Home General Prome Minister President di Curaçao mas cerca di prizon

Prome Minister President di Curaçao mas cerca di prizon

353
0
SHARE
- Advertisement -

Veredicto di Corte Supremo di Reino ta dicidi riba futuro

*Considera politico mas controversial den historia di e pais

ORANJESTAD (AAN) — Diamars Curaçao a ricibi indicacion di loke ta pasa den Hoge Raad na Hulanda. Informacion a drenta cu Abogado General di e Parket di Hoge Raad a pidi pa e Conseho cu por considera como Corte Supremo den Reino Hulandes, no bay di acuerdo cu e peticion di Gerrit Schotte pa bolbe habri tratamento di su caso.

Di e forma aki e posibilidad cu e politico mester cumpli cu un castigo di prizon a yega mas cerca. Mientras mas miembro di e prome Gobierno di pais Curaçao ta persigui ainda pa husticia, Gerrit Schotte ta considera e politico mas controversial cu historia di Curaçao a conoce.

Gerrit Schotte a nace na 1974 na Curaçao. E mester a bandona school a base di accion fraudulento di tentamen. Diripiente e tabata den mundo politico y a bira Diputado pa MAN. Su aparencia y expresionnan a facilita su acogida cerca hobennan.

Loke tabata tin tras di e politico, no a bin dilanti.  Tabata tin veredictonan contra su persona relaciona cu mal uzo di credit. El a ser acusa di a causa un accidente fatal y di fraude cu seguro.

Schotte, cu hasta a ser acusa di a bende auto di otro hende a bira Diputado di Turismo y Economia na 2006.

MOVEMENTU

FUTURO KORSOU:

INICIO DI UN ERA

DESCONOCI 

Ora cambionan di Futuro Estatal di Curaçao a bira evidente,  Gerrit Schotte a funda su partido Movementu Futuro Korsou (MFK).  Lo a dura un par di aña prome cu na Curaçao preguntanan lo a nace ken y kico tabata tin tras di e partido.

Corto tempo prome cu Curaçao a bay eleccion pa dicidi riba gobernacion di e pais nobo, MFK a bira realidad. Schotte no a gana eleccion pero a logra forma un coalicion pa e bira e prome Minister Presidente di e pais.

Fiesta grandi tabata tin rond di e politico hoben cu proyecto pa WIFI bira realidad tur caminda na Curaçao.  WIFI lo a bira un di e palabranan mas uza den Corte ora casonan penal a start contra e Minister Presidente.

Su conexionnan cu segun casonan den Corte tabata progresa a bira origen di hopi pregunta, tabata entre otro catochero Robby dos Santos, ruman di Minister di Financia den Gabinete Schotte y e Italiano Coralho cu den Corte, Gerrit Schotte lo a admiti di ta su gran amigo.

E ex Minister Presidente di Curaçao a yama su mes consehero di Coralho.

ABUNDANCIA

MASACRA

Y ASESINATO

POLITICO

Reino Hulandes a coopera cu Curaçao y entrada di e pais den su Status Aparte. A sanea e debe na exterior cu 1.5 Miyon y e pais a haya oportunidad pa crea un futuro cu abundancia.  Di otro banda, tabata tin palabracionnan firme pa evita corupcion. Ora Gerrit Schotte a bira Minister Presidente e palabracionnan a stop di existi.

Informacion a mira luz cu Gerrit Schotte lo tabata trata di habri un luga pa Coralho den Banco Central di Curaçao y St. Maarten.

Hulanda y Ministerio Publico a bira dos instancia cu siguidonan di Schotte y su gruponan tabata pinta como actor principal di accionnan contra Gobierno Schotte.

Servicio di Siguridad (Veiligheidsdienst) di Curaçao a conoce cambio di gerencia y denuncia cu informacion secreto tabata sali, a bin dilanti mescos cu posibilidad di corupcion enorme.

E Ley di Screening no a pasa ora Schotte a asumi poder. Si e Ley tabata na vigor manera planea, e lo no por a sinta como Minister Presidente.

Dos aña despues cu Gerrit Schotte a tuma mando di e pais, Reino Hulanda a introduci un aanwijzing pasobra e presupuesto no tabata cera.

Caos a surgi ora dos Miembro di Parlamento a retira sosten na Gabinete Schotte y Gobernador a introduci un Gobierno Interno. Schotte a dicidi di ocupa Fort Amsterdam.

A  bin eleccion nobo cu Helmin Wiels di Pueblo Soberano ta gana. Un Gobierno nobo ta mira luz. Mundo politico di Curacao a keda den shock ora dia 5 di Mei 2013, 5 or di atardi, nan a asesina Wiels den pleno publico.

SCHOTTE

Y MFK

DEN LUZ DI

HUSTICIA 

Varios exponente di e partido MFK ta den man di Husticia. Ex Minister di Salud Publico Jacintha Constancia a ser sentencia dor di Hues pa malversacion. Ex Minister di Financia Jorge Jamaloodin ta den aresto di Interpol na Valencia, Venezuela,  acusa di a participa den e caso Biento pero tambe considera di por tin relacion cu morto di Wiels.

Gerrit Schotte for di 2015 ta den man di Husticia y a ser sentencia dor di Corte di Husticia pa corupcion administrativo,  labamento di placa, falsificacion di documento, uzo di frequency jammers cu ta stroba comunicacion.

Dia 10 di maart 2016 Corte den Prome Instancia a haya Schotte culpabel y a condene na castigo di tres aña den prizon. Ademas el a perde uzo di su derecho pa participa activamente na politica durante cinco aña.

Debi na e hecho cu el a apela su caso, el a participa na eleccion 2016, cu el a perde. MAN a forma un Gobierno nobo cu pa medio di accionnan di e Grupo Schotte a ser baha. Ora e Gabinete Interino di Pisas a sinta, e grupo di Schotte a stop eleccion y pueblo y Reino mester a actua pa deshaci di e Gobierno Interino y nan decision pa stop e proceso democratico.

Corte di Husticia a confirma aña pasa culpabilidad di Schotte, cu a bay Cassatie,  loke ta nifica cu Hoge Raad ta check e proceso den Corte.

Si Hoge Raad dicidi cu Schotte ta culpabel, e prome Minister Presidente di Curaçao y actual Miembro di Parlamento lo bay prizon.  Pago di 1.8 Miyon Florin Antiano manera Corte di Husticia a dicidi tambe e siman aki, ta un sentencia contra Schotte, cu ta ocupa un luga unico den historia politico di Curaçao.

- Advertisement -

DUNA COMENTARIO

Please enter your comment!
Please enter your name here