Home Gobierno “Buro Integriteit” ta bira un realidad entrante 1 di October 2018

“Buro Integriteit” ta bira un realidad entrante 1 di October 2018

26
0
SHARE
- Advertisement -

Prome Minister a informa:

ORANJESTAD (AAN) — Den conferencia di prensa di gobierno, Dialuna cu a pasa, Prome Minister sra. mr. Evelyn Wever-Croes a toca e tema di integridad y e institutonan cu lo wordo lanta pa gobierno, pa Aruba conta cu un aparato publico cu ta funciona a base di integridad riba tur nivel.

Prome Minister a expresa cu den e ultimo dianan aki gobierno a traha cu hopi energia, determinacion y dedicacion, pa atende cu e tema di kiebro di integridad na Aruba.

“Nos a ripara ora nos a drenta den gobierno, un aparato gubernamental hopi demotiva y kibra. Tur esaki pa motibo di e corupcion na gran escala cu tabata tin den e gobierno di AVP.

Ambtenaarnan ta weita ministernan ta haci cosnan y nan ta pensa cu nan tambe lo por hacie”, Prome Minister a expresa.

Mirando cu e problema di falta di integridad den e aparato publico ta hopi serio, Gobierno a bin cu dos paso. E prome ta un Despacho di Integridad cu ta bay traha riba aumenta concientizacion riba e tema di integridad, splica pakico esaki ta importante y pa tur funcionario di gobierno tene su mes na regla.

Integridad ta costa placa, e mandatario a enfatiza. El a bisa cu gobierno ta perdiendo hopi placa pa via di integridad.

Pero mas tristo ta cu un empleado publico por tin 20, 25, 30 aña den servicio cu si e ribici placa bao di mesa pa e trabao cu e ta haci, e por perde su trabao y tur e añanan cu el a traha duro pa e por tin su pension despues.

Pesey ta asina importante pa nan para keto y enfatiza pakico ta asina importante pa tin reglanan di integridad.

 

DESPACHO DI INTEGRIDAD:

Minister Presidente a anuncia cu e Despacho di Integridad (Buro Integriteit) lo bira un realidad, entrante dia 1 di October 2018.

“Kiermen dentro di cuater siman nos ta akiden pa nos anuncia cu Buro Integriteit ta bira realidad. Buro Integriteit su tarea principal ta pa aumenta concientizacion den e aparato gubernamental, den gobierno pero tambe den henter nos comunidad. No e ambtenaar so, pero e ciudadano tambe cu ta pensa cu el a entrega su papel di belasting ultimo momento y e kier su placa bek, nami wak ken mi por pasa placa bao di mesa. No! Esey ta e cosnan cu nos no kier pa pasa mas”, Minister Presidente a acentua.

Minister Presidente a agrega cu na mes momento e Buro Integriteit ta bira un “meld punt”. Pues un despacho na unda e ciudadanonan por raporta ora cu nan mira kiebronan di integridad. “Hunto nos tin cu traha pa aumenta integridad den nos aparato gubernamental” Minister Presidente a expresa. Banda di esaki gobierno ta trahando riba formalizacion di e Camara di Integridad. E mandatario a elabora riba esaki tambe.

 

- Advertisement -

DUNA COMENTARIO

Please enter your comment!
Please enter your name here