Home Policial Helicopter y radar lo por yuda frena entradanan ilegal

Helicopter y radar lo por yuda frena entradanan ilegal

209
0
SHARE
- Advertisement -

Segun Alto Comisario Andrew Hoo:

ORANJESTAD  (AAN): For di diasabra marduga te den oranan di atardi despues di merdia, autoridad tabata activo buscando ilegal cu a drenta cu boto. A logra pone man riba boto. Pero segun e prome ilegal cu a wordo gara, e ta papia di 25 ilegal den e boto. Autoridad no ta sosega y ta keto bay den e area pa sigui busca.

Alto Comisario di Polis, Andrew Hoo tambe a duna acto di presencia, pa asina tira un bista y mira si e tambe por topa cu ilegalnan riba e caminda den Colony.

E ta conta cu den careda di 12’or di marduga di diasabra a drenta melding di un boto cu supuestamente ilegal. Patruyanan a wordo mobilisa den e area ya indica. Kust surveillance, patruyanan normal y tur otro team cu ta sostene KPA tambe a wordo manda den e area. E accion di buskeda a cuminsa di biaha. Melding di e publico cu tin Aruba na pecho, ta yama y notifica polis.

Den transcurso di diasabra marduga pa mainta, a logra pone man riba 8 ilegal. E buskeda ta sigui. Durante interogacion nan ta bisa cu nan a bin cu mas hende. No por descarta den mondi of den e casnan bandona, tin mas di nan scondi. Esey ta loke ta pasando awor aki y no ta stop te ora cu haya casi tur of tur.

Tin varios unidad di polis envolvi. Patruyanan cu ta remarcabel, pero tambe otro unidadnan cu ta move manera turista. Segun Alto Comisario, den tur inzet policial, mester keda dilanti di criminalnan of actonan ilegal. Por divulga tur tactica pero nan tin nan maneranan pa yega na nan meta.

KPA ta bezig cu destaho publico pa loke ta helicopter cu ta den pleno marcha. Por cierto siman pasa tur e companianan cu ta interesa por a cumpra e terms of reference y diabierna ultimo tabata tin un reunion unda cu nan por a haci e preguntanan personalmente na esnan cu ta trek e destaho publico aki pa yega na mas detaye.

E proyecto di radar pa KPA tambe ta canando. Tur vooronderzoek a wordo haci pa loke ta e companianan cu por bin na remarca. E no ta un inversion chikito, sino uno basta grandi. Mester haci e huiswerk hopi bon prome cu hinca nan mes den un inversion grandi y pa e plan den futuro, no cay den otro.

Te ultimo cu Alto Comisario a check, tabata tin 19 compania interesa. E por a bira mas despues di diabierna, pa e duna e servicio di helicopter pa Cuerpo Policial.

E streefdatum ta prome cu fin di aña. A streek pa November of December. Pero realisticamente, tin cu mira cu helicopter ta servicio priva of civil, sino pa Cuerpo Policial. Tin aspecto tin cu tene cuenta cun’e, mirando cu e ta autoridad di ley. Ta algo cu bo no por bestel na un tienda. Ta trata aki di special order y por tuma su tempo. Toch ta streef pa fin di aña.

Plan di radar

Ta pone radar den areanan strategico pa loke ta Kustwacht, y ta pa uso di Cuerpo Policial. Ta sostene tur otro dienst y tur otro dienst por coopera cu nan. Cuerpo Policial y e otro servicionan tey pa combati criminalidad. Alto Comisario a agrega cu nan tin comprension pa loke ta pasa den otro paisnan. Tin manera pa bin Aruba y pa busca ayudo.

Ta adverti esnan cu ta yuda e hendenan aki, loke nan ta haci tambe ta castigabel. Bo mester tin un contacto pa bo por yega. Por ta un of dos dia prome, pero despues bo mester tin un contacto aki pa cuminsa bo bida.

Polis tin wowo riba tipo di fenomenonan asina. Nan tin bista riba e situacion cu localnan of hendenan cu ta biba aki cu ta duna un man na e personanan cu ta drenta ilegal.

Tur cos tin su consecuencia, segun Alto Comisario. E yegada di e hendenan ilegal, no ta nan so. No sa cu e botonan ey ta haci tripnan pa un solo cos. Nan ta bin cu droga, cu arma, cu e hendenan ilegal. Si bo ta bin cu bon intencion, bo ta bin cu avion.

Bo ta haci bo cosnan legal, bo kier forma un bida aki, bo ta haci’e, pero na un forma legal. Si bo no tin bon intencion, bo ta bin na e forma cu e hendenan aki ta haci. Pesey bo ta mira polis y tur team ta bin. Na final e tin su efecto na Aruba.

 

 

- Advertisement -

DUNA COMENTARIO

Please enter your comment!
Please enter your name here