Home Editorial Editorial:  Compra “online”: e fantasma destructor di Aruba

Editorial:  Compra “online”: e fantasma destructor di Aruba

135
0
SHARE
- Advertisement -

Economia na un pais democratico ta depende di mundo comercial pa su entrada. Ta comercio ta genera empleo cu ta base di entrada personal den tur ramo.  Tur entrada di e pais tambe practicamente  ta depende di e sector cu directamente of indirectamente ta aporta na belasting necesario pa funcionamento di e pais.

Comercio cu ta sector priva, ta e alma financiero di un pais liber y mester di tur proteccion pa e pais por sobrevivi y sigui desaroya.

Cu entrada di e mundo digital,  porta a ser habri pa companianan fantasma cu ta destrui comercio, economia y finalmente bienestar di un comunidad.

Compra online ta basa riba casnan comercial cu no ta presente fisicamente ni legalmente.  No por mira nan riba caya. Nan no ta paga huur. Nan no tin edificio. Nan no tin empleado ni gasto. Nan no tin ningun responsabilidad of obligacion na e pais ni pueblo.

Nan tin tur e beneficionan cu nan ta kita for di comerciantenan local. Nan ta kibra e circulacion local di placa. Nan mercancia, paketa den depositonan invisibel y cu un minimo na gasto, ta competi contra negoshinan cu mester alimenta un pais.

Nan ta kibra e circulo cu ta exigi pa companianan local paga e trahado local, cu mester gasta su placa na establecimentonan local pa asina economia conoce un desaroyo sano. Si e salarionan local no ta base pa e circulacion di placa den comercio local, e poder di compra na Aruba no ta sostene e pais pero fantasmanan desconoci.

E resultado ta bisto den e realidad actual di Aruba. E sumanan cu tin pa inversion continuo, a baha drasticamente. Na e momento aki hopi negoshi Arubano ta lansa un grito di auxilio.

Tin empresa cu ya no por paga huur di nan edificio y nan existencia ta na peliger dor di compra online dor di trahadonan cu ta keda sin trabou si negoshi cera.

E empresanan local mester cumpli cu tur leynan social na bienestar di trahadonan y di e pais. Pero no tin proteccion pa e companianan aki cu ta aporta na tur ramo di comunidad. Empresanan local ta sponsor eventonan local y proyectonan pa un comunidad desconoci pa e negoshi online cu no tin ningun laso cu e pais cu ta nan destrui finalmente. Pasobra sin comercio local, no tin economia.

Dia 22 di juni 2018, Corte Supremo di Merca a dicidi cu estadonan por introduci Sales Tax riba compra haci na estadonan caminda e compania online no tin tienda, oficina ni deposito. Di e forma aki a actua contra companianan fantasma sin ningun obligacion of responsabilidad, cu ta destrui bienestar di companianan registra oficialmente.

Compra online ta na discusion rond mundo y mester bira parti di un maneho dirigi na Aruba tambe.

E prome paso mester ta cu publico ta bira consciente di e daño cu nan ta haci na comercio y nan mes.  Hopi cliente di comercio online ta perde placa na articulonan cu nan ta cumpra sin mira.

Mester informa Aruba debidamente cu cada compra online ta afecta e placa disponibel pa salario, huur, beneficionan secundario di trahado, belasting, entre otro.

Instancianan comercial mester uni forsa pa kibra e atraccion importa y introduci sistemanan moderno pa atrae e generacion mas hoben. Mester duna asistencia pa casnan comercial na Aruba por uza medionan social y sistema computerisa pa alcansa clientela.

Instancianan gubernamental mester implementa ley cu ta frena compra online di fabricanan y depositonan pero tambe di negoshi clandestino cu ta importa producto na forma ilegal y bende nan riba internet.

Mester haci un inventario di e problemanan causa pa compra online pa hunto yega na un solucion pa e fantasma invisibel cu ta destrui fundeshi economico di Aruba.

- Advertisement -

DUNA COMENTARIO

Please enter your comment!
Please enter your name here