Home Deporte Lo tin tres wega di softball femenino e weekend aki

Lo tin tres wega di softball femenino e weekend aki

15
0
SHARE
- Advertisement -

ORANJESTAD (AAN) – E campeonato di softball femenino a continua den e fin di siman tras di lomba cu algun tremendo partido entre e tres equiponan cu ta participando y caminda Eagles a bay cas cu 2 victoria diabierna y Jaguars a perde double-header Diasabra.

Diabierna anochi den e prome encuentro e muchanan di Carmelita, esta Eagles SBT a dal e muchanan di Rubia Ras, esta Tanki Leendert Girls cu score di 4-1 cu bon pitcheo di Yee Mei Cheong y Mellizienne Richardson kendenan a permiti solamente 3 hit na e equipo TLG. Eagles a anota 2 careda den e prome entrada y 2 den e segundo inning mientras cu TLG a score den e  tercer entrada.

E pitcher ganador tabata Yee Mei Cheong mientras cu Shatienne Kock a perde. Aki nos mester menciona cu Mellizienne Richardson a tira 7 ponche den e tres inningnan cu ela lanza den relevo. E mihor bateadornan pa Eagles tabata Myah Thompson y Yee Mei Cheong, ambos di 3-2. Anchell Statie a bay di 1-1. Pa Tanki Leendert Giants tabata Frangeline Danies y Elianne Kock, ambos di 3-1. Zulaima Croes a bati di 1-1.

E dos wega a bira un free for all ora cu Eagles a logra habri nan hala riba e muchanan di Rayborne Didder y propina nan un sota di kita sombre cu score di 21-4. Jaguars a cuminsa brabo ora cu den bom di e prome entrada nan a score 4 careda despues cu Eagles a anota un careda den cabez di e prome inning.

Pero e “Aguilanan” a rabia y den un reaccion furioso nan a score 10 careda den e cabez di e di dos entrada. Tanto den e di dos como e tercer entrada despues e batenan a ser silencia y ningun di e equiponan a logra anota. Den cabez di e cuarto entrada Eagles un biaha mas a bin “por la goma” y nan a score 10 careda atrobe haciendo e partido na nan fabor cu score di 21-4.

E wega a termina tambe cu e score aki pa medio di un “black-out”. Eagles tabatin 14 hit contra 4 di Jaguars. E pitcher ganador tabata Anchell Statie mientras cu Kathleen Emerenciana-Koolman a perde. Anchell a ricibi relevo di Mellizienne Richardson kende un biaha mas tabata hermetico riba monticulo. E mihor bateadornan pa Eagles tabata Myah Thompson di 3-1, Keyla Cham di 4-2, Mellizienne Richardson di 4-4, Sharlanee Richardson di 2-2 y Yeseline de Kort di 3-2 y Xiorcaniyz Cargas di 2-1. Pa Jaguars tabata Cathleen Wester, Zuleika Penja, Nikkaela Jacobs y Raquel Wester, tur di 2-1.

Diasabra mainta riba e tereno di bala na Pos Chikito, e equipo Jaguars tabatin un doble compromiso. Den nan prome wega nan a topa cu Eagles SBT. Jaguars cu a perde e anochi prome cu score abulta, a bin pa drecha cuenta y saca clabo. Den e propio cabez di e prome entrada nan a score 3 careda. Pero Eagles a bolbe reacciona y nan a bolter e score di biaha anotando 8 careda. Jaguars no a keda atras y nan tambe a bolbe anota 1 careda den e segundo entrada. Nan pitcher a hala faha mara y no a permiti careda den e segundo ni den e tercer entrada.

Jaguars a logra 2 anotacion mas den e di cuatro inning pa haci e wega 8-6. Pero Eagles tabata decidido na defende nan victoria y a anota 2 careda mas pa caba cu e speranza di Jaguars pa finalmente gana e wega 10-6. Jaguars tabatin 8 hit contra 2 di Eagles pero asina mes a bay cas cu e derota.

E pitcher ganador tabata Yee Mei Cheong cu a combina cu Mellizienne Richardson pa nan a logra e victoria. E pitcher perdedor tabata Rachelle Henriquez.  E mihor bateadornan pa Eagles tabata Jennifer Martes di 1-1 y Mellizienne Richardson di 3-1. Pa Jaguars tabata Shakeena Croes y Iliandra Figaroa, ambos di 3-2. Zuleika Penja a bay di 2-2 mientras cu Millivienne Henriquez, Cathleen Wester y Rachelle Henriquez a bati di 3-1 cada uno.

E di dos wega diasabra a bay entre Jaguars y Tanki Leendert Giants SBT. Den un wega hopi pareu e muchanan di TLG a propina Jaguars un otro derota mandando nan cas cu score di 8-7. Jaguars tabatin 6 hit y Tanki Leendert 7, pitcher ganador a bay pa Elianne Kock mientras cu Kathleen Emerenciana a perde.

Shatienne Kock a haya un wega salba pa e out cu e la saca pa caba cu e wega. E mihor bateadornan pa Tanki Leendert tabata Elianne Kock di 2-2, Jennifer Chirino di 3-2 y Renata Maduro di 2-1. Pa Jaguars tabata Zuleika Penja di 3-3 y Nikkaela Jacobs di 3-2.

E campeonato aki ta sigui diabierna y diasabra na Pos Chikito. Diabierna ta cuminsa pa 6’or atardi cu e prome wega mientras cu di dos wega ta programa pa 7.45, un cuarto pa ocho di anochi.

Diasabra mainta pa 11’or lo tin un otro wega y pa 12.45 lo tin e ultimo wega di e fin di siman aki. Tur bon fanatico di softball ta keda cordialmente invita pa bin mira e weganan aki y apoya nos atletanan cu ta preparando pa e torneo internacional cu lo tuma lugar na final di oktober.

- Advertisement -

DUNA COMENTARIO

Please enter your comment!
Please enter your name here