Home Gobierno MOU entre Gobierno, Desarrollos Hotelco Development y Marriott Internacional a keda firma

MOU entre Gobierno, Desarrollos Hotelco Development y Marriott Internacional a keda firma

227
0
SHARE
- Advertisement -

Pa construccion di un hotel St. Regis:

ORANJESTAD (AAN) — Diamars mainta a tuma lugar den Ritz Carlton Hotel, e firmamento di MOU entre gobierno di Aruba, representa pa Minister Otmar Oduber, titular di Infrastructura, Medio Ambiente y Desaroyo Teritorial, Minister Dangui Oduber, titular di Turismo, Salud Publico y Deporte y Caledonia Properties NV, Desarollos Hotelco Development, representa pa su presidente Walter Stipa, y Marriott International Inc., representa pa Abogado Johan Sjien Fat.

E MOU ta relaciona cu un proyecto cu pa basta tempo tabata pendiente encuanto e construccion di un St. Regis Hotel na Aruba.

Minister Otmar Oduber a cuminza pa splica tocante e proyecto aki, den e conferencia di prensa, previo na firma e MOU.

E dignatario ta mira e momento aki como uno sumamente importante y di alegria grandi, despues cu e ultimo seis pa siete luna gobierno ta combersa y negocia, tambe pone na conocimento di funcionarionan di DIP, tocante un tereno cu tabata pertenece na Caledonia, situa banda di antes Concorde Hotel, awendia Hotel Riu.

Pa 20 aña of mas, e dignatario a indica, e tereno aki tabata pertenece na e grupo Starwoods, cu na cierto momento a wordo cumpra y adkiri pa e cadena Marriott.

Den e proceso aki a cuminza cu negociacionnan, den añanan anterior, pa por cambia e destinacion di e tereno aki, e tempo ey pa construi un hotel di cuater strea tipo time share, pa un cantidad di 380 camber.

Na momento cu gobierno actual a sinta y a cuminza inventariza e cantidad di cambernan unda un cantidad grandi di permisonan a wordo duna, e gobierno aki a minimiza esaki y na lugar di cantidad a opta pa crea mas calidad di loke nan ta atrae pa Aruba como destinacion.

E mandatario a expresa palabranan di elogio y gradicimento pa su colega sr. Dangui Oduber cu tambe ta para pa calidad di servicio y di Aruba su producto turistico, y esaki a bira tambe e guia basta fuerte cu tabata tin entre e conseheronan huridico di e tres diferente gruponan cu tabata sinta na mesa, esta: Gobierno, Desarrollos Hotelco como partner cu ta guia e proceso, y Marriott como doño di e tereno.

Minister Otmar Oduber a subraya cu despues di hopi combersacion, despues cu a yega na otro Gobierno di Aruba cu a pone dilanti su deseo pa e hotel cu ta bay wordo construi eynan ta minimo cinco strea.

Mirando cu e dos cadenanan Marriott y Star Wood e tempo ey a uni, exigencianan a bin di parti di gobierno pa haya e top cadena di hotel y bira partner di Ritz Carlton, cu ya caba nos tin na Aruba, cu ta e cadena di Sint Regis cu ta ocupa e nivel di mas halto di loke ta trata e portofolio cu a carga anteriormente, e famianan di Hilton y W Hotels, etc.

Asina a yega na un acuerdo tripartite cu Dialuna a keda firma entre sr. Walter Walter Stipa di Desarrollos Hotelco NV, Gobierno y Marriott Aruba.

E dignatario a señala cu sr. Stipa no ta un persona desconoci na Aruba, ken a pone riba pia un di e proyectonan principal cu nos tin den nos Isla, pa loke ta trata calidad.

E acuerdo ta stipula cu den e prome cuartal di aña 2019 por inicia e construccion di e resort, no di 380 camber pero di 222 camber di e calidad di St. Regis, aki na Aruba, cu ta un di e poconan den e area di Caribe.

Minister Otmar Oduber a gradici cu despues di e combersacionnan cu por tabata fuerte, pero unda Gobierno di Aruba y pueblo di Aruba a sali gana cu un producto di calidad haltisimo.

Tambe e dignatario a gradici sr. Stipa pa su interes deposita den nos Isla unda a desaroya un proyecto di e magnitud di Ritz Carlton, gobierno ta convenci cu e proyecto nobo di St. Regis tambe lo ta na un nivel hopi halto di calidad cu por atrae bishitantenan pa nos Isla.

- Advertisement -

DUNA COMENTARIO

Please enter your comment!
Please enter your name here