Home Comentario Negoshi di Gobierno versus Negoshi Priva

Negoshi di Gobierno versus Negoshi Priva

12
0
SHARE
- Advertisement -
Nacionalisacion ta e proceso cu Venezuela a aplica y a haci cu awe un Presidente ta dicidi kico ta pasa cu economia di su pais. Privatisacion ta e formula cu Aruba a conoce pa transforma servicionan di Gobierno den empresa estatal. E pensamento basico ta contra e concepto di un mercado habri. Mas y mas ciudadano ta puntra nan mes si no mester privatisa Companianan di Gobierno completamente pa miho resultado.

ORANJESTAD (AAN): Pa mayoria di pueblo hopi bes ta dificil comprende, kico politiconan ta haci na su nomber. Tampoco ta facil dicidi si loke politiconan ta bisa cu nan ta haci na nomber di pueblo pa bienestar di pueblo ta berdad.

Actualmente companianan di estado ta confronta duda den nan legitimidad como empresa liber pa busca loke ta miho pa pueblo y no pa e politiconan na mando. DIARIO a haci un investigacion.

EMPRESA PRIVA, ESTATAL OF JOINT VENTURE

Negoshi ta e alma di un nacion y ta dicidi con bida di e ciudadano y bienestar di un pais ta.

Na paisnan democratico ta biba e idea cu si companianan ta den man di Gobierno, pueblo ta doño di e compania cu tur beneficio envolvi.

Den teoria tur ciudadano ta doño di un compania di estado. Tur placa cu drenta ta di e pais cu ta inverti den e compania of ta pone e placa den lachi di Gobierno. Politiconan den Gobierno ta dicidi kende e ta nombra pa dirigi e compania i representa e pais den Hunta di Comisario.

Un compania priva ta propiedad di un persona of un grupo di persona cu ta uni den un negoshi.

E doñonan ta ricibi tur entrada y ta dicidi kico nan ta haci cu nan placa. Si nan tin perdida of ganashi, nan mes mester mira con nan ta sigui.

Na un compania priva ta e doñonan ta nombra director y comisarionan. Segun normanan democratico cu ta pone responsabilidad personal na prome luga den man di cada ciudadano, e empresa priva ta cumpli cu democracia.

Gobierno y ciudadanonan por yega na “joint ventures” cu ta empresa den cual Gobierno y empresa priva tin interes.

VENEZUELA:   PELIGER DI COMPANIA DI ESTADO

Dia Prome di Januari 1976 e gobierno di Carlos Andres Perez a nacionalisa petroleo na Venezuela. For di e momento Petroleos de Venezuela Sociedad Anonima (PDVSA) a haya e derechonan pa explora y di explotacion di e reservanan di petroleo na e pais.

Durante presidencia di Rafael Caldera empresanan internacional a haya derecho pa como socio minoritario, participa den proyectonan na e Faja de Orinoco debi na caida di preis.
Exxon Mobil y Conoco Philips a hala atras ora na 2000 despues cu preis di petroleo a subi, Chavez a dicidi pa empresa mixta so na Orinoco.

Aki ta bin dilanti con petroleo cu ta carga economia di Venezuela y ta afecta henter mundo pa medio di nacionalisacion, ta depende di e presidente di turno na e pais.

Den man di Nicolas Maduro PDVSA a cay completamente como e gigante cu e tabata y pueblo di un di e paisnan mas rico na mundo a bira un pueblo pober di refugiado.
E ehempel di Venezuela ta demostra cu no necesariamente un compania di estado ta sirbi interes di e pueblo.

ARUBA:  COMPANIA DI GOBIERNO NO TA PRIVA

Segun teoria Companianan di Gobierno di Aruba, ta priva. Varios di nan tabata departamentonan y servicionan di Gobierno cu a bira compania pasobra kier a kita e aspecto politico. Den practica no por papia di companianan priva.

Como entidad legal nan ta cumpli cu e termino di “compania priva”. Den practica ta politiconan, mas bien partidonan na mando, ta dicidi ken ta dirigi y ta funciona como Hunta di Comisario di e companianan, cu ta cay bou responsabilidad politico.

Motibonan di privatisacion tampoco ta tur momento realisa den e companianan aki. Politica tin su forma pa atende cu asunto di personal y maneho di e compania cu ta propiedad di pueblo. Si tin problema financiero, politica ta resolve a base di sistemanan cu hopi bes no ta aceptabel den sector priva.

No tin competencia cu e companianan di Gobierno. Compania priva mester haci ganashi pa sobrevivi y sigui haci ganashi pa por inverti. Compania di Gobierno por conta cu asistencia pa medio di fondonan di pueblo y poco bes ta atende realmente cu mal maneho cu ta afecta e compania.

Pa garantisa miho servicio, funcionamento y resultado mester privatisa Compania di Gobierno na forma total? Mester laga companianan priva cu contractonan special dirigi empresanan estatal na Aruba?

DIARIO ta habri e discusion den un tempo di crisis, cu no ta permiti pa subsidia companianan di estado cu no ta funciona optimalmente y no ta duna resultado.

- Advertisement -

DUNA COMENTARIO

Please enter your comment!
Please enter your name here