Home General Como 20 di cada 30 studiante na Universidad di Aruba ta femenino

Como 20 di cada 30 studiante na Universidad di Aruba ta femenino

98
0
SHARE
- Advertisement -

ORANJESTAD (AAN): Diabierna anochi a tuma lugar e apertura di Aña Academico 2018-2019 di Universidad di Aruba.

Un cantidad di invitado special, gobernante, ex-studiante, y personanan importante di Mundo Legal na Aruba, tabata presente den aula di e Universidad.

Semper ta riba e di dos Diabierna di September, nan ta tene e apertura di e Aña Academico.  Y e biaha aki na 2018, e tabatin un nificacion special.  Esey ta debi na e hecho cu Universidad ta celebra su di 30 aña di existencia.

Rector Glenn Thodé di Universidad, a splica cu ademas di e hecho cu 30 aña pasa a habri su portaan, e ta marca tambe cu ta exactamente 25 aña pasa cu Facultad FEF (Financiero y Economia) a cuminza eynan.

Semper na e apertura di Aña Academico, e tradicion ta cu nan ta busca academico of cientifico cu ta bin duna charla, cual discurso ta riguroso, tecnico, pa reta pensamento di publico.

Pero e biaha aki, Universidad di Aruba a haci esaki celebrativo, y a escoge e tema di “Florece”.  Asina a pidi e prome persona cu a gradua na Facultad di Ley, esta Abogado David Kock, y tambe a pidi e prome cu a gradua na Facultad FEF, Rossini Anthony.

E dos personanan aki a duna storia, pa mustra con Universidad di Aruba a yuda nan florece como persona, pero tambe den nan trabao y yudando comunidad na florece.

Pues e fruta cu a wordo planta na Universidad, ta sigui plama y duna beneficionan di educacion superior den comunidad via di e personanan aki.

Rector Thodé a indica cu e mes a goza di e anochi, y e prome reaccion cu el a tende di e anochi tabata positivo.

Na final, Glenn Thodé a ofrece publico algun informacion interesante di e comunidad academico na Universidad di Aruba.

Aki el a revela, cu e ultimo añanan, por mira cu 2/3 parti di e studiantenan ta femenino, y ta solamente 1/3 parti ta masculino.  Esaki tambe ta hala atencion.  Pues di cada 30 studiante, bo ta mira cu 20 di nan ta femenino.

Rector Thode a papia di e futuro di Universidad, mustrando cu ta consolidando e forza cu nan tin actual, pero ta continua cu desaroyo nobo y trece disciplinanan tecnologico pa Aruba, cu yudanza di Katholieke Universiteit Leuven, cu ta un Universidad masha inovativo aworaki procedente di Belgica.

 

- Advertisement -

DUNA COMENTARIO

Please enter your comment!
Please enter your name here