Home General Departamento di Labor ainda tin cu tuma decision si ta duna permiso...

Departamento di Labor ainda tin cu tuma decision si ta duna permiso pa retira e trahadonan di Tony Roma’s

18
0
SHARE
- Advertisement -

ORANJESTAD(AAN): E situacion di Tony Roma’s ta uno sigur cu tin e trahadonan preocupa. Abogado Hose Figaroa, ta representa algun di e trahadonan, mas of menos 15 di nan y e ta splica cu e situacion ta cu tecnicamente tur ta den servicio di e restaurant. Algun tempo pasa, na cuminsamento di Augustus nan a wordo informa cu pa fin di Augustus e restaurant lo cera su portanan y cu a base di esey nan relacion di trabao lo caba.

Nan a acerca Figaroa y manera cu e ta hinca legalmente den otro, no ta e hecho cu un compania no ta stop cu su operacion automaticamente, kiermen cu un trahado ta perde su trabao. Tin un proceso cu tin cu cana den tipo di casonan asina. Sea bo ta bay via departamento di labor y bo ta pidi un permiso pa retira tur hende, of ta bay via corte y ta pidi hues e ora pa disolve e relacion di trabao.

Te cu algun tempo despues nada no a wordo haci. Tabata tin un reunion den cual a combersa cu departamento di labor, unda cu te na e momento ey a confirma cu no tabata tin un peticion cu a drenta ainda. Despues mas of menos mita di luna a drenta un peticion na Departamento di labor, cual peticion ta canando ainda.

 

OBLIGACION

Departamento di labor no a tuma un decision ainda si acaso ta duna un permiso pa retira e trahadonan si of no. Pero di tur forma compania a dicidi cu ta stop cu operacion entrante 31 di Augustus. Esey a sosode. Pero, esey no ta kita e obligacion cu salarionan tin cu wordo paga te na momento cu Departamento di labor tuma un decision si ta duna permiso pa retira e trahadonan si of no.

 

CESANTIA

Un forma pa termina un relacion di trabao, ta si ofrece un pakete na e trahado y esaki acepta, tumando e pakete ey, ta termina e relacion di trabao. Den e caso aki a ofrece e trahadonan un suma cu e compania ta bisa cu ta igual na cesantia.

Abogado Figaroa a compronde cu den hopi di nan esey no ta cuadra cu e calculacion cu departamento di labor a duna nan. Pero banda di esey, compania no ta ofrece nada. Como trahado, un pakete asina cu ta puramente di cesantia, no ta cumbini den e sentido cu si bay na departamento di labor, y warda e proceso cana y departamento di labor duna un permiso pa retira e trahado, na e momento ey e dunado di trabao tin cu duna un termino di preaviso cu den algun di e casonan, dependiendo di e cantidad di aña di servicio, por yega te 4 luna y despues di esey, riba dje, tin cu paga cesantia.

 

CESANTIA/PAKETE

Pa bay acepta solamente un suma di cesantia como un pakete, esey no tin ningun tipo di logica su tras. Pesey tambe e trahadonan, den gran mayoria a bisa cu nan no ta di acuerdo cu esaki, mirando cu e no ta make ningun tipo di sense pa bay tuma algo cu ta menos di loke legalmente e dunado di trabao ta obliga na paga, si acaso e logra haya un permiso pa termina e relacion di trabao.

Awor aki, tin un proceso ta cana ainda oficialmente na departamento di labor. Na e momentonan aki e hendenan no ta trahando. Legalmente nan ta riba non-actief. E pregunta ta, kico ta bay pasa na momento cu nan tin cu cobra e proximo biaha, cual ta e fin di luna aki. Si na e momento ey, e salario no wordo paga, un proceso lo mester cuminsa pa haya e salario aki paga.

Tambe ta bezig na Departamento di labor. Segun Figaroa, a cuminsa un proceso pa haya permiso pa retira, aunke cu a cuminsa cu e proceso aki laat.

 

DOS LUNA ADELANTA

Segun ley, na momento cu bo ta bay stop operacion of na momento cu bo ta bay kita tur bo trahadonan, ley ta prescribi cu dos luna adelanta bo tin cu entrega un peticion cu un afvloeingsregeling na Departamento di labor, cual nan no a haci. Oficialmente tin un proceso canando na Departamento di labor cu ainda falta basta prome cu tin un decision den dje. Tin diferente proceso legal canando na e momentonan aki. Tambe tin e pregunta ainda den aire, kico ta bay pasa cu e empresa mes.

Na e momento aki ta bisa cu ta stop di opera Tony Roma’s, pero tin rumor cu e mesun edificio ey lo wordo tuma over door di un otro cadena di Restaurant cu lo sigui su operacion. Si esey ta e caso, a base di ley manera cu el a cambia algun aña pasa, e trahadonan aki automaticamente lo pasa den servicio pa e compania cu ta bin na luga di e operator cu tin awor aki. Esey tambe ta un pregunta cu no a wordo contesta te na e momentonan aki.

Den prensa, na cierto momento a circula cierto nomber di restaurantnan cu lo tuma over e operacionnan.

Oficialmente no tin un reaccion of un punto di salida ainda di parti di e operadornan pa esey. Si acaso esey ta bay sosode, e ora ey no tin en principio pa termina ningun relacion di trabao, pasobra lo tin trabao pa tur hende bao di un otro operator.

 

 

- Advertisement -

DUNA COMENTARIO

Please enter your comment!
Please enter your name here