Home Salud Estudio global a confirma cu ningun alcohol ta safe pa bebe

Estudio global a confirma cu ningun alcohol ta safe pa bebe

98
0
SHARE
- Advertisement -

ORANJESTAD (AAN): Un noticia cu e siman aki a impacta hopi na Europa, a converti su mes den mal noticia pa esnan cu ta goza loke nan ta kere ta un glas saludable di biña pa dia.

Un estudio global amplio cu a caba di wordo publica den e revista lancet, a confirma investigacionnan anterior, cu a mustra cu no ta existi ningun nivel safe di consumo di alcohol.

E investigadornan ta admiti, cu bebemento modera por proteha contra malesa di curazon, pero a descubri cu e riesgo di cancer y otro malesanan ta supera e proteccionnan ey.

Un di e autornan di e estudio, a bisa cu e descubrimentonan ta esnan mas significante te cu awor, debi na e variedad di factornan cu a wordo considera.

CON RIESGOSO TA BEBEMENTO MODERA:

E estudio yama “Global Burden of Disease” a analiza nivelnan di uso di alcohol y su efectonan di salud den 195 pais entre 1990 y 2016.

Analizando data di hende di 15 te cu 95 aña di edad, e investigadornan a compara hendenan cu no ta bebe mes, cu esnan cu ta dal un bebida alcoholico pa dia.

Nan a haya cu di 100.000 no-bebedor, como 914 lo sufri un problema di salud relaciona cu alcohol manera cancer of sufri un herida.

Pero un extra cuatro persona lo wordo afecta si nan dal un bebida alcoholico pa dia.

Pa esnan cu ta dal 2 bebida alcoholico pa dia, como 63 persona mas a desaroya un condicion di salud dentro di un aña, y pa esnan cu ta dal 5 bebida tur dia, tabatin un aumento di 338 persona cu ta desaroya un problema di salud.

Un di e autornan di e estudio, Prof. Sonia Saxena, kende ta un investigador na Imperial College London y cu ta un Docter, a bisa cu un bebida pa dia ta representa un riesgo chikito extra, pero na paisnan unda hendenan ta bebe mucho mas cu djis un bebida pa dia, e ta bira un suma aun mas grandi.

E autor principal di e estudio, Dr. Max Griswold na Institute for Health Metrics and Evaluation (IHME) na University of Washington, a bisa cu estudionan anterior a descubri cu alcohol den cierto condicion ta ofrece proteccion, pero nan a descubri cu e riesgonan combina di salud asocia cu alcohol ta aumenta cu cualkier cantidad di alcohol.

E asociacion fuerte entre consumo di alcohol y e riesgo di cancer, herida, y malesanan contagioso den nos estudio, ta supera e efectonan di proteccion pa malesa di curazon.

Aunke e riesgonan di salud asocia cu alcohol ta cuminza di ta hopi chikito cu un bebida pa dia, despues e ta subi rapidamente ora cu hende bebe mas y mas.

Gobierno di Inglatera na 2016 a reduci e nivel di alcohol cu nan ta recomenda pa homber y muher na no mas di 14 unidad pa siman (cu ta como siete glas di biña, of 6 glas di cervez).

Prof. Saxena a bisa cu e estudio aki ta esun di mas importante cu a yega di wordo haci riba e topico.  El a splica cu e estudio a bay mas leu cu djis considera e cantidad di factornan, incluyendo benta di alcohol, data cu hende a raporta nan mes riba bebemento di alcohol, abstinencia, data di turismo, y e nivel di contrabando di alcohol y trahamento di alcohol na cas.

E estudio a mustra cu muhernan di Ucraina ta bebe un promedio di 4 bebida pa dia.  Muhernan di Gran Bretaña ta bebe 3 pa dia.

Hombernan di Romania ta esnan cu ta dal mas di 8 bebida alcoholico pa dia.  Hombernan di Portugal ta bebe un tiki mas cu 7 bebida alcoholico pa dia.  E hombernan di Spaña ta bebe casi 6 bebida pa dia.

Prof. David Spiegelhalter a duna un advertencia riba e resultado di e investigacion.  El a bisa cu no tin ningun nivel safe di alcohol pa bebe.  Ningun nivel safe pa maneha auto of vehiculo.

 

- Advertisement -

DUNA COMENTARIO

Please enter your comment!
Please enter your name here