Home Cultura Escritora Rosabelle Illes lo ta parti di Festival di Poesia na Taiwan

Escritora Rosabelle Illes lo ta parti di Festival di Poesia na Taiwan

30
0
SHARE
- Advertisement -

ORANJESTAD (AAN) — Algun luna atras, e escritora arubiano Rosabelle Illes a ricibi un invitacion pa participa na e Formosa International Poetry Festival cu lo tuma luga entre september 21 pa 27 proximo.

E festival ta wordo organisa pa Tamsui Culture Foundation den colaboracion cu Movimiento Poetas del Mundo. Den un video recien publica riba Illes su pagina di Facebook, e escritora ta elabora riba e trayectoria cu a conduci na e invitacion aki.

Na 2016, Illes a participa na e Feria Internacional del libro de Bogotá. Aki el a conoce un escritor, Robert Max Steenkist, cu a selecta Illes como un di 123 poeta rond mundo pa participa na un antologia internacional titula Oír ese Río.

Tur poeta a ricibi e tarea di skirbi un poema riba e tema “riu.” Mirando cu na Aruba no tin riu, Illes a contempla riba maneranan cu e lo por conecta cu e tema. Asina el a wak un imagen di un vena y a dicidi di titula su poema “Vena” y dedic’e na e riu den nos curpa.

Despues cu e antologia Oír ese Río a wordo publica aña pasa na Colombia como tambe na Argentina, Illes a ricibi un e-mail di un poeta renombra di Taiwan, señor Lee Kuei-shien. Señor Kuei-shien, cu tambe tawata un di e 123 poetanan cu a participa na e antologia Oír ese Río, a invita Illes, como 1 di 15 poetanan internacional pa participa na e Formosa International Poetry Festival na Taiwan.

Cu hopi orguyo y honor mi lo ta bayendo Taiwan pa siña di nan literatura, pa conoce mas poeta y sigui participa den e intercambionan aki cu ta solamente haci mi mas curioso pa cu arte y ta yuda mi den mi propio desaroyo. Ta prome biaha cu mi lo ta bishitando un pais den e continente Asiatico pues mi ta hopi ansioso.” Illes a expresa.

Rosabelle ta autor di dos buki di poesia y su tercer publicacion TITLE (2016) ta inclui poesia, storianan cortico y pensamentonan. E aña aki e lo ta introduciendo su di cuater buki cu ta un storia multilingual pa mucha cu el a skirbi hunto cu musico di Curaçao Levi Silvanie. Pa mas informacion tocante Rosabelle y su trabou por bishita www.rosabelleilles.com

 

- Advertisement -

DUNA COMENTARIO

Please enter your comment!
Please enter your name here