cabez. Esey a worde causa door di mokete of scop. Tabatin un hinca na garganta y tambe marcanan di choca. Docter a conclui cu e victima a fayece door di e choca.

Hues a bisa cu a haya sperma riba pia y parti intimo di e victima. Hues a bisa cu DNA ta mustra cu e sperma ta di Jairo Chalgut.

   SOSPECHOSO TABATIN RELACION CU VICTIMA:

Segun Jairo Chalgut un dia promer e tabatin relacion sexual cu Sarahi. El a bisa cu e tabatin relacion cu tur tres muher den e cas. El a bisa Hues cu e tabatin relacion scondi cu e victima, su ruman muher y e mama.

Hues a puntra pakico no a bisa Recherche di esaki. Segun Jairo Chalgut e no a papia pasobra e tabatin miedo cu e relacion di e ruman muher ta sali na cla.

   A HAYA MAS DNA DI E SOSPECHOSO:

Hues a sigui bisa cu bou huña di man robez di e victima Sarahi a haya DNA di Jairo Chalgut.  Segun Jairo Chalgut nan tabatin sex y Sarahi a rasca su lomba. Hues a bisa cu a haya DNA di Jairo Chalgut riba un saco di plastic cu tabata tapa cabez di e victima. Segun Jairo Chalgut e no sa nada di saco di plastic na cabez di e victima.

Hues a sigui mustra cu riba waya y veter cu a haya Sarahi mara, tin DNA di Jairo Chalgut.

E sospechoso a bisa Hues cu esey ta imposibel. Hues a mustra cu a haya DNA di Jairo Chalgut riba un pida tape. Hues a bisa cu ora a lanta victima, a haya un huña di Jairo Chalgut cu sanger. Jairo Chalgut a bisa cu e tabata biba eynan y a corta su hunja ora e tabata traha cu hero.

   VICTIMA TIN PROBLEMA CU SOSPECHOSO:

Hues a sigui bisa cu investigacion ta mustra cu Sarahi tin problema cu Jairo Chalgut.  Na Februari 2017 caba Sarahi a haya problema cu Jairo Chalgut pasobra e ta sospecha Jairo di a horta prendanan di su yiu homber. Jairo Chalgut a admiti e problema pero a bisa cu e no tabata eynan ora esey a sosode.

Segun Jairo Chalgut, hopi biaha cosnan ta disparce na e cas. Segun mama y ruman di Sarahi, desde Februari 2017, Sarahi no tabatin contacto cu Jairo Chalgut.

   SACA MUCHA NA ESTADO:

Segun Jairo Chalgut e ruman muher S. tabata sa esey y tabatin relacion cu Jairo Chalgut tempo S. tabatin 17 aña.  Segun e mucha muher tempo e tabatin 14 aña e tabatin relacion cu Jairo, e mesun tempo cu Jairo Chalgut tabatin relacion cu e mama di S.

E mucha muher S. a bisa cu el a tene esaki secreto. Segun e mucha muher S. na September 2017 a haya sa cu el a sali na estado y Jairo Chalgut a busca pilder pa baha e barica. Despues di 3 siman S. a bira hopi malo y a bay hospital caminda a constata cu e fetus tabata 6 luna den barica y ainda tabata na bida. Lamentablemente e baby a muri.

Sarahi tabata sospecha cu Jairo Chalgut tabata e tata pero S. a keda desmenti. Sarahi a bisa S. cu e no ta di acuerdo cu e relacion cu Jairo Chalgut.

   FISCAL A EXIGI BIDA LARGO:

Fiscal a bisa cu investigacion ta mustra cu entre 7:30’or y 8:30’or di mainta, Jairo Chalgut a drenta e cas na De Vuyst. Bisiña a constata cu e cas di Sarahi tabata completamente sera cual no ta normal. Bisiña a scucha algo pisa cay y gritamento for di cas di Sarahi.

Debi cu un otro bisiña tabatin televisor cu volumen halto sendi, a kere cu lo ta television di bisiña. Esaki mas o menos 9.38 y esey indica cu ainda Sarai tabata na bida. Bisiña a bisa cu 9.48’or a mira door di su bentana den cas di Sarahi y a mira un persona sali for di e cas.

Fiscal a conclui cu pa ora cu Sarahi yega cas back, ya e sospechoso Jairo Chalgut tabata den e cas. Fiscal ta calcula cu pa 9.38’or e victima a worde mata ora cu a scucha desorden. Autopsia a mustra cu e victima a stik y e hinca tabata e ultimo acto cu a sosode.

Tabatin señalnan di violacion sexual cu maltrato pisa.  Autoridad no a haya e envelop conteniendo 1.100 Florin cu Sarahi a haya di su mama pa paga gastonan di cas.

Fiscal a conclui cu e sospechoso a horta e placa. E cuchiu cu a hinca e victima nunca a worde haya.  Jairo a djis bay cu 2 envelop.

Fiscal ta haya e caso hopi serio y cu Jairo Chalgut ta culpable di a viola, maltrata y mata e victima. No acusa di Jairo Chalgut di asesinato pasobra no tin suficiente prueba pa bisa cu tabatin premeditacion. Segun ley penal di Aruba, no tin diferencia den asesinato, mata of violacion cu consecuencia morto. Tur ta worde cualifica mesun serio.

Fiscal a duna un splicacion amplio di cambio riba introduccion di un articulo di ley cu ta haci awor posibel cu por condena un persona na bida largo di prison. El a splica cu Corte Superior ta hopi cauteloso cu esaki y a bisa cu despues di un tempo largo e persona por cambia. Pesey despues di 20 aña lo evalua e persona condena. Si mira cambia lo por reduci e castigo. Sino lo mantene e castigo.

Fiscal ta haya cu pa Jairo Chalgut e chens di ripiti ta grandi. E no a mustra ningun arepentimento pa loke el a haci. E no ta mustra di ta responsabel.  Pesey Ministerio Publico ta kere cu mester proteha comunidad di Jairo Chalgut cu e chens pa ripiti ta grandi. Fiscal ta kere cu mester condena Jairo Chalgut na bida largo di prison.

Por a mira cu e exigencia di Fiscal a dal Jairo Chalgut duro. Den un otro articulo ta publica loke Jairo Chalgut a expresa den Corte.

Hues despues di a scucha abogado mr. Illes y Jairo Chalgut a bisa cu e ta bay studia e caso y dia 28 September 2018, mas tempran cu normal lo por spera e sentencia.

- Advertisement -

DUNA COMENTARIO

Please enter your comment!
Please enter your name here