Home Gobierno Gobierno: Formulario di Cruz Cora of di UNHCR no ta e caminda...

Gobierno: Formulario di Cruz Cora of di UNHCR no ta e caminda pa cana pa haya asilo

104
0
SHARE
- Advertisement -

ORANJESTAD (AAN) – Diadomingo ultimo, Minister Presidente Sra. mr. Evelyn Wever Croes y Minister di Husticia mr. Andin Bikker, a tene un reunion urgente riba e tema di e situacion di Venezuela, y a invita tur instancia y departamento cu ta atende cu e asunto aki.

Minister Presidente a declara esaki y a expresa cu esaki mirando tur e informacion cu ta circulando tocante otorgamento di asilo politico. A bolbe confirma cu tur e departamentonan aki, con e procedure ta.

E mandatario a reitera cu procedure di Asilo ta uno hopi delicado na Aruba, e dignatario y Gobierno a ripara cu tin hende ta haya un declaracion di Organizacion Internacional di Nacionnan Uni “UNHCR” y tambe di hendenan cu ta haya un carta di Cruz Cora di Aruba, pero ningun di e dos documentonan aki ta e caminda oficial pa cana pa haya asilo.

Esnan cu tin e documentonan aki na man no necesariamente, ta wordo considera na Aruba como hendenan cu ta pidiendo asilo.

Prome Minister a agrega, cu e forma con ta haya asilo na Aruba ta a base di tratadonan, cu e persona ta teme pa su bida den su pais di origen, den e caso aki Venezuela.

Pero pa haya esaki e persona mester pidie na momento cu e ta drenta Aruba y no ora e tin un aña y mey biba aki y cu e persona sinti peligro pa su bida.

Den e momento cu e persona drenta Aruba y cu e sinti cu su bida ta na peligro na Venezuela, e ta pidi asilo na autoridadnan di Aruba, no na Organizacion  Internacional di Nacionnan Uni-UNHCR, ni na Cruz Cora Aruba.

Autoridadnan di Aruba tin un comision encarga cu esaki cu ta consisti di diferente departamento, entre otro Dimas, Relacion Exterior, Departamento Huridico di Aruba, pues un comision cu ta bay atende cu tur e peticionnan di Asilo. Ora e Comision yega na conclusion cu e persona mester di asilo e ta haye. Na e momentonan aki, no tin ningun hende na Aruba cu a haya asilo segun e procedure di Aruba.

Personanan cu tin otro declaracion den nan man, ta declaracionnan unda ta consta cu nan a pidi asilo y no cu nan a haya. Si nan tin un carta asina ta posiblemente cu nan a bati na porta di Cruz Cora, cu nan a pidi asilo, pero no ta Cruz Cora ta duna asilo, Minister Presidente a reitera.

El a subraya cu Cruz Cora ta certifica cu e persona yega eynan. UNSCR por duna e persona un carta cu ta bisa cu el a pidi asilo, pero no necesariamente esey kiermen cu e persona a haye.

E mandatario a menciona cu e pregunta ta kico ta bay pasa cu esnan cu tin e cartanan aki den nan man.

“E papel aki no ta wordo reconoci pa Gobierno di Aruba. E no ta un permiso pa bo traha, no ta un permiso pa estadia. Si un persona ta sinti cu e tin cu haya proteccion pa su bida e tin cu haye segun e procedure di nos pais”, Minister Presidente a reitera un biaha mas.

E siman aki gobierno ta bay tin contacto cu e Organizacion Internacional di Nacionnan Uni, UNHCR na Washington, pasobra gobierno ta kere cu e organizacion aki por haci un bon trabao den yuda nos pais selecta ken cu ta pidi asilo na nos gobierno, por wordo entrevista. E mandatario a subraya cu un bon cooperacion cu e organizacion aki por yuda gobierno.

Na e  momentonan aki UNHCR tin un representante na Aruba y el a confirma pa gobierno cu e no a firma ningun di e papelnan aki. Den pasado Cruz Cora tabata nan representante na Aruba, pero aworaki no mas, pues un documento firma pa nan tampoco ta un documento di UNHCR.

Minister Presidente a expresa cu e sa cu pa nos comunidad esaki ta hopi bruha y ta trece hopi preocupacion den pueblo y tur esaki ta comprendible.

Minister Wever-Croes a haci un yamada na pueblo pa cada ken keda trankil. E situacion di asilo ta delicado y e situacion na Venezuela ta hopi dificil.    “Nos ta convivi cu lo ta sosode na Venezuela. Nos tur ta conoce hende cu ta sufriendo aya of aki, sinembargo nos tin cu pensa na Aruba prome, pa Aruba ta prepara. Nos tin cu take care di nos pueblo prome pa despues nos take care di otro, y den esaki e procedura di Aruba mester wordo sigui”, e dignatario a remarca. Finalmente e dignatario a reitera cu Aruba tin hopi reto su dilanti y nos pais mester ta trankil pa por atende cu esakinan. Na momento cu tin mas informacion esaki lo wordo divulga.

Potret di Facebook di Gabinete Wever-Croes

- Advertisement -

DUNA COMENTARIO

Please enter your comment!
Please enter your name here