Home General Piscina Olimpico na Savaneta a ricibi un facelift completo

Piscina Olimpico na Savaneta a ricibi un facelift completo

13
0
SHARE
- Advertisement -

Danki na 1.3 miyon di Lotto:

ORANJESTAD(AAN): E proyecto di Piscina Olimpico na Savaneta ta un inversion hopi grandi. Segun Jerry Franca, ex presidente di e directiva di piscina olimpico di Savaneta y di San Nicolas, a conta cu na 2013, a haci cierto estudio cu mester a wordo haci, tambe algun ahuste, tanto den personal como den mehoramento di e piscina.

Na e momento ey no tabata tin e placa. Despues, na 2015 a acerca WEB pa haci un estudio di e calidad di awa di e piscina y nan a traha un rapport, caminda cu a mustra claramente cu berdad cu e luga tin cu wordo mehora. E motornan cu tabata tin pa e pompnan, no tabata suficientemente capacidad, ya cu nan tempo a pasa.

Tabata dos motor di 35hp. Di acuerdo cu esey, directiva a acerca minister y a acerca Lotto pa Deporte y FFD, caminda cu a bin un suma disponibel via di Fundacion Facilidadnan Deportivo, pa por renoba e piscina, tambe e parti di e pomphuis cu mester a wordo cambia.

Segun Franca, ya e pompnan ey a yega nan periodo. E ora a saca e besteknan. A bin un destaho publico via notaris Yarzagaray. A saca esun capacita pa a haci e trabao y cu a cumpli e rekisitonan estableci. A bin haya e compania Crystal Pool pa bin haci e trabao. Nan a renoba e piscina completo, di acuerdo cu e exigencianan estableci.

Nan a pone enbes di dos motor di 35hp, nan a cambi’e pa tres motor di 20 hp cu tin e mesun capacidad di fluho di awa cada un, mescos cu uno di 35. E ta cumbini, pasobra ta bay gasta menos coriente. Tambe cu e ta computarisa.

E motornan aki ta traha hunto. Nan por traha tres pareu of un constantemente, ora cu no tin hende den pool. Na momento cu tin hopi movimento ta haya dos ta cende, of ta switch uno of uno ta paga, e otro ta cende. Constantemente nan ta keda pomp. Tin motornan paga mientras e otro ta cende.

Tambe e parti di e acido muriatico y tambe e suministro ta computarisa. Di acuerdo cu e calidad di awa, e ta tuma duna su dosis na e awa constantemente durante dia.

Asina bo ta haya cu berdad tin cu mantene y e ta yuda mantene e calidad di awa al dia. Ademas di esey a haya suficiente fondo pa por verf e luga. El a wordo geverf completamente. Tambe el a wordo drecha, pa loke ta mantencion di e hekwerk, di e portanan cu mester a wordo cambia.

Tabata varios porta cu a cambia y tambe mehora. Tabata un trabao basta grandi riba e area ey. Fuera di e verfmento paden y pafo, e lockernan tambe mester a wordo drecha. Tambe rond di e pool a pone antislip. Tabata tin un rubber, pero e rubber tabata causa problema pasobra bao di dje tabata para awa y tabata crea un tipo di mold (bacteria etc.) Esey tambe a wordo cambia.

Tambe a percura pa e luznan wordo mehora. E calidad di luz a wordo cambia. A zorg tambe pa e seguro pa e piscina. Anteriormente no tabata tin seguro. E ora a percura pa tin un seguro di accidente, etc. pa cumpli cu loke zwembond tabata exigi pa e campeonatonan cu tabata tin.

Esakinan ta tur e trabaonan. Na momento cu e directiva a baha, a entrega e trabaonan aki cla na e directiva nobo. Franca mes a sinta cu nan tambe. Nan tabata tin algun pregunta, cual a yuda nan contesta nan, pa di e forma aki lo bay tin un miho traspaso den un forma mas transparente posibel, pa nan por haci un trabao excelente. Franca a pone su mes disposicion pa cualkier pregunta cu nan por tin den futuro pa yuda nan riba dje.

Drecha no ta tur cos. Manten’e y want’e na bida ta conta. Segun Jerry Franca, normalmente gobierno ta cubri exploitatie, esta e gastonan di salario, awa, luz, telefon, etc. Tambe e parti di mantencion di e luga, nan tin cu percura pa esaki keda al dia.

E entradanan si ta hopi schaars, pasobra esey ta algo normal na Aruba y cualkier parti di mundo, cu stadionnan, facilidadnan no ta produci suficiente placa pa nan propio mantencion. Pero esey tin cu tene cuidao cun’e.

Berdad e piscina a keda cla, pero tambe tabata tin e proyecto di San Nicolas, cu ainda mester atencion, pasobra tin hopi trabao pa wordo haci ariba, cual tabata den plan pa haci despues cu a caba eynan. Awor tin un directiva nobo pa caba cu e trabao eynan.

Realmente di fondo, e entradanan cu e ta produci pa landamento, no ta cubri tur e gastonan. Mester haci mas actividadnan social creativo, vooral na esun di San Nicolas cu tin e posibilidad, cu ta brinda e posibilidad eynan. Actividadnan di mercadeo cu tin cu haci normalmente pa bende e facilidad y bende e posibilidad pa haya ingreso extra.

Pero ta dificilmente pa yega na e presupuesto pa cubri e gastonan di mantencion di e facilidadnan.

Lotto semper tabata tin un rol importante den e localidad. Segun Franca, Lotto ta esun cu a pone e placa disponibel pa renobacion di e luga. Mas of menos e ta rond di 1.3 miyon florin cu nan a pone disponibel pa cubri e gastonan. Pa por drecha tur e pompnan, pa drecha e luga, pa verf, nan a pone e suma ey disponibel.

Tambe mester a cambia e scoreboard. Den parti esaki a wordo paga door di FINA, un parti a wordo paga door di e piscina mes y un parti a wordo paga pa Lotto. Entre nan tres a pag’e cu tabata un suma bastante representativo, segun Jerry Franca.

 

- Advertisement -

DUNA COMENTARIO

Please enter your comment!
Please enter your name here