Home Parlamento Gobierno ta poniendo suministro di awa y coriente pa Aruba na peligro

Gobierno ta poniendo suministro di awa y coriente pa Aruba na peligro

179
0
SHARE
- Advertisement -

Segun Parlamentario sr. Mike de Meza:

ORANJESTAD (AAN) – Den rueda di prensa di fraccion di AVP, Diahuebs mainta, Parlamentario sr. Mike de Meza a hiba palabra y a toca e tema di energia.

El a trece dilanti cu ultimo dianan por a bolbe nota cu e prijs riba mercado internacional di fuel oil ta sigui aumenta, y cu esaki lo tin su efecto riba prijs di produccion di awa y coriente na Aruba.

E parlamentario a señala cu gobierno actual sin cu tin un maneho riba energia ta sacando placa for di e companianan di utilidad, y tanto den e presupuesto di e aña aki como esun di 2019 por mira cu e dividendo ta un parti hopi importante cu gobierno ta keda saca for di e companianan aki y esaki lo causa cu e prijs di awa y coriente pa e consumidor lo mester wordo aumenta.

Parlamentario de Meza a indica cu for di momento cu Prome Minister sra. Evelyn Wever-Croes, cu tambe ta minister di energia, a tuma su puesto den gobierno, a laga sa cu no ta bay “hedge” mas. Y ora el a mira e consecuencia di esaki el a duna ordo pa bin cu hedging atrobe, y un luna despues ora el a mira cu un partido di coalicion tin problema cu esaki, gradualmente a duna instruccion pa stop cu hedging y na momento cu el a stop’e por a mira cu e prijs a sigui aumenta.

Esaki ta trece cune un caida sumamente grandi pa e compania di utilidad, den e caso aki WEB Aruba NV., cu tin cu sigui paga un prijs halto pa fuel oil, pero di otro banda no por haci nada pa absorbe esaki.

Pa cada un cen cu prijs di coriente mester aumenta, e ta papia di ocho pa diez miyon florin, segun e parlamentario di AVP. Kiermen, pa cada 5 cen cu e prijs aumenta, esaki ta 50 miyon florin.

Parlamentario de Meza a referi na un carta cu e director di WEB a manda pa Utilities den su intencion di alerta gobierno di Aruba cu nan no por sigui absorbe e aumento di prijs aki, pasobra nan tin cu sigui cumpli cu cierto rekisito di esnan cu ta financia e proyectonan, cu ta sumamente grandi y cu hopi biaha tin partinan di mantenimento hopi costoso, pa por garantiza cu e companianan aki sigui suministra awa y coriente di un calidad halto. Y den esaki, e parlamentario a subraya, mester traha cu presupuesto unda tin hinca tur e gastonan aden, y banda di esey tin cu cumpli cu e rekisitonan.

E parlamentario a sigui bisa cu encuanto WEB Aruba NV nan tabata tin nan presupuesto ocho aña pasa, cu tabata ta di tal nivel cu a contene e prijs. Na momento cu esaki subi y, normalmente si tin hedge den dje, e hedging ta wanta e subida di e prijs aki.

Pero door cu no tabata tin pa instruccion di Prome Minister Wever-Croes unda e companianan di utilidad no tin mag di hedge, esaki ta keda totalmente habri na e prijs di fuel oil cu ta sigui subi bay halto, y esaki a causa cu director di WEB a manda un carta.

E parlamentario ta recorda cu Prome Minister a bisa cu e no sa nada di e carta y aworaki tin casi un aña di gobernacion ta bayendo y tin por lo menos mey aña caba cu e companianan di utilidad ta alertando gobierno riba e efecto aki, pero ketobay nos tin un prome minister cu ta bisa cu e no sa nada di e carta aki. Parlamentario de Meza a expresa cu esaki ta un lastima pasobra e ta un gañamento pues tur hende sa di dje, pueblo y tur compania estatal y di sector priva, sindicato a papia di dje. E unico persona cu ta pretende di no sa di e carta aki ta Prome Minister cu tambe ta Minister di Energia y esaki lo trece un peligro y e ta hincando e companianan den un situacion financiero dramatico pa e suministro di awa y coriente na Aruba.

 

 

 

 

 

 

 

 

- Advertisement -

DUNA COMENTARIO

Please enter your comment!
Please enter your name here