Home General Lidernan di fraccion ta spera cu gobierno cumpli loke ta spera di...

Lidernan di fraccion ta spera cu gobierno cumpli loke ta spera di dje

7
0
SHARE
- Advertisement -

ORANJESTAD(AAN): Lider di fraccion di MEP, Rocco Tjon a comenta riba e comienzo di Aña Parlamentario Nobo.

E ta orguyoso pa e trabaonan cu e fraccion di MEP a eherce, apesar di a controla y na un manera pro activo percura pa plannan cu ta cumbini pueblo por worde cristalisa. Tambe entrega algun ley di iniciativa. E aña cu nos tin p’adilanti, lo bay sigui e mesun rumbo

Banda di esey, como fraccion a bisa cu lo bay enfoca hopi tambe riba aspectonan interno di Parlamento, por ehempel percura pa e reglement van orde worde modernisa, pa asina como organo parlamento tambe, por ta mas eficiente y pa percura pa e debatenan ta mas riba nivel y mas al caso tambe.

Loke ta hopi importante awor aki ta e manera con e supervision financiero lo worde continua. Manera ta conoci dentro di poco un ley lo mester worde presenta na Parlamento. Pa e fraccion di MEP ta hopi importante pa e no ta en pugna cu e staatsregeling y e statuto. Banda di esaki tambe riba e tereno di husticia, ta importante pa cuminsa wak e plannan worde cristalisa pa yega na un instituto coreccional nobo.

Esaki ta hopi importante no solamente pa husticia, pero tambe pa aspectonan social, pa asina un detenido reintegra na un manera exitoso. Algo importante tambe ta stimula nos economia. Atrabes di leynan di iniciativa, MEP lo purba di su banda pa purba stimula pa por redtape worde yuda pa asina e ta mas factibel pa por cuminsa un negoshi propio, etc na Aruba.

Di parti di partido POR, parlamentario Alan Howell a splica cu den apertura di aña di parlamento nobo, retonan grandi cu tin pa loke ta trata parlamento, tabata un aña caminda cu tabata tin un parlamento hopi critico, algo cu no tin costumber di mira tanto, pero loke ta importante pa tin un parlamento critico. Pasobra un parlamento critico por scrutina, por controla e gobierno como debe ser. Semper tin cu corda cu Parlamento ta e organo di mas halto. Parlamento tey pa controla gobierno.

Parlamentario Howell a splica tambe cu den e aña nobo di parlamento tin cu sigui refleha, mester sigui dedica pa percura cu gobierno cumpli cu e plan, percura pa gobierno cumpli caminda cu kier pa Aruba sigui bay p’adilanti. Hopi biaha kier papia di gobierno anterior. Pero esey no ta e cos di mas importante. Tin un gobierno nobo y awor aki tin cu percura pa e gobierno nobo aki cumpli cu lo mas posibel cu pueblo ta spera di dje.

Di parti di fraccion di RED, Parlamentario Ricardo Croes a comenta cu e aña parlamentario cu a caba di pasa, tabata un aña nobo p’e. Su experiencia entre otro, e discurso di e gobernador tabata algo hopi impresionante.

E tabata riba su punto. For di momento cu e gobernador a papia di e simbolo y colornan, te na e decadencia moral den nos pais di e hobennan cu a muri den un forma tragico, te cu e ultimo simannan cu a pasa, di e situacion financiero precario cu tur e proyectonan cu tin cu paga, tambe e añanan premira pa baha e deficit na 70%.

Tur esaki hunto a pone cu e dia di awe ta keda graba den su memoria y pa loke ta e aña parlamentario nobo, pa duna un ehempel den parlamento con ta kere cu cos mester bay, versus con cos tabata bayendo. Te awor aki e ta bayendo bon, segun parlamentario Croes.

Pa loke ta metanan, e prome aña parlamentario Parlamentario Croes a us’e como aña di observacion. E tabata basta keto, masha poco articulo a bay corant y masha poco entrevista entre otro cu prensa. Pa loke ta e di dos aña, ya e ta bin cu cambionan. E prome aña el a us’e pa e por a orienta su mes y pa el a siña, entre otro kico ta e trabao di parlamento, kico e ta precies, con ta haci’e.

Awor aki pa e di dos aña ya e ta mas duidelijk p’e mes. E no ta hinca su mes den tur e comisionnan fiho cu tin por ehempel. E ta bay ta mas bezig cu su comision di educacion y ta vice presidente di e comision di medio ambiente hunto cu sr. Alan Howell. Sigur pa loke ta iniciativa di ley, RED tin basta iniciativa cu tin den pipeline y den e di dos aña aki sigur sigur lo presenta algun di e iniciativanan di ley aki.

Pa loke ta legalisacion di Marihuana, parlamentario Croes a splica cu pais Aruba ta keda atras den varios cos. Corsou mes ta bulando nos dilanti. Pero e parti importante pa loke ta legalisacion di cannabis, no ta e hecho pa legalis’e.

Ta importante pa pueblo educa su mes kico esaki ta nifica entre otro riba nivel di beneficionan medico, riba nivel di beneficionan ecnomico y tambe riba nivel di beneficionan cu medio ambiente. E ora ey Croes ta sigur cu a base di e acuerdo di gobernacion cu tin, ta cuminsa cu e proceso di legalisacion, cu esaki tambe por desaroya den e aña cu ta bin.

 

- Advertisement -

DUNA COMENTARIO

Please enter your comment!
Please enter your name here