Home Hudicial Caso grandi di 110 kilo di cocaina den Corte

Caso grandi di 110 kilo di cocaina den Corte

145
0
SHARE
- Advertisement -

Un sospechoso ta para riba cu e no tin nada di haci cu e caso

ORANJESTAD (AAN): Tin cuater sospechoso cu a presenta den Corte relacion cu un caso grandi di importacion di 110 kilo di cocaina. Ta trata aki di e hombernan A.C., R.Z., K.W. y G.R. Ta asina cu e caso a bin dilanti pro forma. Asina mes abogado di e sospechoso R.Z., mr. de Hoogd a pidi Hues pa laga scucha tur tres sospechoso como testigo. Esaki pasobra su cliente ta inocente.

E abogado a bisa cu lo por haya video di seguridad caminda lo mira cu ta G.R. ta acerca R.Z. pa fia e ultimo aki su pick-up. Fiscal no tin nada contra y e caso a keda posponi pa dia 30 di November 2018.

IMPORTACION DI 110 KILO DI COCAINA

E acusacion cu Fiscal a presenta den Corte contra e homber A.C., R.Z., K.W. y G.R. ta, complice di importacion di 110 kilo di cocaina riba 19 di Mei 2018.

Fiscal a bisa Hues cu e caso ta pro forma. El a splica cu ainda e procesverbaal no ta cla. Fiscal a propone pa dia 30 November 2018 pa 9‘or di mainta trata e caso.

Ta asina cu e sospechoso A.C. a wordo representa pa mr. Vrolijk y e sospechosonan K.W. y G.R. a wordo representa pa mr. Illes.

SCUCHA SOSPECHOSONAN COMO TESTIGO:

   Mr. de Hoogd a bisa Hues cu e kier scucha e tres sospechosonan A.C., K.W. y G.R. como testigo. Esaki pasobra su cliente R.Z. ta desmenti categoricamente di ta envolvi.

E abogado a bisa Hues cu G.R. a acerca R.Z. pa usa su pick-up pa saca boto for di laman. No ta asina cu ta R.Z. a acerca G.R., manera ta wordo pretendi.

Na opinion di abogado, por check R.Z. su cellular caminda lo mira kende tabata yama kende. Tambe e abogado a mustra cu e por a compronde cu tin camera di seguridad cu ta mustra cu dia 18 Mei 2018, G.R. a bay busca R.Z. anochi na su cas na Ponton pa usa su pick-up. Tambe na altura Bright Bakery na Piedra Plat por mira for camera di seguridad cu ta G.R. riba 19 Mei 2018 ta acerca R.Z.

Fiscal a bisa cu no tin nada contra pa scucha e tres testigonan. Fiscal a propone pa mihor laga Polis scucha e testigonan den presencia di abogado. Esaki pasobra Hues Comisario tin su agenda basta ocupa. Pa loke ta e imagennan di camera di seguridad, Fiscal a bisa cu e no sa di dje pero e lo bay check esakinan. Tambe e yamadanan di cellular lo check.

NENGA LAGA SOSPECHOSO LIBER:

Mr. Vrolijk a pidi pa laga A.C. liber mirando su situacion medico. E ta sufri di hopi dolor di lomba y malo di stoma. E tabata haya remedi pero no ta yuda. Ademas e tabata usa remedi di Colombia pero no por usa esakinan den KIA pasobra e no ta prescribi pa un docter di Aruba.

Na opinion di e abogado, na KIA no ta e lugar adecuado pa A.C. keda.

Fiscal a bisa cu Corte a nenga di laga A.C. liber den e apelacion contra prolongacion di detencion. El a remarca cu abogado mr. Vrolijk no a presenta documentonan cu ta demostra realmente e situacion di salud di A.C. El a pidi Hues pa rechaza e peticion y si despues manda e documentonan lo por tene cuenta cu esaki.

Hues a bisa cu e peticion di mr. Vrolijk ta wordo rechaza. E no ta haya cu e situacion lo ta menasante pa A.C. Hues a bisa cu e no ta kere cu den KIA no por atende A.C.

   CASO POSPONI:

Hues a bay di acuerdo cu peticion di mr. de Hoogd pa scucha e testigonan, check yamadanan riba cellular. Hues a bisa cu si e imagennan riba camera ta existi ainda, nan lo wordo mira. Hues a pospone e caso pa dia 30 November 2018 pa 9’or di mainta.

 

- Advertisement -

DUNA COMENTARIO

Please enter your comment!
Please enter your name here