Home Hudicial Huez a atende dos homber cu a bati un otro cu bate...

Huez a atende dos homber cu a bati un otro cu bate baseball y tubo di hero

174
0
SHARE
- Advertisement -

ORANJESTAD (AAN): E hombernan E.M.S.(24) y L.J.D.(19) ayera mainta a haya castigo di trabou pa comunidad pasobra nan a bati un homber cu un bate di baseball y un pida tubo.

Esaki pasobra e homber N. den su pick up lo a dal ruman homber chikito di L.J.D. riba bicicleta. Hues a bisa nan cu nan no mester tuma ley den man di e forma aki.

    BATI HOMBER CU BATE BASEBALL Y TUBO:

Fiscal a bisa Hues cu E.M.S. y L.J.D. ta wordo acusa cu riba 4 di Maart 2018 a bati un homber N. cu un bate di baseball y un pida tubo di hero.

Hues a cuminsa cu E.M.S., kende a admiti di a dal N. cu un pida tubo di hero 2 biaha y L.J.D. a admiti di a dal N. cu un bate di baseball un biaha.

Hues a bisa cu N. a declara na Polis cu dia 4 di Maart 2018 mas o menos 10’or di mainta banda di Baby Beach, el a mira un mucha homber ta core bicicleta banda robez di caminda y stroba trafico. El a hera dal’e, brake y hala atencion di e mucha. E mucha a tir’e cu piedra.

Despues el a bay na un veld na Lago Heights, dos homber a bati’e.

Polis a papia cu un testigo kende a bisa cu 2 homber E.M.S. y L.J.D. a maltrata e homber N. Na Polis E.M.S. a desmenti di dal e homber cu tubo di hero pero awor den Corte el a admiti. Riba pregunta di abogado mr. Bryson, L.J.D. a splica Hues cu den pasado el a presencia un accidente di un familiar y desde e tempo ey el a keda cu un rabia. Dia 4 di Maart 2018 su ruman chikito a yega cas na yoramento y a bisa cu un homber a dal’e cu pick up. Esey a pone cu el a rabia y a bay hunto cu E.M.S. pa dal N.

Hues a mustra cu e mucha mes a declara na Polis cu e tabata core bicicleta y un pick up a bay riba dje cu velocidad. E pick up a dal’e cu e baki. E chofer a baha y el a tir’e cu piedra y e chofer a baha cu un tubo. Esey a pone cu L.J.D. a pidi E.M.S. bay cun’e pa bati e homber N.

Hues a mustra cu na 2013 y 2014, E.M.S. a worde condena pa casonan di violencia. Na 2015 el a sali liber.

EXIGENCIA DI FISCAL:

Fiscal a bisa Hues cu e ta haya legalmente y convicente proba cu E.M.S. y L.J.D. a bati e homber N. Segun maneho di Ministerio Publico pa maltrato cu arma pa un persona cu ta promer biaha e ta cay den man di husticia, ta 90 ora di trabou pa comunidad. Di otro banda e homber N. lo a dal e ruman chikito di L.J.D.

Fiscal a bisa cu no ta permiti cu ta bay tuma ley den man y regla cuenta. El a bisa tambe cu no ta conoci kico realmente a pasa cu e ruman homber chikto di L.J.D.

Pa E.M.S., ta algo otro. E tin un carchi di castigo y dos caso di violencia. El a haya castigo pisa pa esakinan. Fiscal a bisa cu e tabata pensa cu E.M.S. mester haya mas. Pero e ta tene cuenta cu E.M.S. a sigui Formacion Social voluntario cu exito. A haya certificado como bodyman pa auto.

Fiscal a exigi pa nan dos 84 ora di trabou pa comunidad y si no cumpli lo mester bay 45 dia sera.

   DEFENSA ABOGADO:

Abogado mr. Bryson a bisa Hues cu L.J.D. a splica kico a conduci pa nan a bay bati e homber. El a bisa Hues cu el a splica nan cu nan no por tuma ley den nan man. E abogado a bisa cu nan ta biba den un bario hopi fastioso caminda L.J.D. ta traha y bay school. El a bay sali pa su ruman homber chikito. E exigencia di Fiscal lo por ta bira dificil pa L.J.D. cumpli cun’e.

Pa loke ta trata E.M.S., e tabatin un comienso malo y pesey el a bay voluntario Formacion Social. E ta na cas ta traha riba su mes y no ta anda cu hendenan cu por hib’e den mal caminda.

    SENTENCIA:

Hues a sera tratamento di e caso y a dicta sentencia di biaha. Hues a bisa cu e ta haya legalmente y convicentemente proba cu E.M.S. y L.J.D. a maltrata e homber cu bate di baseball y pida tubo. Hues a tene cuenta cu e seriedad di e caso. El a bisa cu e dos armanan por a causa hopi daño.

Hues a hala atencion di e dos hombernan cu nan no mester tuma ley den man. El a remarca cu si tur hende cuminsa haci asina e lo bira un free for all na Aruba. Nada ta hustifica pa actua asina. Hues no ta haya e castigo exigi pa Fiscal halto. El a splica cu ta Reclasering ta bay check unda lo mester ayudo y segun e disponibilidad nan lo mester bay traha. El a confirma exigencia di Fiscal y a condena E.M.S. y L.J.D. na 84 ora di trabou pa comunidad. Si no cumpli e ora ey lo mester bay 45 dia sera.

 

- Advertisement -

DUNA COMENTARIO

Please enter your comment!
Please enter your name here