Home Gobierno Cambionan di ley y reglanan estricto lo rigi un bez cu Camara...

Cambionan di ley y reglanan estricto lo rigi un bez cu Camara di Integridad wordo lanta

62
0
SHARE
- Advertisement -

Minister Presidente sra. Wever-Croes:

ORANJESTAD (AAN) – Parallel na e trabaonan cu gobierno ta realizando pa establece e buro di integridad, tambe ta trahando riba e institucion yama Camara di Integridad, cu ta esun cu ta bay scrutina decisionnan grandi di gobierno.

Pa esaki tin leynan cu mester wordo pasa prome. E mandatario a menciona, por ehemplo, e ley di financiamento di partidonan politico.

Partidonan politico ta bay wordo obliga pa ley, pa publica e lista di kendenan nan ta haya donacionnan grandi, y nan tin cu registra e donacionnan aki. Otro ley, e mandatario a indica, ta esun di Destaho Publico.

E ley cu tin vigente ta laga espacio pa hopi interpretacion, e dignatario a trece dilanti.

Aworaki ta cambiando e ley aki y e lo bira mas cla tocante kico ta e reglanan y mas estricto tambe.

“Un bez cu e Camara di Integridad aki tambe ta cla, e ora ey nos por sigui cu e siguiente pasonan”, e dignatario a menciona.

Otro aspecto den e mesun cuadro aki ta Ombudsman. Esaki ta e ley di Defensor di Pueblo cu ta na Parlamento. “Tin placa p’e den presupuesto caba, Pues nos ta wardando awor riba Parlamento pa pasa e ley”, Prome Minister a reitera.

Minister Presidente a señala cu e reglanan di integridad no ta conta solamente pa empleado publico, Gobierno y departamentonan di gobierno, pero e ta conta tambe pa companianan estatal.

E dignatario a expresa cu ora nan a drenta den gobierno mester a pone orden den desorden, y a bin topa cu e situacion cu tin companianan estatal cu no ta prepara cuenta anual, y gobierno anterior nunca a pone presion riba nan pa traha esaki.

“Pa mi, di e background cu mi ta bin prome cu mi a drenta politica, esey ta algo cu no ta aceptable, y pesey tambe nos ta biniendo cu reglanan di bon gobernacion pa loke ta trata e companianan estatal pa nan tambe cumpli cu e reglanan di integridad y un entidad cu ta bay aconseha gobierno riba e miembronan cu ta wordo apunta den e huntanan”, Prome Minister sra. Wever-Croes a subraya.

Cu esaki, e dignatario a subraya, gobierno ta sigur cu lo bay logra di trece e reglanan di integridad na gobierno.

Den e mesun rosea aki e dignatario a referi na e caso di e ex-minister di Labor cu lo bin den Corte e luna aki mes.

“E luna di September ta e luna cu e caso hopi lamentable y desafortuna di ex-Minister di Labor di AVP lo drenta Corte. E caso penal caminda e ta wordo acusa di soborno, di ricibi placa y un cantidad di cos cu lo yega Corte. Tin cu ta bisa cu el a tarda hopi, tin cu ta pensa cu tur na su tempo, pa mi francamente como ciudadano di Aruba tin berguenza cu nos pais tin cu pasa den algo asina. Pero mesora tin e compromiso su tras, cu e reglanan y leynan aki pa algo asina no pasa nunca mas”, Prome Minister sra. Evelyn Wever-Croes a comenta.

 

 

 

 

- Advertisement -

DUNA COMENTARIO

Please enter your comment!
Please enter your name here