Home General Imelda Hof hunto cu AHATA a renoba Cas Marijke

Imelda Hof hunto cu AHATA a renoba Cas Marijke

69
0
SHARE
- Advertisement -

ORANJESTAD (AAN):  Na Stichting Kinderhuis Imelda Hof (SKI) tabata tin un rueda di prensa unda Natalia Hernandez, Director di Imelda Hof a duna di conoce cu a traha riba un proyecto pa renoba nan casnan y nan a wordo acerca door di Aruba Hotel & Tourism Association (AHATA) pa wak ki proyectonan tabata tin riba lista pa por traha riba dje.

Segun Hernandez, tabata tin diferente proyecto y hunto cu AHATA a dicidi pa renoba y drecha Cas Marijke cu tabata tin mester di wordo drecha pa motibo di scheurnan den muraya.

“Pa nos ta hopi importante pa e motibo cu nos ta traha hunto cu DAS, Directie Sociale Zaken, y tur otro organizacionnan riba un punto basico cu nos a cuminza cune cu ta e parti di e vision caminda cu nos kier traha riba e derechonan di mucha”, Natalia Hernandez a subraya.

E prome punto ta e parti unda cu kier brinda un lugar safe y amoroso pa e muchanan. E proyecto aki, a bisa, a drenta na bon momento pa por traha hunto y logra e meta.

Den e renobacion a yega na colornan bibo, cu ta hopi importante pa motibo cu ta colornan alegre y esey ta duna mas ambiente na e cas, den e camber unda e mucha ta drumi. E mucha por sinti su mes safe y e por biba contento.

Imelda Hof actualmente tin 42 mucha y den Cas Marijke tin 13 cu ta bibando eynden. Tin tres grupo cu ta keda 24/7 y tin un grupo cu ta brinda un guia durante dia (despues di scol) y despues di 5or nan ta bay cas bek, caminda cu mayornan ta keda responsable pa e muchanan.

Ademas di e proyecto aki, Imelda Hof tin mas necesidadnan manera camanan cu mester drecha, airco, entre otro, a indica. Tur esnan cu kier coopera ta bonbini, E ayudo por ta den placa, material, trabao boluntario, etc.

Esaki ta un proyecto cu Imelda Hof a logra hunto cu AHATA. Di parti di AHATA, Vanessa Rasmussen, Administratie Manager, a duna di conoce cu nan ta masha contento di por a inaugura Cas Marijke.

El a indica cu na Mei di e aña aki nan a acerca directora di SKI pa asina por wak kico tabata nan necesidad. Nan a haya sa di e scheurnan cu tabata tin rond di e cas, no solamente paden pero tambe pafo.

Den luna di Juli y Augustus a traha hopi duro riba dje. El a expresa palabranan di danki na Octavio Hoyos cu a yuda nan incansablemente pa haci e proyecto aki un realidad y na e team di Imelda Hof cu a duna hopi cooperacion y tabata tin hopi animo.

Rasmussen a subraya cu pa AHATA, nan enfoke ta turismo, seguridad, servicio y representacion pa nan miembronan, pero tambe pa comunidad.

Aworaki AHATA ta trahando riba nan strategia y nan presupuesto pa 2019 pa asina nan acerca otro instancia. Actualmente nan ta trahando pa un proyecto pa medio ambiente cu ta e
“coastal cleanup” cu lo tuma lugar October 27, Vanessa Rasmussen a duna di conoce.

 

- Advertisement -

DUNA COMENTARIO

Please enter your comment!
Please enter your name here