Home Editorial Editorial: Cuido medico ta decisivo pa felicidad di comunidad

Editorial: Cuido medico ta decisivo pa felicidad di comunidad

49
0
SHARE
- Advertisement -

Felicidad di un ciudadano ta depende di un cantidad di factor personal. Tin un punto cu tur hende ta comparti cu ta e anhelo pa un estado optimal di salud.

Den e Orden di Ley cu ta regla y defende e bienestar basico di ciudadanonan, cuido medico ta ocupa un luga masha importante. Basa riba e derechonan di e ser humano den un comunidad democratico, e ciudadano mester por gosa di bon cuido medico como instrumento di felicidad di hende.

For di e prome instante cu un persona sinti cu e tin un problema di salud, e mester por conta cu asistencia pa por detecta cualkier condicion medico y busca recuperacion te caminda esey ta posibel.

Cuido medico no ta encera un cantidad di ley riba papel pero mester ta un realidad pa cualkier ciudadano na cualkier momento. No por tin obstaculo pa un ciudadano haci uzo di tur facilidad medico ora e sinti cu su salud, su bienestar, ta na peliger.

Den cuido medico mester tin comprension pa e ansha di un hende cu tin un problema di salud y kier haci tur loke ta posibel pa e haya asistencia medico.

Si analisa expertonan cu tin ehecucion di cuido medico den nan man, por conclui cu Aruba por lo general tin bon dokter di cas y bon specialista. Den un comunidad chikito cu mester ahusta e cantidad di experto na e demanda, e calidad profesional ta resalta. Por tuma e Urologo Dr. Randall Leong como ehempel pa loke publico ta spera. E exigencia di calidad ta, conocemento profesional y e acercamento humano di e pashent cu na un pais chikito ta limita ora e mester scoge.

E porta di cuido medico mester ta habri pa un persona cu tin un problema di salud. Den e epoca moderno, publico ta ricibi hopi informacion riba e peliger di no atende un enfermedad na tempo. Mundialmente e ansha pa por atende un preocupacion cu un specialista, a bira mas grandi.

Investigacionnan ta ser haci riba e tempo di espera di un pashent cu kier bishita un specialista. Na Hulanda, instancianan encarga cu cuido medico a investiga e motibo tras di e tempo di espera pa un cita cu specialista. Diferente factor obvio a bin dilanti manera e temporadanan cu mas uzo ta ser haci di un specialismo y e cantidad di profesional cu tin pa un specialismo compara cu e cantidad di pashent.

Pa Aruba un investigacion sigur ta un opcion pa por evita cu e tempo di espera pa atende cu un specialista por tarda mas cu un luna, cu ta e limite cu generalmente ta mantene. Pa casonan di posibel enfermedad serio, mester yega na palabracion concreto pa e pashent por haya un cita denter di algun dia manera na hopi pais awor ta e caso.

Bista mester ta dirigi tambe riba situacionnan cu e realidad di e pais ta crea. Na Aruba, tempo largo di espera ta pone cu ciudadanonan ta uza nan placa pa bay exterior y consulta cu specialista. Problemanan cu por bira resultado di e consultanan den exterior, ta conoci. E laso interumpi cu specialista na Aruba no ta recomendabel. Sinembargo, e tempo largo di espera awor cu AZV no ta permiti specialista tene consulta priva paga, ta haci cu ciudadanonan ta bishita specialistanan pafo di Aruba. Mester haci un sondeo pa yega na solucion.

Tempo moderno cu avance continuo ta exigi pa periodicamente investiga loke ta biba cerca pashentnan y introduci solucion pa problemanan.

E hecho cu Gobierno a haci posibel pa profesionalnan cu a studia den e region y a obtene nan diploma na un universidad acredita por practica na Aruba, ta yuda den e elevacion di cuido medico.

Un bon salud ta indiscutiblemente e base di felicidad humano, cu ta central den constitucion di un pais democratico. Den un tempo di crisis financiero e reto di calidad ta bira mas grandi. Bon planificacion y bon uzo di personal den tur rango y disciplina medico mester permiti progreso.

 

 

 

 

 

 

- Advertisement -

DUNA COMENTARIO

Please enter your comment!
Please enter your name here