Home Parlamento Gobierno a presenta na Parlamento pero no a duna informacion

Gobierno a presenta na Parlamento pero no a duna informacion

39
0
SHARE
- Advertisement -

Parlamentario Richard Arends

ORANJESTAD (AAN): Pa  dos dia largo Gobierno a presenta na Parlamento e ehecucion di presupuesto 2018 a base di un mocion di Parlamento y cu ta instrui Gobierno pa hasi esaki, Parlamentario di fraccion di AVP, sr mr drs Richard Arends a mustra.

“Nos a spera honestamente cu Gobierno lo a bin duna un presentacion conciso y al caso riba con e sumanan presupuesta ta wordo usa te cu awor, kico ta e porcentahe di entradanan cu a drenta, kico ta e desafionan pa logra e metanan y intercambia di opinion cu Parlamento riba e tema. Fraccion di AVP a spera en toto caso mas detaye riba kico nos por spera riba e cambio di presupuesto 2018 pa por acomoda e recomendacionan di CAFT. Sinembargo e tabata dos dia largo di retorica politico y unda honestamente no a sali nada concreto afo.”

Parlamentario Arends a sigui mustra cu e reunion mes a caracterisa su mes atrobe cu masha tiki informacion y detaye. Na momento cu tabata purba bay den detaye, por ehempel door di puntra con ehecucion di e  plan di personal ta bayendo cu mester resulta den un cortamento di 12.2 miyon florin e aña aki ainda, e contesta cu parlamento a haya ta cu e ta bayendo ‘bon’, of cu ‘trahando riba dj’e’. E contestanan di Gobierno tabata yena cu ‘adjetivonan indefini’ cu no tabata laga Parlamento saca su conclusion kico realmente ta e estado di ehecucion di presupuesto 2018 cuatro luna prome cu e aña culmina.

“Esaki tambe tabata e tipo di contestanan encuanto e reforma fiscal cu — segun declaracion di Gobierno —  mester drenta na vigor na januari 2019. Un topico cu Gobierno no kier a toca mes tabata e diferencia entre presupuesto 2018 y 2019 cu tin un diferencia di 130 miyon. Gobierno a bisa simplemente cu ‘ora cu tin mas detayes nan ta bolbe’ y pa loke ta trata negociacionnan cu Hulanda riba e cuadro financiero nobo, e contesta ta cu ainda esaki ‘no ta cla’. E poco datosnan cu a wordo suministra tabata limita te cu juni y ya caba nos ta na september. Hasta mocionnan cu a wordo treci dilanti tabata demostra un biaha mas e falta di un programa di gobernacion. Loke cu tin te aworaki ta un acuerdo di gobernacion cu no ta duna indicacion di metanan ni tampoco di e liña di tempo den cual esakinan mester wordo logra pa cada ministerio.

“Mi kier a enfatisa cu cada organo consitucional tin un rol. Parlamento no ta un instituto cu ta co-goberna, pero ta un instituto cu ta controla Gobierno y ta co-legislador. Falta 4 luna pa aña caba y prome cu esaki Gobierno mester presenta e presupuesto supletorio pa 2018 pa incorpora e recomendacionnan cu CAFT a bini cun’e, presupuesto 2019 cu un deficit -0.5% y e cambio di ley di supervision financiero.

Pa finalisa, e Parlamentario di fraccion berde a bisa cu unico palabra di contenido y concreto cu a wordo usa den e reunion di Parlamento ta e palabra “cumbre”, refieriendo na e Cumbre’18 di partido AVP cu a sera teni diadomingo pasa. Esaki ta indicacion cu partido AVP ta cla y prepara pa asumi su responsabilidad den ki rol cu ta.

 

- Advertisement -

DUNA COMENTARIO

Please enter your comment!
Please enter your name here