ORANJESTAD (AAN): Luna pasa a sigui cu tratamento di e caso penal contra e muher R.F. acusa di ta complice di e matamento di su dos yiunan Rishandroh y Eugene Anastacia.
Luna pasa tabatin un discusion entre abogado mr. van der Biezen y Fiscal riba e rapport di un psychiater. A nombra un psychiater di Curacao pa e haci un evaluacion apart di e dos expertonan. Awe ta dia cu Hues ta dicta sentencia.
Den Corte Hues a bisa cu e ta interpreta e raport di psychiater cu R.F. no ta responsabel pa su actonan.
E punto di discusion ta, si R.F. por a scapa su yiunan di a worde mata.
DISCUSION FISCAL Y ABOGADO:
Fiscal a remarca cu e ta interpreta e decision di psychiater otro. Na opinion di Fiscal e si ta haya cu R.F. ta complice di matamento di e muchanan.
Abogado mr. van der Biezen a reacciona riba Fiscal mustrando cu mester respeta decision di un experto y e raport ta bisa bon cla cu R.F, mirando su estado mental e no por a actua pa scapa su yiunan.
Fiscal a keda mantene su exigencia di 4 aña di prison, mientras cu abogado mr. van der Biezen ta haya cu no por bay condena R.F. mirando cu e no ta responsabel pa su actonan.
Hues a bisa cu e ta bay studia e caso y Diabierna 14 September 2018 tin sentencia. DIARIO lo informa lectornan di e decision interesante aki.
