Home General Brandweer tin suficiente truck pa cubri cualkier eventualidad

Brandweer tin suficiente truck pa cubri cualkier eventualidad

12
0
SHARE
- Advertisement -

Comandante Edward de Cuba:

ORANJESTAD (AAN): Cuerpo di Bombero ta un organo hopi importante den nos comunidad y pa e motibo aki tambe, su ekiponan mester ta den bon mantencion, pa asina nan por sigui opera manera cu mester ta.

Nan ta esun prome yama pa bay combati candela y tambe sa duna Cuerpo Policial un man den varios tipo accidente serio, den caso cu mester corta auto, etc.

Pa esey, nan mester fondo y gradualmente renoba nan flota di truck.

Segun Edward de Cuba, comandante di Cuerpo di Bombero, nan ta constant bezig cu e flota. Nan tin ¾ parti di e dienst, cu ta hopi importante cual ta personal y tambe e ekipo cu e personal ta traha cun’e. Pa parti di ekipo, e flota cu tin awor aki, tin varios di e trucknan cu a pasa hopi aña caba di servicio.

Esey ta pone cu no solamente nan ta hopi uza. No por haya piesa hopi facil mas tampoco. E ta pone cu e situacion tin biaha por bira un tiki fastioso cu un truck ta cay afo y no por trece bek den servicio, pa e por cumpli cu e trabaonan cu ta exigi di dje.

A base di esey a acerca minister algun tempo pasa pa mustr’e kico e plannan ta pa no solamente renoba e flota, pero locual cu tin existente tambe, por bay mas aña di servicio.

Ta compronde cu e situacion financiero di gobierno no ta duna pa haci inversionnan grandi y esey a presenta diferente opcionnan cu por financia un truck of pa plama e adkisicion di trucknan den mas aña, cu asina gobierno ta sinti e peso financiero di biaha y cu ta garantisa tambe e ekiponan cu brandweer tin ta keda añanan largo den servicio y bon cuida tambe.

De Cuba ta agrega cu a haya señalnan positivo pa locual ta e flota cu ta regarda aeropuerto. Pasobra si wak’e bon, esey ta pone cu aeropuerto por keda duna su servicio internacionalmente y por cumpli cu reglanan internacional tambe, pa cual e aviacion por sigui funciona na Aruba.

Esey ta algo hopi positivo, pasobra brandweer por keda duna servicio y Aruba su servicio por keda draai riba un nivel hopi halto cu por cubri esey tambe.

De Cuba a menciona cu tin señalnan positivo den esey. Den combersacion cu minister, ta pensa cu esey ta un parti cu lo por ta cubri den e proximo añanan cu ta bin.

E trucknan cu Cuerpo di bombero tin, no ta nada barata, ta trucknan cu ta traha specialmente pa Aruba (custom made). Un truck so ta costa rond di 1 miyon florin y pa esey, nan mester ta trucknan cu tin cu wanta guera, manera nan ta bisa y cu por bay pa largo.

Comandante Edward de Cuba a splica cu nan tin suficiente truck cu por cubri tur clase di situacion, for di chikito te na grandi. E trucknan tin motornan specialmente traha pa core riba e diesel cu nos tin na Aruba y no na Merca.

Ekiponan cu ta uza na Aruba y no ta uza na Merca. Tin varios cos cu ta specificamente traha. Tin hopi input di e bomberonan mes tambe cu ta traha cu e truck, cu ta bisa cu e ta prefera cierto cosnan riba e truck pa haci e trabao mas facil y eficiente.

Tur eseynan ta wordo traha specialmente pa Brandweer Aruba. E truck, e momento ey, no ta sali barata. Awor aki por bisa cu aeropuerto ta bon cubri. Isla di Aruba ta bon cubri.

E trucknan cu ta den servicio ta funcionando manera cu mester ta y ta purba di premira kico lo por pasa y pa no cay den un buraco aki paar di aña cu tin asina hopi truck for di servicio cu gobierno mester haci un inversion grandi e momento ey.

Kier purba di evita esey, pa asina por logra cu Cuerpo di bombero por duna e servicio y mas tanto posibel alivia e peso financiero riba gobierno.

 

 

- Advertisement -

DUNA COMENTARIO

Please enter your comment!
Please enter your name here