Home General Segun fraccion  MEP: Durante e Congreso di AVP, Mike Eman no...

Segun fraccion  MEP: Durante e Congreso di AVP, Mike Eman no tabata mes electrificante manera a spera

112
0
SHARE
- Advertisement -

 

ORANJESTAD(AAN)– Den un comunicado fraccion di Mep a indica cu den fin di siman por a nota cu partido den oposicion AVP a organisa un congreso pa asina haci publico loke tur hende tabata sa caba, esta cu Mike Eman lo permanece como lider di e partido di Famia Eman. Eman ta conoci pa por hiba discursonan electrificante hopi bes y ta algo cu hopi hende ta admira di dje. Di hopi forma e organisadornan a haci nan maximo esfuerso pa yena e parti mas chikito di e ballroom, pa crea un esfera cu ainda AVP tin e acogida cu el a conoce tempo cu nan tabata den gobierno. Sinembargo den e sala por a nota cu hopi di esnan cu a cana cu Eman den por ehempel proyecto plan ‘Bo Bario’ no tabata ni presente. ‘Bo Bario’, un plan cu a costa Aruba rond di 1000 miyon florin segun e ultimo rapport di Algemene Rekenkamer, pero cu no a cumpli e meta cu Eman a propone. Tambe a tuma nota cu hopi candidato di e partido tampoco tabata presente pa duna sosten na e re-entrada di Eman, e comunicado ta menciona.

Partido di famia

E fraccion di MEP ta sigui mencinoa cu den e apariencia y tono di voz di Eman por a nota cu e no tabata sinti’e comodo cu e paso cu e mester a tuma. El a cuminsa na splica cu e no tabata su intencion pa bolbe, mirando cu el a anuncia na september ultimo cu e lo entrega e liderasgo na su partido, pero bou di insistencia di su ruman homber mayor el a tuma e paso pa keda como lider. Apesar di no ta firme para tras di e decision aki riba su mes tambe e ta un ‘brevet van onvermogen’ pa e proximo lidernan hoben den parlamento y den e partido, cu a pensa cu enberdad Mike lo a duna nan un oportunidad pa eherce liderasgo y pa mustra cu AVP no ta un partido di Eman so. Pero e impresion aki a wordo sinti basta fuerte den e sala na momento di su disertacion. Preguntanan cu ta colga den aire ta cu Eman no a sinti e peso for di parlamento di un di e hobennan di e partido, of ta e storia antiguo cu no tin ningun Eman pa tuma over e partido awor aki, despues cu el a retira na september?

Discurso no a convence

Normalmente Eman tin e habilidad di duna discursonan ariba un nivel elocuente, sinembargo e biaha aki den su discurso no a sinti su ‘compromiso’ cu su coleganan, su partido y su votadornan. Eman a mustra dificultad pa sali for di su palabranan y mas cu tur cos, e disculpa grandi cu a spera cu lo a bin na e pueblo nunca a yega.
Eman su partido segun rapportnan Caft, ARA, y instancianan internacional a hinca Aruba den e buraco financiero di mas grandi cu Aruba a yega di conoce, y esaki apenas den 8 aña. Eman a bay den historia como e lider cu a permiti ‘ondeugdelijkheid van bestuur’ bira algo normal bou di e maneho di su ministernan y gabinete si nos corda bek ariba tur loke a sosode cu su ministernan.

Realmente pa e aprecio pa Eman a spera cu su preparacion pa e atardi aki tawata mucho mas alcaso, pero ya a tuma nota cu Eman lo lidera su hendenan pa causa disturbio, calumnia y intrankilidad den pueblo pa purba na destabilisa gobernacion, e fraccion a splica.
“Nos a spera cu Eman lo a inculca den su seguidornan y candidatonan den parlamento pa nan ta mas al caso y concreto den nan trabou como parlamentario, of cu e lo acesoranan cu su contactonan cu el a crea di su tantisimo biahenan cu el a haci tempo cu e tabata den gobierno, sinembargo Eman a duna un discurso similar na 8 aña atras pero e biaha aki sin conviccion y nada electrificante”, segun fraccion di MEP den su comunicado..

 

- Advertisement -

DUNA COMENTARIO

Please enter your comment!
Please enter your name here