Home Hudicial Hof a dicidi na libera ciudadano cu tabata condena na 12 aña...

Hof a dicidi na libera ciudadano cu tabata condena na 12 aña di prison

950
0
SHARE
- Advertisement -

Despues di 2 aña y 5 luna encarcela

ORANJESTAD (AAN): Dialuna den oranan di merdia, Hof di Corte Superior a dicta sentencia den e apelacion di e homber M.B. contra e sentencia di 12 aña di prison.

Hof, contrario na decision di Corte den Promer Instancia, no ta haya convincentemente proba cu M.B. ta responsabel pa e morto di su tanta riba 23 di Maart 2016 y a declara M.B. liber. Despues di 2 aña y 5 luna encarcela den KIA cu un condena di 12 aña di prison, Dialuna M.B. a worde pone den liber di inmediato.

Por a mira un alegria riba cara di M.B. cu husticia ta prevalece. Desde principio, M.B. a keda mantene su declaracion cu e no a haci nada y cu el a bin haya su tanta benta abou.

DI 12 AÑA DI PRISON PA LIBERTAD INMEDIATO:

DIARIO a probecha di e oportunidad pa entrevista e abogado di M.B., mr. D.G.Illes. Mr. D.G.Illes tabata hopi contento cu el a logra convence Hof cu su cliente ta inocente.

Mr. Illes a splica cu e sentencia cu tabata programa pa worde pronuncia otro siman dia 10 di September 2018, pero el a worde informa cu Hof ta dicta sentencia Dialuna mes. Ora ta sentencianan adelanta asina ta pasobra tin algo. Mr. Illes tabata ancioso pa sa kico tabata e decision y …Bingo. Hof a declara su cliente liber.

SOSPECHOSO DI MATA:

Tabata riba di 23 di Maart 2016, den oranan di marduga cu Ambulance y Polis a worde manda na un cas na Moko.  Ora Polis y Ambulance a yega na e cas, y nan a haya un señora di edad halto den un estado critico pa cual motibo a opta pa hiba e señora hospital. Algun ora despues e señora ta fayece, a consequencia di un derame cerebral.  Potret aki ta mustra Polis na Servicio di Emergencia na Hospital pa check loke a pasa.

Door cu doktornan a haya e situacion straño, autopsia a worde haci. Ta durante e autopsia cu pathologo ta constata diferente slanan na e señora di edad. Esaki tabata motibo pa Ministerio Publico manda e curpa Instituto Forenensico di Hulanda (NFI) pa haci mas investigacion. NFI a conclui cu e persona mester a muri a consequencia di un derame cerebral, cu mester a worde provoca door di un sla duro, mientras cu e ta opinion di NFI tambe cu e señora tabata worde maltrata, paso e constata hopi sla di paden.

Pa es motibo ey NFI ta conclui cu e morto a worde provoca door di trauma causa door di maltrato. Mr. Illes a mustra cu desde e dia aki M.B a keda encarcela como sospechoso di a mata su tanta.

  SOSPECHOSO TA DESMENTI:

Mr. Illes a bisa na DIARIO cu M.B. mes semper a nenga di a maltrata su tanta. M.B semper a keda para riba su declaracion cu el a bin haya su tanta benta riba vloer. El a lant’e pone sinta den un stoel, y pa despues Ambulance bin busk’e y bay cun’e. Mr. Illes a mustra cu peculiar tabata cu e anochi ey solamente e tanta, M.B. y su tata tabata na e cas.

   CONDENA NA 12 AÑA DI PRISON:

Despues cu e caso a worde trata den Corte di Prome Instancia, caminda Huez a condena M.B. na un castigo di 12 aña di prison pa a mata su tanta. Huez den Prome Instancia a basa su mes riba raport di NFI cu ta indica cu e persona a worde maltrata cu consequencia fatal, y e hecho cu segun M.B. mes, e anochi en cuestion, no tabatin ningun otro hende mas den e cas cu su persona y su tata. Y sigun M.B. mes, su tata tabata drumi. Pesey ta conclui cu M.B. mester tabata responsabel pa e maltrato.

   APELA SENTENCIA:

Mr. Illes a bisa cu el a conseha M.B. pa apela e sentencia di inmediato, ya cu e ta para riba su inocencia. Mr. Illes a duna di conoce cu e ta haya cu pa condena un persona den un caso manera esaki, a base di un proceso di eliminacion, lo mester tin hopi mas prueba, cual den e caso aki, no tin.

ABOGADO A CONVENCE HOF:

E caso den apelacion a worde trata riba 25 di Juni 2018 ultimo. Durante e tratamento, cu a dura algun ora, abogado mr. Illes a bari e ponencianan di Ministerio Publico na un forma duro y concreto. A mustra e tres Huesnan di Hof, a base di un contra rapport di un pathologo experto, cu porcierto tabata traha pa NFI, cu tin duda den e conclusionnan di NFI, y cu tin aspectonan cu NFI no a tene debido cuenta cun”e, ora di nan investigacion.

Na opinion di mr. Illes, esaki riba su mes caba ta haci cu no por condena su cliente, paso e motibo di morto no ta uno cla. Ademas di esaki abogado mr. Illes a cuestiona e forma con ta posibel pa condena un hende si no tin ningun prueba di agrecion fisico cometi pa su cliente M.B. A haci investigacion na curpa di M.B. y no a haya nada cu ta indica cu e anochi ey M.B. a maltrata un hende. Mr. Illes a bisa cu e investigacion na curpa di su cliente a worde haci apenas algun ora despues di e susedido riba 23 di Maart 2016.

Mr. Illes a mustra cu el a cuestiona e ponencia cu lo tabata tin “clean beating” cu a tuma lugar, pero pa cual ponencia tampoko no tabatin prueba. Tambe abogado mr. Illes a trece padilanti cu e tanta tabata worde cuida pa diferente persona. Personannan cu no sa con pa trata cu hende di edad halto cu den pasado ya a haya un deramen celebral. Y door cu autopsia no por destingi di ki tempo tur e slanan bieu cu a constata riba e curpa ta data, no por conclui sin mas cu M.B. a maltrata e tanta e anochi en cuestion. Mr. Illes a mustra riba e hecho cu e experto tambe ta subraya esaki.

  HOF DECLARA HOMBER LIBER:

Dialuna cos a bolter. Despues cu e caso a worde trata di nobo riba 25 di Juni 2018 y despues cu e caso a bolbe worde habri pa scucha tata di M.B. riba 20 di Augustus 2018 ultimo como testigo, Hof a conclui cu mr. Illes tin razon.

Ayera merdia, Hof a adelanta su sentencia y a declara M.B. un homber liber, pa falta di prueba, manera mr. Illes a bin ta indicando.

Primordial pa Hof tabata e hecho cu en berdad no por conclui di ki tempo e slanan bieu ta data y pa cual motibo, mescos e experto a indica y e mr. Illes a mustra, no por conclui cu e tanta no a fayece door di un caida manera su subrino, M.B. a bisa. Pa es motibo aki Hof ta conclui cu no ta convicentemente proba cu M.B. ta responsabel pa e morto di su tanta.

Por a nota cu M.B. a bira hopi emocional ora el a tende cu e ta un homber liber. M.B. tin mienstras tanto 2 aña y 5 luna sera, pero por a bay liber di inmediato. Den Corte mes miembronan di CEA a kita te hasta e boeinan di pia di inmediato.

 

- Advertisement -

DUNA COMENTARIO

Please enter your comment!
Please enter your name here