Famia di Camilo Carreño-Sosa ta cla pa tene varios Manifestacion

    8839
    0
    SHARE
    — Jose y Raquel Carreño-Sosa exigiendo Husticia pa nan yiu.
    - Advertisement -

    Mama ta rabia cu autoridad no a ofrece Recompensa pa por captura e asesino!

    ORANJESTAD (AAN): “Mi ta invita henter Aruba pa yudami pa mi busca Husticia pa mi yiu”.  Esey ta loke e dama Raquel a declara den un entrevista cu DIARIO.   Raquel ta mama di e hoben Camilo Alejandro Carreño-Sosa kende dos siman pasa a wordo asesina riba e parkinglot patras di Arawak Gardens na Palm Beach.

    Pa dos siman largo señora Diana Raquel Sosa, mihor conoci como Raquel a keda cu su curpa cera den camber!  E ta yora di dia y anochi, casi no ta come, y no por drumi.  Desde entiero di su yiu, e tabata sinti su mes desola y sin consuelo pa loke a pasa.

    Den tur e dos siman aki, e famia aki no a haya ningun yudanza.  Ningun momento ni Slachtofferhulp nan no a ricibi pa duna nan guia.  Su yiunan di 16 y 11 aña di edad, a keda cu hopi rabia den nan curpa. Y nan no gusta mira nan mama ta yorando.

    E mama a indica, cu tur cos a cuminza debi na bendemento di un Auto.  Camilo a pone su auto blanco na benta riba Vraag & Aanbod riba Facebook, y e tal Ryson Paskel aki a cumpra e auto.  Pero Paskel no a paga esaki full, y e anochi ey na Palm Beach nan a topa otro.  Camilo a bisa Paskel cu e lo bay Recherche pa e hecho cu el a cumpra auto sin paga.  Esaki a pone Paskel rabia y a bringa cune.

    Despues nan dos a bay den diferente direccion.  Camilo a bay na su auto, y aki el a wordo sorprendi ora cu Paskel a regresa cu un arma den su man, y a hinke den forma di trinshon den e parkinglot.  Tur cos ta indica cu el a wordo hinca cu un screwdriver.  E screwdriver a perfora pulmon di Camilo, cu resultado fatal.

        DI CON NO PONE RECOMPENSA:

    Riba Diaranzon nan a mira con Cuerpo Policial a saca un poster di “WANTED” enbusca di e supuesto asesino Ryson Paskel y pa nan sorpresa, ta buscando e paradero di e persona pero ta ofrece ni 1 Florin di recompensa pa por localiza e persona.

    “Mi ta hopi rabia encuanto esey.  Di con Polis no ta pone recompensa?  Pasobra su famia ta Colombiano?”  Esey ta loke Raquel a puntra.

    El a splica cu nan mes ta bay haci otro siman 29 aña bibando na Aruba.  Esey ta net dia 28 di September venidero, y esey ta mesun fecha cu nan yiu Camilo lo a cumpli 23 aña di edad si acaso e no a wordo ranca cruelmente di e mundo aki.

    Raquel Sosa a splica, cu mas cu dos siman caba a pasa y nan como famia a tende nada ainda.   Nan no sa nada, kico a worde haci of no door di Recherche.  No a haya yamada di Recherche, ni di Ministerio Publico, nada.

    Pesey mes riba Diahuebs, nan a lanta trempan y a acudi na tanto Warda di Recherche na Eagle, como tambe Warda di Recherche na Shaba, pa asina papia cu hefe.

    “Simplemente nos a bay papia cu nan, pasobra mi no kier pa ningun Mama na Aruba pasa den mesun cos cu mi famia ta pasando aden,” el a relata na DIARIO.

    Ademas di esey, famia Carreño-Sosa a trece na Recherche nan preocupacion, esta cu varios hende a duna nan informacion cu e asesino Ryson Paskel tin famia cercano cu ta Polis.  E Hefe di Recherche a contesta e famia cu den pasado esey si tabata e caso, pero awor e acto-primo di Paskel no ta den Cuerpo Policial mas.  Pero famia di Camilo ta keda skeptico cu e informe ey.

    Famia tambe a puntra Recherche riba e informacion cu ta circula, cu Ryson Paskel aparentemente a haya yudanza y a bandona Aruba na forma scondi.  Polis a bisa nan, cu nan no por contesta e pregunta ey cu 100% di siguranza.

        LO TENE MANIFESTACION:

    Awor mama Raquel kier pa pueblo yude busca Husticia pa su yiu.  “Si mi mester bay cerca representantenan di Hulanda, of hasta di Merca pa busca husticia, mi lo bay hacie.”

    El a agrega cu nan ta planea di tene varios Manifestacion na Aruba, y pidi pueblo di Aruba pa por fabor yude pa tin husticia pa Camilo.  “Mi no kier pa ningun mama, ni tata, ni ruman pasa den loke nos ta pasando aden.  Nos a caba di pasa den dos siman terible, sin tende noticia, ni yamada, ni nada.  Ni e dia cu e cos ey a pasa, ningun hende di autoridad of Ministerio Publico a ni yega na nos cas.  Nos no a ni haya yudanza di Slachtofferhulp.”

    Porfin riba Diahuebs 20 di September, el a haya suficiente poder pa sali riba caya.  “Awor ami ta tuma over!”  El a dicidi na acudi na prensa, y spera cu nan mensahe por yuda move tur cos den mihor direccion, y cu e investigacion por haya e empuhe necesario pa conclui den aresto di e asesino.

    E ta pidi tur hende den Cuerpo Policial, Ministerio Publico, y hasta Ministronan pa enfoca y traha duro pa asina kita e asesino cu ta canando los rond riba e isla.

    Camilo Alejandro Carreño-Sosa ta un hoben semper bon mucha, cu a haya hopi amistad specialmente desde cu el a finaliza Colegio San Antonio na Santa Cruz, y cu e ta trahando den un top Restaurant Italiano riba e isla.  Pesey mes durante entiero, e multitud di hende cu a aglomera na e entiero a demostra ta cuanto cariño ciudadanonan tin pa e mucha.

    Y awor ta pone un poster di WANTED pa e asesino, y no ta ofrece ningun recompensa?

    “Si ami tin di hipoteca mi cas, mi lo hacie pa asina pone recompensa pa informacion” Raquel a declara na DIARIO.  E kier sa di con uno si ta wordo ofreci recompensa, y e otro no?

    “Nos ta keto te ainda, hende keto cu no ta busca problema.  Esey no nifica cu nos no mag di haya Husticia.  Na Colombia tin un dicho: “No me va alcanzar la vida para buscar a ese hombre.”  Señora Raquel ta recorda tambe cu pa ley di Aruba, esnan cu ta yuda proteha Ryson Paskel tambe, corda cu husticia por cay pisa riba nan..

    “Mi no kier daña mi curazon, mi no tin odio… pero un cos asina mi lo no bay lage pasa,” el a bisa.  “Awor nos ta haya nos ta bay yama Docter pa wak yudanza si por haya Psicologo pa nos yiunan, y tambe pa nos mes.”  Aki e ta confirmando cu ningun hende ta dunando e famia yudanza.

    Nan ta pensando cu famianan mes ta yudando Ryson Paskel keda scondi, y e ta haci suplica pa tur esnan cu tin informacion, pa suministra Polis cu esey.  Famia por keda pensa hopi cos di loke ta pasando.  Corda, cu Aruba no ta grandi.  Tardi of trempan, Ryson no por keda scondi pa semper.

    “Ken por bin sigura nos, cu famia di Paskel no ta ofreciendo yudanza pa e sconde?  Kizas incluyendo posible miembro di famia cu ta den Polis.  Pa e motibo aki y mucho mas, mi lo bay pidi yudanza di Consul di Colombia, bvusca forma pa papia cu VNO, y hasta cu Consul di Merca situa na Curacao.  Nos lo bay actua all out pa busca husticia pa Camilo”.

    E ta kere cu mirando e papel di conducta di e asesino Ryson Paskel, incluyendo cu el a wordo encarcela den Cel debi na maltrato contra su propio welo… cu e acto na Palm Beach ta uno pre-medita.

    “E ta un acto pre-medita!  Pasobra el a bay coy e obheto pa asina comete e acto, e por tabatin tempo pa arepenti su mes y stop cu su plan.  Pero e mes a dicidi pa haci e acto cobarde aki, y tabata 100% conciente di loke el a haci,” e mama di Camilo a bisa.  “El a splica cu el a compronde e pasado, y ta sinti su mes sorry pa e bida di Paskel”

    El a splica cu informacion encuanto nan prome Manifestacion, cu posiblemente lo ta dilanti Ministerio Publico, lo sali pronto den DIARIO.  E ta suplica esnan cu kier yuda organiza e Manifestacion, pa contact famia.

    - Advertisement -

    DUNA COMENTARIO

    Please enter your comment!
    Please enter your name here