Home General Bubali Plas y ban serio cu turismo!

Bubali Plas y ban serio cu turismo!

169
0
SHARE
- Advertisement -

Situacion economico di Aruba ta exigi

Economia Arubano no ta soporta mas peliger

E problemanan den porta di Aruba a percura pa un instabilidad economico grandi na Aruba.  Turismo for di Venezuela a cay cu mas cu 60 porciento y a afecta e produccion turistico. E proyecto refineria no a bira realidad. E candela na Bubali Plas a ofrece un panorama di horor cu a manda huma scur pa e hotelnan. “Ban serio” ta e plan di accion di autoridad turistico ATA.  “Ban serio” tabata tambe e grito di economia di  Aruba cu mester atrae turistanan for di mercadonan nobo y exigente.

ORANJESTAD (AAN) –Na final di Augustus, DIARIO a presenta un resumen di suceso y a mustra riba e exigencianan di September cu ta hiba e pais na e ultimo trimester di 2018.

Existencia di DIARIO ta intimamente mara na e bienestar di Aruba cu a haya su prome diario imprimi na Aruba pa Aruba. E realidad aki ta impone un responsabilidad grandi pa DIARIO cu den tur trayecto importante pa e pais, a duna guia y a ofrece un plataforma pa comunicacion.

Na 2018 cu a bira e aña cu e pais mester a atende un crisis nacional severo,  DIARIO a presente tur loke e pais mester tene na cuenta.

El a coincidi cu tur advertencia y planificacion di autoridad responsabel.

TURISMO NO POR CU HUMA SCUR 

E siman aki a habri cu vlamnan grandi na Bubali Plas, un pulmon pa e sistema di respiracion di Aruba. E daño ecologico,  e daño haci na naturalesa, ta enorme.

Tras di e potretnan cu a drenta publicidad mientras e dia nobo tabata habri, por a mira hotelnan y un di e partinan turistico importante di Aruba.

Economia di Aruba tabata sclama den e scenario cu ta pone e bienestar turistico na peliger.

Pa e pais por comprende kico a pasa mientras Bubali Plas tabata kima, ta importante pa trece dilanti cu e miho propaganda turistico pa un pais, ta e relatonan cu turistanan ta hiba nan cas ora nan bolbe di vacacion.

E experencia di turistanan cu nan ta comparti cu nan amigonan pa medio di foto y video, ta duna otro personanan den nan circulo e gusto pa bishita Aruba.

E experencia di turistanan tambe ta topico di combersacion cu agentenan di biahe, cu tin un administracion di tur informacion cu nan cliente ta entrega nan.

E imagennan di horor na Bubali Plas ta e pio propaganda cu Aruba por a haya.

MERCADONAN PROMETEDOR TA EXIGI TRANKILIDAD 

Manera DIARIO a mustra cu luho di detaye e aña aki, Aruba mester expande su mercadonan turistico cu urgencia.

Un di e mercadonan cu a crece y cu Aruba a duna hopi atencion ta Argentina cu ta den problema financiero cu cual e Presidente nobo ta lucha na forma tenaz.

E grupo Argentino cu Aruba por atrae na e momentonan aki, ta hustamente e grupo di personanan cu suficiente entrada pa exigi lo maximo di nan estadia. Nan ta representa tambe  grupo cu Aruba kier atrae pa subi su entrada nacional na turismo, cu ta e grupo di turista cu mas placa.

Turistanan cu mas por contribui na economia di un pais, ta sumamente exigente. Na mes momento nan ta un di e factornan cu e pais ta uza pa atrae mas turista na e pais.

Un trahado lo kier bay vakantie na e luga cu su hefe ta bay. Publico kier bishita destinacionnan di figuranan popular.

Si un di nan duna un mal recomendacion, e pais ta den un problema serio.

Ora analisa kico ta importante pa e turistanan cu Aruba kier atrae, trankilidad ta bin dilanti. Nan ta busca paisnan caminda no tin problema cu por afecta nan manera terorismo y situacionnan politico destructivo.

Loke a pasa na Bubali Plas ta cay bou di actonan di teror cu ta aleha turistanan for di un destinacion.

PERIODO DECISIVO PA TURISMO 2018/2019 

Na e momentonan aki Aruba ta pasa den un periodo decisivo pa turismo na 2019, cu mester produci suficiente placa pa economia di Aruba por alimenta e sectornan financiero y social.

E mayoria di trahadonan di Aruba ta depende di loke pasa na e momentonan aki. A pesar di tur esfuerso durante resto di aña, cualkier situacion por stroba bon resultado di turismo.

Na e momentonan aki hopi hende na Europa, na Canada y otro mercadonan importante pa crecemento turistico di Aruba, ta dicidi kico nan lo haci.

Condicionnan di clima ta hunga un papel. Sucesonan y eventonan tambe. Pero e gran mayoria di turistanan cu ainda mester dicidi riba nan vacacion durante dianan di fiesta venidero y e prome lunanan di 2019, conoci como temporada halto di turismo, ta dicidi awor.

Sucesonan negativo manera loke a pasa na  Bubali Plas lo tin impacto negativo pa e producto turistico Aruba.

Autoridad mester realisa un investigacion kico a pasa na Bubali Plas. Si ta intencionalmente a causa e destruccion, mester impone castigo pisa pasobra ta trata di un crimen economico cu ta afecta henter comunidad na forma serio.

Aruba mester bay serio cu turismo, e fuente di entrada di e pais.

- Advertisement -

DUNA COMENTARIO

Please enter your comment!
Please enter your name here