Home General Hotelnan y companianan a wordo notifica cu “tipping fee” pa piki sushi...

Hotelnan y companianan a wordo notifica cu “tipping fee” pa piki sushi ta triplifica

110
0
SHARE
- Advertisement -

Tisa LaSorte, CEO AHATA:

ORANJESTAD   (AAN): AHATA ta mirando hopi combersacion riba sushi, pero tambe riba e reunion di Parlamento unda ta papiando riba e prijs pa Serlimar, pa residencia. E cambio cu ta bin no ta pa hotel so, pero pa aeropuerto, Superfood, varios supermercado, companianan grandi cu ta uza e compactors di cierto compania na Aruba, a cuminsa haya desde juli un cuenta nobo. Ta cobra un “tipping fee”, di cual a laga sa cu tin un contract nobo entre Serlimar y Ecogas.

Esaki ta pone cu e “tipping fee” cu antes nan tabata paga 60 florin pa ton di desperdicio pa baha na Parkietenbos, awo pa motibo cu nan ta bay cuminsa maneha desperdicio di un manera mas sostenibel, e ta bin cu algun trabou pa maneha desperdicio.

E “tipping fee” a bay di 60 florin pa ton pa 180 florin pa ton, asina Tisa LaSorte, CEO di AHATA, a bisa. A triplifica e fee y esaki ta subida hopi grandi cu awo e comercio mester carga. El a sigui bisa cu un hotel cu tabata paga 10 mil florin pa luna, awor lo paga 2 mil florin pa luna. Esaki ta un crecemento grandi den gasto y ta dificil pa carga.

Nan no tabata sa di e cambio aki, pasobra tur cos cu tabata den publico riba e cambio di situacion di desperdicio tabata papia di residencia. Nan no tabata sa kico ta bay pasa, no tabatin un aviso cu lo bay triplifica e tipping fee. AHATA no a haya un carta, pero algun hotel, aeropuerto, Superfood a haya un carta splicando cu a triplifica e fee y tin un cuenta nobo. Den luna di juli a haya un carta cu e splicacion, pero e prijs a subi desde juli.

E carta ricibi ta bin for di e compania cu ta recoge sushi na diferente hotel y companianan. Pa por yuda miembronan, hotel y AHATA a tuma contacto cu e compania y a tene varios reunion cu e compania pa ricibi splicacion. AHATA a compronde cu tin un acuerdo entre Ecogas y Serlimar, di cual nan a determina e prijs nobo. E ta algo cu e compania y compania di gobierno a determina e prijs y ta kere cu nan a haci algun sondeo kico ta e costo di trabou. AHATA y tur miembro ta apoya completamente e idea di cera Parkietenbos. Tambe ta apoya completamente e idea di un maneho mas sostenibel pa Aruba, pero AHATA kier clarifica riba e triplificacion di e tipping fee di desperdicio.

AHATA a papia cu e compania comercial cu ta haci e waste management. A manda un carta pidiendo un reunion cu minister, pasobra aparentemente esaki ta un acuerdo entre Serlimar y e compania. AHATA ta pidi e oportunidad pa sinta papia y tende kico ta pasando, pero pa nan tende e parti di AHATA tambe. Pa tin un cuenta y den e budget di pago di 10 mil florin pa luna y diripiente sin aviso esaki a bira 20 mil florin pa luna, e no ta algo chikito pasobra e gasto ta hopi grandi. AHATA kier e oportunidad pa papia di kico ta pasando y riba e efecto di gasto grandi ta. AHATA ta compronde cu ora ta bay di “waste dumping” pa “waste management” e ta costa. Triplificacion ta algo exorbitante.

Den un compania ora ta papia di crecemento di prijs, mester corda cu e gastonan no ta solamente e subida di desperdicio pero tin otro cosnan cu nan gasto tambe a hisa. Si e gastonan keda hisa, ta yega un momento cu mester pasa esey den e prijs pa cliente. Esaki lo bira mas caro p’e cliente.

LaSorte ta kere cu tin un impresion cu hopi biaha comercio tin un fondo sin limite y por subsidia tur cos. Pero tin limite y ora pasa gasto mas halto den prijs pa cliente, den e caso aki pa turista e producto Aruba ta bira mas caro. Cada bes cu hisa prijs pa un turista, Aruba ta bira mas caro y den region nos competencia ta bira mas atractivo cu Aruba.

 

Den Parlamento minister a bisa di bin cu cobransa di sushi pa turistanan cu ta yega Aruba y pa hotel tambe. LaSorte a lesa esey den prensa y niun hende a menciona nada na AHATA ainda. AHATA ta wardando riba un aviso of un invitacion di combersacion pa haya sa mas di e plannan. E asociacion no a haya un contesta ainda riba e carta manda na gobierno pidiendo p’e prijs di desperdicio.

 

- Advertisement -

DUNA COMENTARIO

Please enter your comment!
Please enter your name here