Home Suceso Mucha Arubiano di 8 aña a cay di piso y muri na...

Mucha Arubiano di 8 aña a cay di piso y muri na Miami

1104
0
SHARE
- Advertisement -

ORANJESTAD(AAN): Esnan cu Diahuebs atardi na Aruba tabata mira noticia via canalnan di TV di Miami, por a mira e informe di con un mucha a cay for di piso di mas halto di un edificio y fayece.

Noticia tristo a bati na porta di un famia Arubiano na Miami diahuebs atardi. Na un Penthouse na Biscayne Boulevard e vakantie di un famia a caba cu un dolor grandi. Nan yiu Justin Fernandes a cay for di un piso basta halto y fayece.

E hoben di 8 aña tabata hunto cu su ruman homber Colin di 6 aña. Nan tabata hunga y e mama a laga un porta habri, y un otro porta ta un “Roof Access Door”.  Roof Access Doors por wordo habri solamente door di personal di mantenimento, y ta prohibi pa pasa eynan.  E porta aki su lock tabata kibra.

E porta tabtin un borchi, pero e tabata chikito y na ingles.  Di e dak bay bek abao, bo mester por habri e porta, pero no pa robez.

Ora cu nan tabata riba e dak, el a mira abou y tabata tin manera un lona blauw grandi. Manera un dak di lona. Justin ta gusta cosnan extreme. Esey su tata a confirma na nos tambe durante un combersacion telefonico. Nan tabata cerca e mama cu ta biba den e Penthouse hunto cu su casa.

E tata a bay cu tres yiu Merca pa asina pasa vakantie. Diaranzon nan a bay y tabata preparando pa asina sali diahuebs atardi pa Orlando. El a bisa e tata cu e kier mira su mama prome cu nan sali pa Orlando pa vakantie. E mama cu ta bibando na Merca cu su casa, tambe tabata di bay hunto cu henter e famia. Kiermen e tata a bay cu su pareha cu su yiunan y e ex pareha cu ta casa tambe a bay hunto.

Henter e preparacion a caba den un tragedia pa henter e famia. No sa precies di cuanto piso Justin a cay. Ta worde menciona cu el a cay sea di tres of ocho piso. Ora cu e kier a bula, el a bisa e ruman Colin di 6 aña pa bula hunto cune. El a kere cu e lona blauw ta un style di Dino Jump. E ruman di 6 aña no a bula. El a keda ariba. Asina mes prome cu Justin a bula, el a bise pa “no worry nos no ta muri, ban bula”.

Justin su so a bula y su caida tabata mortal. A cuminsa un investigacion mesora di autoridad Mericano. Nan a traha cu Justin dunando reanimacion. Helicopter a bin y e tata Oldric Fernandes mes a bay abordo te Hospital mientras nan tabata traha cu su yiu. E tata ainda no por compronde kico a pasa. El a conta cu net e tabata cabando cu e booking di e hotel na Orlando pa asina nan sali cu auto y bay core. Nan a perde e muchanan for di bista djis un rato kizas pa cinco pa diez minuut. Y despues a resulta cu su yiu Justin a bula pensando cu e lo yega abou riba e dak manera un lona blauw. E tata no por caba di compronde kico por a pasa den cabez di su yiu Justin.

E rumannan Justin y Colin ta inseparable. “Mi bida a bay”, esey tabata palabranan di e tata. Famia tabata desespera na Miami cu e situacion aki. Television Mericano a haci full un reportahe riba e caso tristo aki for di prome momento. Polis tambe a duna un declaracion. A desea e tata hopi forsa cu e situacion cu a presenta.  Awor famia mester cuminsa haci preparacion pa trece Justin Fernandes Aruba. Justin algun siman pasa a representa Aruba na Bogota cu Go Karting unda el a haci un tremendo papel. E tata tabata pushe hopi den e deporte di Karting. Den e prome siman di October tabata haciendo preparacion pa asina Justin core atrobe den caredanan na Bogota.

Na famia di Justin, DIARIO ta expresa su mas profundo palabra di condolencia.

Forsa na e famia y cu Justin sosega na paz.

 

- Advertisement -

DUNA COMENTARIO

Please enter your comment!
Please enter your name here