Home General Momento a yega pa cuminza gara e Baronnan grandi di Droga

Momento a yega pa cuminza gara e Baronnan grandi di Droga

37
0
SHARE
- Advertisement -

ORANJESTAD (AAN): E ta un reclamo cu por tende bin ariba, na diferente pais!  Esta cu semper Polis y tambe Fiscalnan, Attorney Generals, etc., nan semper ta enfoca nan mes pa captura e traficantenan chikito di droga.

Claro, esey ta algo importante.  Pero tin di corda cu ta e Baronnan di Droga, esta e narcotraficantenan grandi ta esnan cu ta suministra droga na e bendedornan chikito.

E Baronnan di Droga mes hopi biaha ta keda pafo di spotlight, pasobra nan mes no ta subi caya pa bende.  E trabao ey nan ta laga na e dealernan chikito cu ta haci esey.

Sinembargo ta necesario y importante pa gara nan na nan garganta, pasobra nan ta hopi biaha activo den barionan di clase trahador, y resultado di esey ta cu ta mas probable cu hobennan ta bira adicto na droga, pasobra esaki ta pone cu nan ta disponible facilmente.

Actualmente mes den Prison di KIA na Aruba, tin un supuesto ‘turista Canades’ encarcela, sperando su caso bin dilanti na luna di November venidero.  Autoridad a bin haya sa, cu aunke e ta turista, e ta mustra di ta un Baron di Droga na Aruba.  E lo ta encarga pa import y export di droga, y tambe ta suministrando diferente rebendedor na Aruba cu productonan di cocaina, marihuana, y hasta ecstasy.  E speranza ta grandi cu ora cu e finaliza di sinta su castigo, cu Gobierno lo deporte y dune prohibicion di drenta Aruba bek.

Hecho ta cu hendenan cu ta adicto, semper lo trata di haya droga, y si acaso nan no tin e placa, na varios ocasion nan ta dicidi na recuri na delincuencia.  Pesey mes den varios area unda tin “Chollerhouse”, na e.o. Ponton, Piedra Plat, Pos Chikito, Shiribana, etc., tin hopi caso di ladronicia andando den areanan ey.

Aumento di delincuencia ta trece mucho mas problema pa autoridad y pa pueblo.  Ora cu Fiscal of Autoridad ta mik riba dealernan chikito di droga, Ministerio Publico simplemente kier mantene ordo.  Ta di spera cu Ministerio por compronde cu un enfoke asina unilateral riba e problema di droga, lo no soluciona e dolor di cabez di pueblo.

E Baronnan di Droga ta djis entrega e mercancia na e dealernan di caya.  Si acaso autoridad gara un bendedor di droga, ta djis un area local ta wordo afecta.  Si acaso nan gara un Baron grandi di Droga, e ora ta henter un red por wordo desmantela.

Kizas autoridadnan ta opina cu e dealernan chikito por produci e daño di mas gradi, pasobra nan ta esnan cu ta cana y move tur dia mey-mey di hendenan durante dia.  Hobennan cu kier haya placa rapidamente, siendo nan no tin nada di educacion of perspectiva, por cuminza mobiliza nan mes pa bende droga.

Pesey ta hopi importante pa tur pais, tur Gobierno, tur autoridad no bay traha djis na duna informacion na hobennan via di diferente canal, pero tambe crea oportunidadnan di empleo y mas posibilidad pa sigui estudio, yudando esnan cu di trempan ta kita di scol.

Tambe tin di bin suficiente entretenimento y chens di practica deporte den barionan, pa sostene hobennan, pa asina nan no djis keda para un banda y bira laf sin haci nada.  Pasobra ora cu nan bira laf, nan ta busca cos di haci, y bendemento di droga ta hopi lucrativo.  Actualmente ta hopi hoben tin riba e isla aki cu no ta trahando, pero ta genera placa tur siman via di bendemento di pakinan di marihuana di sea 5 Florin, 10 Florin, 15 Florin, y hasta 25 Florin.

Tin di corda cu e Baronnan grandi di Droga ta percura pa import/export di droga, sea scondi mey-mey di portanan bieu di baki pickup den container, of keto bay den bolita di rubber cu courriers (“narco-galiña”) ta guli pa asina viaha cu nan rumbo Europa of Merca.  Capturando Baronnan, bo por yuda stop tur esaki.

 

- Advertisement -

DUNA COMENTARIO

Please enter your comment!
Please enter your name here