Home Gobierno Reunionnan entre DPL cu Citgo ta bayendo bon 

Reunionnan entre DPL cu Citgo ta bayendo bon 

25
0
SHARE
- Advertisement -

Minister Glenbert Croes:

ORANJESTAD (AAN): Fase dos a cuminsa. Esey ta loke por a compronde for di minister di labor, Glenbert Croes, kende a splica cu esey ta e reporte cu e lo bay duna prome minister tambe.

DPL Oil & Gas Industry Desk ta den continuo reunion cu e team di Citgo riba e tema laboral. E mandatario ta sigui bisa cu Citgo a anuncia cu e di dos fase ta cuminsa unda cu nan ta bay tin mester di trahado profesional y contratistanan local pa yuda nan.

Meta di gobierno, den e reunionnan cu tabata tin tambe, lidera pa prome minister Evelyn Wever-Croes, hunto cu team di gobierno y di Citgo, ta pa sigura pa den cuadro di e maneho di e gobierno nobo aki, nos contratistanan local, profesionalnan local, haya un fair chance pa participa den e proyectonan.

Tambe hopi importante cu no ta dos ni tres contratista ta haya tur cos. E realidad tambe ta, cu den e ultimo dos añanan ta un kliek di contratista cu ta liga cu AVP a biba lekker den e refineria aki. Esey pa gobierno ta inaceptabel. Tur mester haya un chens.

Segun e minister e reunionnan entre DPL, cu Citgo ta bayendo bon. E minister mes ta preparando pa informa e prome minister, como minister di energia riba e resultado di e reunion.

Di parti di gobierno nan ta sumamente contento cu e reunionnan con nan ta bayendo, e cooperacion con e ta bayendo. Ta mirando un fase dos, unda cu probablemente 85% di e cuerpo laboral cu ta bay ta trahando den e proyecto aki, ta bay ta local. 15% lo bay ta hendenan specialisa di exterior.

Minister Glenbert Croes tin contacto cu presidente di sindicato di e refineria, sr. Boy Anthony di IOWA, unda cu e kier pa Citgo/IOWA tin un bon relacion cu otro. Tin di compronde cu nan tabata tin reunion cu otro.

Como minister di labor, e kier mantene un rol activo pa sigura e hendenan cu tey den e refineria, pa nan ta bon. Kier pa e proyecto aki inicia pa caba. Sa cu e noticianan cu tabata desanima Aruba.
Por a tende continuamente mal noticia, problema aki, problema aya, cu ta ponebo como ciudadano, perde speransa cu e refineria por bira un realidad. Hecho ta cu no ta eynan ainda tampoco. Ta bayendo paso pa paso, cautelosamente y eynan e doctrina di e prome minister, ta un doctrina conservador. Laga nos ta cauteloso, laga nos ta cautelosamente optimista. Laga nos percura pa loke ta bay tuma luga realmente mir’e tuma luga y loke tuma luga, mester ta un win-win, unda cu kier mira trahadonan local, profesionalnan local, contratistanan local haya preferencia.

E team di DPL O&G Industrie Desk, ta consisti entre otro di Patrick Farro, kende ta maneha manpower pa e proyecto. Su gran tarea, hunto cu e team di DPL ta recluta.

E minister ta invita tur contratista cu kier participa den e proyecto aki. Ta invita tur profesional local, contratistanan local cu ta traha tambe cu profesionalnan local, trahadonan local, por fabor, tuma contacto cu DPL O&GID. DPL ta e oficina unda cu te na e momentonan aki unda cu DPL O&GID ta. Pronto lo habri un oficina na San Nicolas, unda cu di cerca ta bay ta.

E minister ta gradicido pa e reunion cu a haya di Citgo, cu nan tey. Ta bisa pa considera e politica di gobierno pa pone trahadonan local na prome luga, contratistanan local na prome luga, como e politica cu nan ta bay respeta, nan ta bay consider’e como nan caminda. Esey pa gobierno ta hopi importante. A bisa, ta brasa e oportunidad di mira un dia e refineria activo. Nos tur cu ta biba e momentonan di con den apenas 9 luna, nos pais ta recuperando. Ta un bon caminda, pero un caminda doloroso. Nos ningun no kier tuma medida, manera e crisisheffing di 2.5% adicional cu mester a wordo tuma pa por papia e desaster financiero di e gobierno anterior. Ta realisa cu e reactivacion di e refineria aki como pilar economico, lo ta un beneficio grandisimo pa nos pais. E cuponan di trabao cu e lo crea.

E contratistanan pa San Nicolas, pa Aruba henter, pa gobierno su finansas. E lo ta un push enorme. Lo bay refleha hasta den e presupuesto di gobierno. Pero su prome minister cu su doctrina conservador, ta bisa pa laga bon noticia bin, ora cu realmente e bin. Mientras tanto ta trahando pa ohala pronto, e bon noticia bira un realidad.

Por lo cual ta tumando pasonan chikito, pero inteligente, cu cabes frieu y real. Pasonan real, Minister Croes a splica.

 

- Advertisement -

DUNA COMENTARIO

Please enter your comment!
Please enter your name here