Home General Pueblo tin di keda corda cu tin di stop cu abuso y...

Pueblo tin di keda corda cu tin di stop cu abuso y maltrato severo

18
0
SHARE
- Advertisement -

ORANJESTAD(AAN): Diahuebs nochi a tuma luga culminacion pa loke ta trata algun siman di concientisacion riba e sistema di abuso cu tin na Aruba y mundialmente, esta di violencia domestico y abuso di mucha.

E evento aki a tuma luga banda di lagoen, dilanti di cas di gobernador, caminda cu varios personahe clave den comunidad, entre otro prome minister, Evelyn Wever-Croes, minister di asuntonan social y labor, Glenbert Croes, y mas personahe, por a bin duna un discurso di desaprobacion pa loke ta trata e fenomeno aki cu ta creciendo na Aruba, esta violencia domestico.

Segun Magali Maduro, coordinadora di Fundacion pa Hende Muhe den Dificultad, nos por a mira den e ultimo lunanan aki tabata tin varios caso di maltrato severo cu a yega te na morto. Por corda aña pasa tabata tin e dama na de Vuyst, cu brutalmente a worde mata. Tambe tin e dos criaturanan, cu tambe a worde mata na un manera hopi cruel. Violencia domestico tambe a hunga un rol den e casonan aki.

E aña aki pueblo a expresa nan mes disgusta cu loke a pasa e.o. cu Anushka Tromp (q.e.p.d.). Tambe di e pareha di un agente policial cu a worde maltrata. Tambe tin e caso sin sentido di Ski, cu a worde mata na un manera hopi violento.

Pesey mes a haya ta necesario pa tene algun dia di accion pa Aruba, manifesta cu nos no kier biba den un Aruba violento asina.

A pone banner pa asina hende cu hende por pone un cinta biña of un peluche pa recorda un persona cu por ta den un circunstancia asina.

Durante e evento tabata tin discursonan den comunidad. Por ta hendenan cu kisas nunca a tende di nan, pero a bin pa bisa cu nan no ta di acuerdo di loke ta bayendo. Tabata tin prome minister, Evelyn Wever-Croes presente na e actividad, kende tampoco no ta di acuerdo con e cosnan ta bay. Riba e anochi kier a cera dies dia di concientisacion pa pone atencion riba e problematica di Violencia Domestico.

Segun Maduro, nan no ta para keto. Importante pa nan como Fundacion pa Hende Muhe den Dificultad ta e plan cu nacionalmente ta tackle e problematica di violencia domestico y abuso di mucha. Un instancia so a keda traha y  e no ta funciona. Ta comosifuera ta hibando awa pa lama asina, y esey no ta e intencion.

Intencion ta pa cada un di nos asumi nos responsabilidad como humano na prome instante, como ciudadano na di dos luga y yuda e isla aki bay padilanti. Ta papiando di personanan di e titulo di mas halto te na esun cu no tin ningun titulo mes, cada un asumi su responsabilidad den su funcion.

Ta papiando aki tambe di un Cuerpo Policial cu tin cu asumi su responsabilidad, Ministerio Publico cu tin cu asumi su responsabilidad ora cu ta trata di pidimento di castigonan. Nos parlamentarionan ora ta trata di traha leynan cu ta bon y asina por sigui menciona cada un, den su funcion, kico e por aporta pa bin cu un paro pa e problematica aki.

Fundacion pa Hende Muhe den Dificultad tin su oficina na Primavera 1B, tur dia di 8’or di mainta pa 5’or di atardi. Telefon ta 583-5400. Esey ta 24 ora pa dia por yam’e. Si ta den un crisis, bo ta worde yuda. Si bo kier haci un cita pa pasa pa por haya yudansa, cu e problema tin un trahado social cu ta atende durante di e orario di oficina.

Tambe nan tin un pagina riba Facebook via messenger. Tin asina hopi manera pa contact otro cu no necesariamente tin cu bay na e oficina. Bo por haya comunicacion via telefon, via messenger, etc. y naturalmente pasa na e oficina di FHMDD.

 

- Advertisement -

DUNA COMENTARIO

Please enter your comment!
Please enter your name here