Home Parlamento Parlamentarionan Tjon y Tevreden a entrega concepto di ley pa obligacion di...

Parlamentarionan Tjon y Tevreden a entrega concepto di ley pa obligacion di identificacion

41
0
SHARE
- Advertisement -

ORANJESTAD (AAN): Dialuna atardi trempan parlamentarionan Hendrik Tevreden y Rocco Tjon a entrega na presidente di Parlamento Ady Thijsen un concepto di ley pa obligacion di identificacion, e asina yama ‘Landsverordening Identificatieplicht’.

“Como presidente di Parlamento mi ta hopi contento cu esaki”.

“E ta mustra con e parlamentarionan ta trahando duro pa cumpli cu bienestar di pueblo”.

“Den e caso aki e ta un ley hopi importante pa nos”, segun Thijsen.

Durante un conferencia di prensa den oficina di Thijsen, parlamentario Tjon a splica cu pa basta tempo caba el a trece dilanti cu na Aruba falta un tipo di ley asina, cu lo brinda tur esnan cu ta traha den husticia un instrumento pa por combati criminalidad na un manera mas eficiente y eficaz.

“Prome cu nos a yega na e producto final aki nos a sinta cu diferente stakeholder, pa haya sa di nan tambe con nan ta wak e ley aki”.

“Entre otro nos a sinta cu Ordo di Abogado y cu Alto Mando di Cuerpo Policial y tur nan idea y preocupacionnan nos a incorpora den e ley aki”.

Esaki segun Tjon, kende a bisa cu e ley aki ta existi por ehempel na Hulanda caba for di comienzo di añanan 90.

Constantemente Hulanda desde e tempo ey a sigui adapta e ley.

E parlamentario di MEP a sigui bisa cu den e iniciativa di ley aki a tene cuenta tambe cu e aspecto di privacidad.

“Esaki no ta nifica cu ora cu e ley drenta na vigor, sin mas un agente policial of otro asina yama ‘opsporingsambetaar’ por puntrabo pa bo identifica bo mes”.

“E mester por argumenta e motibo dicon e kier pa bo mustre bo identificacion”.

Esaki segun Tjon, kende a indica cu tur empleado cu por hasi uso di e ley aki ta bay haya un opleiding riba esaki.

El a sigui bisa cu semper tin un procedura, unda cu despues di tanto tempo e ley lo wordo evalua, pa wak si e meta di introduccion di e ley ta esun corecto.

Na Hulanda tur evaluacion a mustra cu introduccion di e ley aki a percura pa criminalidad wordo combati na un manera mas eficiente.

DIARIO a puntra Tjon pa duna un ehempel di ora cu un polis por ehempel no por uza e ley aki pa pidi un persona pa identifica su mes.

E parlamentario a indica cu si un persona no ta un sospechoso, bo no por puntra un persona pa identifica su mes.

“Un polis of opsporingsambtenaar mester tin un motibo valido si, pa puntrabo pa identifica bo mes”.

“E ta un instrumento cu tin su balor agrega y pesey mester percura pa tin e procesonan na nan lugar, pa uso di e instrumento aki ta uno valido”.

Esaki segun e parlamentario, kende a sigui bisa cu den e ley tin consecuencianan mara na si bo no por identifica bo mes.

E parti importante segun Tjon ta cu e polis por ehempel tin un base valido pa hasi su investigacion pa yega na bo identidad.

Ora cu un persona wordo pidi pa identifica su mes y e no tin documento of carchi di identificacion riba dje, e ta bay tin 6 ora pa identifica su mes y esaki por wordo extendi cu 6 ora mas.

Tjon a sigui bisa cu importante ta cu ora cu e ley aki drenta na vigor, e solo hecho cu e ley ta existi, ta traha na un manera preventivo.

 

- Advertisement -

DUNA COMENTARIO

Please enter your comment!
Please enter your name here