Home Enseñanza Enseñanza bilingual ta birando un trend y ta dunando resultadonan hopi exitoso

Enseñanza bilingual ta birando un trend y ta dunando resultadonan hopi exitoso

40
0
SHARE
- Advertisement -

Parlamentario Sue-Ann Ras ta parti di conferencia riba enseñanza bilingual na Corsow:

ORANJESTAD (AAN):  Den entrevista cu DIARIO, Parlamentario Sue-Ann Ras a duna di conoce cu e siman aki na Universidad di Corsow lo tuma lugar un conferencia hopi importante relaciona cu educacion bilingual: “Start Up Conference on Mother Tongue Based Bilingual Secondary Education- A Caribbean Experience for Opportunity and Hope”.

El a indica cu e conferencia aki lo wordo duna door di un orado mundialmente conoci, esta Jim Cummins.

E parlamentario ta haya cu esaki ta un conferencia hopi importante pa asina Aruba por bay mas leu den loke ta enseñanza bi-multilingual. Varios profesional di Aruba, trahando den e veld di enseñanza y lenguahe, como tambe Minister di Enseñanza, lo asisti na e conferencia aki e dianan diamars y diaranzon proximo na Corsow, Ras a duna di conoce.

“E ta un paso hopi grandi pa Corsow aworaki. Nan ta full prepara y nan tin un sosten grandi di nan minister”, a agrega.

Tin un programa bon hinca den otro durante dos dia y un panel di experto cu lo elabora riba e importancia di e lenga materno den e sistema di enseñanza di un pais.

Na Corsow a afilia na un sistema multilingual universal humanista y kier pa Aruba tambe hacie mirando cu Aruba ta un isla tambe multi-cultural, Sue-Ann Ras a splica.

Esaki lo ta un stap hopi grandi mirando cu enseñanza bilingual aki ta un exito. Na paisnan manera Costa Rica, Bolivia, Chile, enseñanza bilingual ta birando un trend y ta dunando resultadonan hopi exitoso, a remarca.

Pesey mes Aruba tambe mester cuminza wak den e direccion ey. Aworaki tin dos scol multilingual, pero mester sigui traha riba e “next level” cu ta scol secundario. Na Corsow ta haci esey aworaki.

“Ta hopi interesante pa sa con na nivel internacional ta andando cu esaki y Jim Cummins ta un hende cu a dedica completamente na esey y splicacionnan cientifico comproba y un experiencianan cu diferente pais a haci pa loke ta idioma. Tur ta scoge nan idioma materno, cu mayoria di biaha ta Spaño, den e caso di Latinoamerica, of ingles”, a bisa.

E idioma materno ta keda e base, e fundeshi pa bo por sali for di eynan. Aruba no tin esey ainda, tin hende cu no kier wak esey y pa e parlamentario e aspecto aki ta hopi preocupante. Hopi biaha ta keda wak den pasado y ora di wak e resultadonan ta un porcentahe chikito cu a logra. Esey refiriendo na e sistema di enseñanza den idioma hulandes aki na Aruba.

“Mi no kier pa esey ta asina, mi kier lo contrario cu ta duna papiamento balor. Hopi hende ta bisa cu nan ta domina 4 idioma pero esey no ta berdad. Nos ta defende nos mes den cuatro idioma. Pasobra ora cu nos bay riba nivel universitario, un nivel academico, nos no ta compronde hopi biaha ni ingles, ni hulandes, ni spaño, ni papiamento”, a subraya.

E parlamentario ta di opinion cu e idioma diario nos ta domin’e, pero e idioma academico, riba ningun di e cuatro idiomanan.

For di e 200 mucha cu ta bay Hulanda cada aña, a bisa, cuanto di e muchanan ey tin problema cu e idioma hulandes? Hopi di e hobennan aki ta bay Hulanda pero hopi ta scoge pa bay den e sistema na ingles. “E propio macambanan ta scogiendo pa bay den enseñanza na ingles”, a enfatiza.

Sue-Ras a indica cu e problema aki ta wordo refleha den mundo profesional caba, ora di firma contract, ora di haya un procesverbal, den corte, hende ta firma den un idioma cu nan mes no conoce. Nan ta trahe robez, pero un abogado studia si ta wak e diferencia y ta bira full e caso y ata e persona ta sali liber. Esey ta e problemanan cu nos ta haya, pasobra e cosnan aki ta un nivel di hulandes cu mayoria di e poblacion no ta compronde.

“Defende bo mes den cuatro idioma ta bunita, pero domina cuatro idioma otro”, Ras a bisa finalmente.

- Advertisement -

DUNA COMENTARIO

Please enter your comment!
Please enter your name here