Home General Futuro Citgo Aruba a bira mas scur

Futuro Citgo Aruba a bira mas scur

452
0
SHARE
- Advertisement -

Gabinete Wever-Croes a priminti dialogo nacional

*Perspectivanan economico di Venezuela ta empeora

*Aruba no a tene cuenta cu e debenan di PDVSA

Den declaracion haci na Februari 2018,  Minister Presidente Wever-Croes a indica cu si realisacion di e proyecto Citgo Aruba no ta factibel, lo tene un dialogo nacional.  Na porta di e ultimo trimester di 2018,  futuro di proyecto ta mas scur cu nunca. Temporada turistico 2018-2019 mester produci suficiente pa mantene un base economico aceptabel den situacion di crisis. Informacion di DIARIO ta indica cu si Citgo/PDVSA no por garantisa realisacion total di e proyecto na September 2018, Gobierno mester dicidi riba futuro manera presenta dor di Minister Presidente.

ORANJESTAD (AAN): Un aña despues cu Gobierno anterior di Aruba a garantisa cu no tin ningun peliger pa Aruba pa loke ta trata e proyecto refineria Citgo, un Gobierno nobo di Aruba mester a admiti cu tin problema.  Gobierno anterior cu a negocia e proyecto cu Citgo, subsidiario di PDVSA, no a mira e riesgonan pa cual Merca y Hulanda a adverti.

DIARIO ta sigui vigila cada suceso y desaroyo den PDVSA, CITGO y Venezuela pa por informa Aruba debidamente.

DEBENAN TA HIBA VENEZUELA  PA DESASTER 

Medidanan economico cu Union Europeo y Merca a impone riba Venezuela tabata basa riba e crisis humanitario di Venezuela, cu tin su origen directamente den e maneho economico di e pais.

Publicacionnan di tur medio internacional di comunicacion a mustra y sigui mustra riba e catastrofe economico di Venezuela, cu a hiba e pais na un crisis financiero, social y humanitario.

E debenan di Venezuela a hinca e pais den un spiraal for di cual Venezuela no por sali.

Ora a cera e contracto cu CITGO e impresion a ser crea cu no tin problema pasobra no por confisca e refineria di Aruba cu no ta di PDVSA. “Un bista cu no ta cuadra cu realidad a ser crea,” informacionnan ta mustra.

Na 2015 tur cifra tabata indica caba, cu Venezuela tabata den un problema total. Esey a aporta tambe na e ansha di CITGO i PDVSA pa haya un refineria pafo di Venezuela pero den cercania di e pais.

Ta sinti falta di un analisis financiero di PDVSA na momento cu e contractonan a ser firma. Hecho ta cu expertonan financiero mundial tabata adverti pa e caos di PDVSA.

PDVSA NO POR CUMPRA REFINERIA DI ARUBA 

Ningun momento posibel compra di e refineria di Aruba mester a bin na discusion. PDVSA no tabata tin placa pa cumpra e refineria di Aruba.

“Venezuela ta man mara na debenan rond mundo. Na 2016 Aruba mester tabata sa cu ya Rostnef por a exigi di bira doño di 49.9 porciento di Citgo y cu companianan cu PDVSA tabata debe tabata busca forma pa confisca e propiedad,” informacion a mustra.

Esey ta implica cu ni Hulanda ni Merca por tabata adverti pa riesgo grandi cu e proyecto tabata contene basa ariba ken ta doño di e refineria.

Nan a mustra riba garantianan cu Aruba mester duna y tambe e posibilidad pa realisa e proyecto den e situacion Venezolano y directamente di PDVSA.

Finalmente mester tene cuenta cu desmantelacion y problemanan ambiental cu ta keda atras pa Aruba si CITGO no por bira realidad.

PRONOSTICO

VENEZUELA A EMPEORA 

Pronostico di Venezuela a empeora. Informantenan a mustra riba e situacion cu a surgi na Venezuela  den e ultimo lunanan y cu a haci cu legalmente PDVSA no por dispone pa CITGO na e momentonan aki.

Banda di esey por mira con PDVSA no por percura pa un bon estado di su refinerianan cu mester garantisa e produccion desea di petroleo na Venezuela.

E incidente recien na e Puerto Jose caminda un barco a dal contra un dok. Cu urgencia Venezuela a trata di yega na un areglo cu facilidadnan di Puerto La Cruz, e haf cu a trata mas di mantene ora e pais a sufri un caida di 26 porciento di su produccion.

E sumanan di debenan internacional ta astronomico y por causa cu cualkier momento por confisca mas propiedad di PDVSA cu no a cumpli cu su palabracion cu Conoco Philips cu a confisca crudo Venezolano pa haya pago di su debe.

E siman aki publicacionnan alarmante ta sigui mira luz y ta denuncia cu caida di e pais lo no ta pa medio di opositornan politico pero dor di un economia y situacion financiero/monetario desastroso.

 

WEVER-CROES

MESTER DICIDI PA FUTURO DIARUBA AWOR 

“Loke PDVSA y CITGO a priminti durante nan ultimo encuentro cu Gobierno di Aruba no por mantene awor. E riesgonan ta mas grandi cu nunca, teniendo cuenta tambe cu situacion di conflicto habri cu otro paisnan di Latino Americano cu no ta sostene e crisis humanitario.”

E postura di Prome Minister Wever-Croes di Februari 2018 mester ta mantene awor.

E ta encera un dialogo nacional. Gobierno lo tene cuenta cu tur opcion. Lo trata di haya otro compania pa reemplasa CITGO pero tambe e posibilidad pa bin cu otro uzo pa e tereno di refineria.

E pasonan pa un futuro nobo mester ser tuma awor ya cu Aruba ta confronta fin di aña den un situacion di crisis y PDVSA ni Venezuela por ofrece Aruba garantia di un porvenir cu un refineria manera acorda den e proyecto CITGO Aruba.

Aruba no por tene na un economia cu un solo base.  Por atrae industrianan adapta na e exigencianan ambiental nobo cu ayudo di Reino Hulandes y sigur Union Europeo cu ta sigui registra crecemento.

E decision mester ser tuma riba termino corto pa Aruba por uni den plannan solido pa futuro di e pais.

- Advertisement -

DUNA COMENTARIO

Please enter your comment!
Please enter your name here