ORANJESTAD (AAN) – For di Juli, campaña “No Sconde Mas” ta den medionan di comunicacion cu e meta di concientiza pa preveni abuso di mucha. Dos siman pasa, e prome charla informativo a tuma lugar na Teresita Center na San Nicolaas.
Diaranson, 5 di September, lo continua cu e di dos charla cu oradornan specialisa riba e materia. E biaha aki e charla lo tuma lugar na Centro di Bario Noord, for di 7’or pa 9’or di anochi. Entrada ta completamente gratis y lo tin oportunidad pa haci pregunta y comparti cualkier comentario cu esnan presente.
E dos oradornan cu lo t’ey presente pa comparti nan informacion, ta Sra. Trudy Hassell y Sra. Janine Rodriguez. Mester remarca cu e di prome charla na San Nicolaas tabata bon bishita y esnan presente a keda sumamente contento cu e informacion y tambe e tips presenta, con pa yuda den caso cu constata cu tin abuso tumando lugar.
Mescos cu tur mucha tin derecho riba un nomber, nacionalidad, educacion y hopi otro derecho mas, un di e derechonan sumamente importante ta e derecho riba proteccion. Tur e derechonan di mucha ta ancra den un tratado di cua Aruba tambe ta forma parti di dje. Kiwanis Club of Aruba y Cruz Cora Aruba ta dos organisacion cu nan mesun identidad pero un di nan metanan principal ta pa yuda nos comunidad a base di un concepto voluntario. Na e momento aki tur dos organisacion ta pidi ayudo bek di e comunidad dor di sostene nan campaña contra varios tipo di abuso, mas tanto abuso di mucha: abuso sexual, abuso verbal y abuso fisico.
Fechanan di e proximo charlanan:
– 18 di september: Centro di Bario Brazil
– 16 di oktober: Centro di Bario Playa Pabou
– 30 di oktober: Piedra Plat Entertainment Center
– 20 di november: Cruz Cora Aruba
Ban sostene hunto tur esnan cu ta vulnerabel den nos comunidad y cu no tin voz of sosten optimal. Atende un charla, pa hunto nos yuda! NO SCONDE MAS!
