Home Cultura Intencion ta pa pone mas exposicion artistico na Community Museum

Intencion ta pa pone mas exposicion artistico na Community Museum

66
0
SHARE
- Advertisement -

Directora di Fundacion Museo Arubano

ORANJESTAD (AAN) – E director di Fundacion Museo Arubano,  Anky Vrolijk, den entrevista cu nos redaccion, a elabora tocante e apertura oficial di e Community Museum, na San Nicolas, cu a tuma lugar Diahuebs 27 di September, anochi.

Esaki ta un trayectoria cu a tuma hopi tempo, for di prome cu Vrolijk tabata directora, cu  Heronimo cu ta e curator, e persona responsable di e contenido di e museo tabata bezig cu e proyecto aki, entre otro, cu e ministerio anterior di cultura.

Vrolijk a expresa su alegria cu a yega na e producto final, y cu nan tin basta tempo preparando e restauracion di e edificio cu Fondo di Monumento pa despues sigui cu e aspecto di contenido.

Heronimo a acerca 30 artista unda por a mira obranan di seis artista cu nan diferente obheto. E dama a subraya cu por fin nan a habri porta di e museo aki na San Nicolas pa no solamente e comunidad di San Nicolas pero di Aruba completo por bishita y disfruta, siña y intercambia informacion, y cu den e parti dilanti tin un café cu e publico por haci uso di dje tur dia.

Anky Vrolijk a agrega cu intencion ta pa pone mas exposicion artistico. Awor a cuminza cu seis y poco, poco lo yene cu mas y despues ta bay rouleer. Kiermen, e museo aki constantemente lo ta diferente y tur hende por bishita.

El a subraya cu despues di un tempo lo por mira diferente exhibicion artistico di diferente otro artista Arubiano cu ta wak y ta perfila como San Nicolas den nan wowo y den nan perspectiva.

Pa bishitanan di scol of otro gruponan specifico, mester haci afspraak, depende di e grandura di e grupo, pa nan por haya un rondleiding di calidad, sra. Vrolijk a indica, manera tambe nan ta haci den e museonan na Oranjestad.

Nan tin un team dinamico pa duna tour di calidad segun edad di e grupo. Tambe ta pensando riba un museo di carnaval na San Nicolas, na Green Hill (ex-supermercado).

Mescos cu tur otro museo horario ta den siman di 9’or di mainta pa 6’or di atardi, y Diasabra di 10’or di mainta pa 2’or di atardi y entrada ta gratis durante e luna di October, pero for di entrante 1 di November ta cuminza cobra.

Vrolijk kier a stimula mayornan pa pasa bishita e museo cu nan yiunan e otro siman cu ta di vacacion, pa incentiva nan pa conoce un tiki mas di e historia di San Nicolas.

 

- Advertisement -

DUNA COMENTARIO

Please enter your comment!
Please enter your name here