Home Policial Na Venezuela awor hasta Estatua nan ta horta

Na Venezuela awor hasta Estatua nan ta horta

744
0
SHARE
— Esaki so a resta di e estatua riba e Plaza.
- Advertisement -

ORANJESTAD (AAN): Seis persona ta deteni pa un siman caba na ciudad di Coro na Venezuela, pasobra nan parce di ta envolvi den e hortamento di e estatua di José Leonardo Chirino.  E hortamento mes a tuma lugar dia 9 di Septeber riba Plaza Chirino cu ta den sector La Toma di Caujarao, na municipio Miranda di estado Falcon.

Polis mes no a cuminza investiga e hortamento mesora.  Te ora cu un website a publica e ladronicia dia 17 di September, e ora numa nan a cuminza investiga te cu nan a detene.

Lamentablemente nan no por a recupera e estatua mas, como cu el a wordo desmantela di otro y gesmelt e mesun dia di e ladronicia, pero si pidanan di dje a wordo haya den pueblo di La Negrita cu ta como 12 kilometer di Coro.  E area aki a bira un lugar yena cu vehiculonan horta, como tambe centro di tur tipo di crimen.

Esnan cu a wordo aresta ta forma parti di un gang di delincuente cu ta dedica na hortamento di koper y brons, sea di obranan di arte como tambe kabelnan, tubo, y otro obhetonan.  Nan ta wordo procesa pa e delito di horta di material strategico.

Nan a confesa cu ora nan a transporta e standbeeld, nan a bay cune den un Ford Maverick di cual nan a kita e stulnan patras.  Awor Polis ta buscando e auto aki, como tambe dos miembro di e gang cu ainda no a wordo captura.

No ta descarta e posibilidad cu algun oficial di Polis tambe ta envolvi den e ladronicia aki.  Pero hecho ta cu e gang ta wordo desmantela e momento aki.

BRONS TRANSPORTA PA ARUBA Y CURAÇAO

E fuente a bisa cu e destino final di e brons horta ta islanan di Aruba y Curaçao, unda e material aki ta wordo cumpra pa Dollars na forma clandestino.  Pesey mes desde Januari 2017, autoridadnan di Antiyas y Aruba a prohibi cumpramento di koper y brons no-certifica.

E estatua a wordo diseña pa e artista Henry Curiel di Falcon.  El a wordo horta den oranan di madruga, despues cu nan a corte cu un hacksaw na e ankelnan.

E standbeeld aki tabata riba e Plaza desde 1996, ora el a wordo poni como un tributo na e persona cu a lidera e prome protesta di e esclavonan contra corona Spaño na e Hacienda Macanillas, cu ta situa den sierra di Coro na 1795.

- Advertisement -

DUNA COMENTARIO

Please enter your comment!
Please enter your name here