Home Comercio CEDE Aruba y KvK a organiza charla tocante Responsabilidad Social Corporativo

CEDE Aruba y KvK a organiza charla tocante Responsabilidad Social Corporativo

7
0
SHARE
- Advertisement -

ORANJESTAD  (AAN): Den cuadro di e proyecto ARUBA DOET, CEDE Aruba hunto cu Camara di Comercio a organisa un charla informativo y interactivo unda cu diferente orador a elabora riba Responsabilidad Social Corporativo y proyectonan riba tereno social.

ARUBA DOET ta e accion boluntario mas grandi na Aruba organisa pa CEDE Aruba den cooperacion cu Oranje Fonds. E siguiente edicion di ARUBA DOET lo tuma lugar Diabierna 15 y Diasabra 16 di Maart 2019. Un di e metanan principal di e edicion aki ta pa haya mas participacion y sosten di sector priva. Pa es motibo CEDE Aruba hunto cu Camara di Comercio a organisa diaranson ultimo un charla interesante y inspirativo dirigi na sector priva.

E charla a ranca sali cu palabranan di bon bini di representante di Camara di Comercio Sue-Ellen de Freitas y Director di CEDE Aruba, Daniel Tecklenborg. Daniel Tecklenborg a elabora un poco mas riba CEDE Aruba y iniciativanan riba tereno social cu CEDE Aruba ta sostene. E team di ARUBA DOET a duna informacion tocante e proyecto y a pone enfasis riba e importancia di e sosten di sector priva pa cu e proyecto di ARUBA DOET y den ki manera un compania por aporta.

Dave Martinus a duna un splicacion amplio di kico precies Responsabilidad Social Corporativo ta insera. Den ki forma un compania por haci esaki, kico ta e importancia y e impacto den comunidad. En corto Responsabilidad Social Corporativo ta un strategia etico cu un compania ta implementa pa aumenta ganashi y confiansa di accionistanan pa un termino largo. Esaki atraves di un imagen positivo den comunidad y normanan etico halto pa reduci riesgonan y tuma responsabilidad pa accionnan di e compania. Tambe crea un impacto positivo riba medio ambiente y accionistanan manera consumidornan, empleadonan, proveedor y comunidad.

Naline Heilbron di Ha’Bon Aruba a comparti cu esnan presente con e ta aplica Responsabilidad Social Corporativo den su compania. Cu por sierto pa dos aña caba ta trahando cu un grupo di persona cu limitacion cu ta forma parti di e team cu ta bin cu idea y crea e productonan cu nan ta ofrece. Sigur un storia emotivo y inspirante tras di e productonan di Ha’Bon Aruba.

Madel Jacopucci di Guardian Group a comparti experencia di Guardian Group cu e proyecto ARUBA DOET. Kico ta e beneficio di participa cu un proyecto asina, kico ta e impacto cu e ta crea den e compania y riba su empleadonan. Tambe e impacto cu e participacion aki ta crea den e organisacion social (Ngo), su grupo meta y den comunidad.

CEDE Aruba ta gradici Camara di Comercio y tur orador pa nan sosten pa cu e charla aki.

- Advertisement -

DUNA COMENTARIO

Please enter your comment!
Please enter your name here