Home General Habitantenan di Matadera completamente disgusta cu Trucknan cu ta core roekeloos

Habitantenan di Matadera completamente disgusta cu Trucknan cu ta core roekeloos

129
0
SHARE
- Advertisement -

ORANJESTAD (AAN): Habitantenan di Matadera no sa mas kico pa haci.  E pida caminda aki den historia di Aruba hamas a yega di haya Asfalt.  E molester a empeora ultimo temponan, y esaki tin awor tur hende disgusta.

E caminda di santo ta malo, ta produci yen stof, y awor ta extra hopi vehiculo pisa ta pasa, y cu speed comosifuera ta riba Highway nan ta.

Habitante Kenny Solognier di Matadera 22, a mustra cu su famia ta cansa cu e Trucknan cu ta pasa pa bay na un tereno priva na Matadera mes.  E trucknan ta bay deposita sushi y demas desperdicio den un dam cu a yega di wordo coba eynan pa saca santo.  Awor e bashamento di grofvuil aki tin bisiñanan completamente disgusta.

Loke tin nan mas alerta aun, ta cu hasta Trucknan di Chupa Beerput ta bin deshaci di contenido den e area aki.  Esaki no ta algo aceptable den e mundo moderno aki.

Solognier tin 24 aña bibando na Matadera.  Su suegronan mes tin 48 aña na mesun lugar y awor e situacion a bira fastioso.  Ningun Gobierno a yuda nan ainda cu algo.  Pero cada rato trucknan ta pasa pa bay benta sushi, autonan ta bay benta material den mondi.  Status ta mescos.

Tin biaha Solognier ta stop e chauffeurnan, y tin biaha e ta haye den hopi problema cu e manehadornan, pasobra nan ta hopi fresco tambe.  Pero tog Solognier a cuminza cansa di e situacion.

Ta tur dia nan tin di bari y mop na nan cas.  Y cada biaha cu e topa cu e vehiculonan cu ta core sin ningun clase di respet pa habitantenan, e ta saca potret di nan.  E tin monton potret di e vehiculonan aki warda, como prueba.

Den pasado nan a yega di acudi na DOW cu e peticion pa asfalta e pida caminda net dilanti nan cas.  Pero DOW a bisa cu esey no por.  Bo no por djis pone un pida asfalt dilanti bo cas, pero si bo por pone full e caminda di asfalt.

Solognier no a acepta esey, pasobra e no ta bay pone asfalt pa tur otro hende eybanda, pa otronan goza di dje.

Despues el a purba di basha azeta sushi riba e caminda dilanti su cas, pa asina sikiera trata na reduci stof.  Pero na momento cu e tabata bashando e ultimo gotanan di azeta riba e pida di punta-pa-punta dilanti su cas, ata Polis a yega y por poco nan a detene y bay cune.

Nan kier a dune multa, pasobra “no mag haci esey”.

E mes pa 24 aña caba ta pidiendo auxilio di autoridad pa yuda pone asfalt of haci algo cu e trucknan.  Pero nada!  El a djis trata na pone azeta, y mesora autoridad kier actua.

Segun Solognier, e tin nada contra hendenan cu ta haci trabao di benta sushi.  Pero e ta splica cu si e chauffeurnan ta core manera hende normal, e lo no tin problema cu e personanan aki.  E sa cu e trucknan ta gana placa cu cada viahe y drop di sushedad.  E stof aki tin nan ta sofocando.

Debi na tur esaki, nan ta hayando hopi molester di Djaca como tambe Boa.

Solognier a mustra cu na varios ocasion nan tabata yama City Inspector, como tambe Polis, pero nunca nan ta yega.  Pero ora baca hoga, e ora si Polis ta core yega.

E ta haci suplica na DOW y Wegendienst bolbe pasa check e situacion na Matadera.  Su cas mes ta na werki debi na e stof diki.  Tur fin di aña e ta usa pressure-washer pa laba su cas, y ta lodo diki ta kita for di rond di su cas.

 

- Advertisement -

DUNA COMENTARIO

Please enter your comment!
Please enter your name here