Home Gobierno Por lo pronto prijs di awa y coriente no ta conoce ni...

Por lo pronto prijs di awa y coriente no ta conoce ni aumento ni reduccion

176
0
SHARE
- Advertisement -

Prome Minister Wever-Croes:

ORANJESTAD (AAN) – Dialuna a tuma lugar e conferencia semanal di prensa di gobierno, cu presencia di Prome Minister mr. Evelyn Wever-Croes y Minister di Husticia mr. Andin Bikker.

Prijs pa consumo di awa y coriente, Asilo Politico y bishita di IMF relaciona cu e proyecto di reforma Fiscal, ta e tres temanan cu e dignatario a toca den e conferencia di prensa aki.

E mandatario a cuminza cu e tema di prijs pa consumo di awa y coriente cu ta un tema cu ta genera pregunta den varios di e conferencianan di prensa cu gobierno y Dialuna, no tabata otro.

A base di e preocupacion cu tin den pueblo cu tambe ta yega cerca gobierno y opinion di e sindicato SIWA cu ta bay den direccion di un aumento di prijs pa consumo di awa y coriente, e dignatario a bolbe trece e punto aki dilanti bisando cu pa aworaki e prijs ta stabil, pues lo no subi y lo no baha na e momentonan aki.

Prome Minister a wordo informa cu e esfuerzonan cu a wordo haci te aworaki, lo conduci cu e prijs no mester subi contrario na speculacionnan cu tabata tin, y tambe cu e prijs di crudo ta subiendo y cu ta bay sigui den e direccion di aumento, y teniendo na cuenta e tema di ASTEC.

E mandatario a splica cu e prijs a wordo contene y no mester subi, y e kier comparti esaki cu comunidad, cu pa e siguiente lunanan e situacion ta sigui bao di control sin cu mester aumenta e tarifanan di awa y electricidad.

Minister Presidente ta spera cu esaki ta trece trankilidad den e comunidad. “E no ta facil, nos no a caba di atende cu e problema ainda, nos no por duna un garantia cu e no ta bay subi nunca mas of ki dia exactamente ta baha. Nos ta atendiendo cu e retonan cu tin y pa aworaki y pa e siguiente lunanan, en todo caso, nos no tin e preocupacion y lo sigui lucha pa e momento yega cu nos baha e prijs di awa y coriente considerablemente”, Minister Presidente Wever-Croes a acentua.

ASTEC:

E dignatario, den e mesun contexto aki, a informa cu e huma dañino cu tabata afectando e trahadornan na waf di Barcadera, esnan di ASTEC y Douane y di e trucknan chikito.

“Mi por bisa cu nos a tuma e decision como gobierno, pa bay over na uza e HFO mas limpi, cu tin 1.5% sulfur, y esaki ta den e tankinan caba y por sinti e efectonan caba. Den e midimento cu ta wordo haci alrededor di e area no ta haya e efectonan di e sulfur”, e dignatario a subraya.

Gobierno ta spera cu tur e contratemponan cu tabata tin por keda soluciona, pero en todo caso, e huma di WEB no ta causando daño mas na Astec.

- Advertisement -

DUNA COMENTARIO

Please enter your comment!
Please enter your name here