Home Gobierno Minister Ruiz-Maduro a presenta e Manual di Monumento

Minister Ruiz-Maduro a presenta e Manual di Monumento

34
0
SHARE
- Advertisement -

ORANJESTAD (AAN) – Minister di Finanzas Economia y Cultura,  Xiomara Ruiz-Maduro, a participa den e conferencia di prensa, y a bin acompaña pa funcionarionan di Oficina di Monumento, como tambe pa director di un compania contratista.

Durante e conferencia di prensa e dignatario a presenta e manual di monumento, ademas a informa tocante e Fiesta di Cunuco, y na final tabata tin firmamento entre su persona, minister di turismo sr. Dangui Oduber, y un compania contratista cu lo restaura e edificio di Museo Arkeologico.

Minister Xiomara Ruiz-Maduro, den e contexto cu luna di September ta luna di Monumento, el a expresa cu e ta contento di por brinda e publico en general e Manual di Monumento na nos pais.

E manual aki ta bay bira conoci, cual trabaonan a cuminza durante e gestion di Minister Otmar Oduber na 2016, tempo cu ainda e tabata Minister di Turismo.

Den e manual tin e reglanan kico ta un monumento, cual ta e leynan aplicable y tambe un guia con pa trata e monumentonan, e permisonan cu tin mester ora tin renovacion, y un schema di color cu ta algo cu tambe ta conoci encuanto monumentonan cu nan tin colornan specifico.

E mandatario a expresa cu e ta contento cu nan por a keda cla pasobra ta importante pa por conserva nos herencia cultural di cual e monumentonan ta un parti tangible, cu nos por touch y bishita, y claramente nan mester di un trato special.

Oficina di Monumento tin e experticia cu ta concentra den e arkitectura y tur e detayenan cu mester tene cuenta cune. Tur esaki ta aparece den e contenido di e Manual di Monumento.

Den e website gobierno.aw por haya e formularionan pa pidi un permiso pa  monumento y tambe por pasa wak e manual den Oficina di Monumento.

Minister Ruiz-Maduro a expresa cu gobierno ta contento di por a yega asina leu, y el a acentua cu maneho di monumento ta importante pa conserva nos herencia cultural. E no ta un luho, pero un necesidad pa e formacion di e generacionnan nobo.

E dignatario a brinda un palabra di gratitud na su colega sr. Otmar Oduber cu a bin cu e iniciativa aki y tambe esnan di Oficina di Monumento y tur otro instancia cu a traha pa awe Aruba conoce un manual di Monumento, y bin cu e transparencia pa asina tur hende por yuda pa wak si nos casnan y edificionan por cay bao e proteccion y conservacion di monumentonan.

 

- Advertisement -

DUNA COMENTARIO

Please enter your comment!
Please enter your name here