Home Policial Cuatro anciano perdi pa casi 19 ora ya ta sano y salvo

Cuatro anciano perdi pa casi 19 ora ya ta sano y salvo

1300
0
SHARE
— Yudando un di e anciananan yegando na Warda di Santa Cruz.
- Advertisement -

ORANJESTAD (AAN): Diabierna mainta e informacion a circula cu desde Diahuebs atardi alrededor di 3:00 pm, e driver di Cas di Anciano “Fundacion Paraiso” a sali cu su minivan Dodge Caravan color blanco cu number A-12239 cu cuatro cliente di nan.  El a bay riba nan trip regular, di keiro rond conoce Aruba.

—Yegada na Warda di Santa Cruz.

Pero desde e momento ey, nan no a tende nada mas di nan.  Atardi y anochi a yega, y e Minivan no a regresa.  Normal e ta regresa entre 6:30 pa 7:00 pm.  Asina a bati alarma na Polis, y na prome instante autoridad semper ta keda warda algun ora prome pa check si nan ta regresa tog.  Pero ora cu Diabierna mainta a habri y nada ainda di e vehiculo, e ora Autoridad a cuminza circula e informacion.  Esta cu tin un minivan perdi cu 5 hende aden.

Fundacion Paraiso ta regla pa nos grandinan bay bishita diferente caminda na Aruba como un actividad. E biaha aki esaki a bay totalmente robez, y pa mas di 18 ora no sa nada di e driver Lester Maduro, ni e cuatro miembronan.

Nan a purba di yama e celular di e driver, pero e yamada no ta pasa y ta bisa cu e celular ta turned-off.

— Dunando un man na un cliente.

Diabierna mainta diferente emisora di radio, y medio di comunicacion a cuminza plama e informe pa pidi ciudadanonan yuda busca e cuatro personanan di edad, y nan chauffeur.

E prome informe ta mustra cu e ancianonan perdi ta Maria Boekhoudt, Candelaria Maduro, Sigfried Albertus, y Theresita Geerman.

Net e momento ey cu a cuminza plama e relato di e caso serio, diripiente pa 9:50 am, Central di Polis a haya informacion di Patruya di Polis di San Nicolas, cu nan a caba di haya tip cu e personanan perdi a wordo descubri door di turistanan.

A resulta cu ta dos turista a mira e Minivan Dodge Caravan cu e personanan aden.  Nan a informa nan Tourguide Kenneth di e compania local ABC Tours di loke nan a mira.  Asina a logra topa cu Polis y duna nan informacion cu nan a topa cu e Minivan, a hasta duna nan awa, y awor a yuda guia Polis bek pa e lugar.  Un otro Tourguide, Brandon, a interumpi su Tour cu Turistanan, pa asina usa su vehiculo grandi pa transporta e ancianonan for di e area.

— Yudando e personanan na Warda.

E Minivan tabata den e area di Blackstone Beach, mas pariba di Andicuri na costa panort di e isla.

Inmediatamente a pone tur autoridad na altura. Personal di Parke Arikok tambe a drenta den accion, y a sa di duna un man pa tanto Ambulans, Polis y Cruz Cora Aruba por a yega na e lugar pa asisti e personanan perdi.

E personanan a wordo hiba Warda di Polis Santa Cruz na Macuarima, na unda personal di Ambulance a hasi un chekeo medico cu nan. DIARIO a compronde cu nan tur ta den bon estado di salud.

Vocero di Polis a indica na DIARIO, cu e chauffeur probablemente “su wowo a bruha”.

— Momento di e yegada.

Cuerpo Policial Aruba ta manda danki un biaha mas na tur hende cu a sa di duna un man.

- Advertisement -

DUNA COMENTARIO

Please enter your comment!
Please enter your name here