Home General Si no tin fuel WEB no por draai

Si no tin fuel WEB no por draai

111
0
SHARE
- Advertisement -

 

ORANJESTAD  (AAN): Ta wordo bisa pa bay corta vet na WEB prome cu subi awa y coriente. Awo unda ta resta vet pa corta, si gobierno a pidi dividendo, si fuel oil, esun caro mester wordo pidi pa alivia un problema cu no ta di aki pero na waf di Barcadera, esta ta un otro caminda y tambe, y e prijs mes ta subiendo mundialmente.

A busca un miho calidad cu ta mas caro pa e problema na Waf di Barcadera. Unda a resta vet pa corta? Segun Eric Henriquez di SIWA, ta ehercicionan cu mester wordo haci, na unda cu scenarionan mester wordo presenta.

Por lo menos gobierno mester tin e scenarionan poni kico ta e cosnan cu por haci pa por mitiga e golpi. Tur mester carg’e. Pero mas tarda, mas pio e ta bira. E no ta bira menos. E gastonan di mas grandi ta keda fuel. Esey ta by far hopi mas grandi cu tur cos. Despues ta e mantencion.

Si no tin e fuel, WEB no por draai. Si no haci mantencion, mashinnan ta stop di traha. Despues ta bin salario di e trahadonan. Asina mes cu tur hende entrega nan salario, asina mes WEB ta keda den rood. Mester ta realistico y duna espacio na e gruponan cu ta trahando pa esaki, pero tin cu acepta tambe cu foutnan a wordo haci. Di tur caminda fout a wordo haci. No ta bisa cu ta nan so a haci fout. Tin cu acepta y sigui bay dilanti pa pueblo. Esey ta importante segun Henriquez.

SIWA ta bezig cu un CAO. Henriquez a splica cu semper tin combersacion cu algo bon por sali pa pueblo, despues pa e empresa y despues pa e trahadonan. Semper mester tin espacio pa coopera, trahadonan tin cu compronde esey di un manera of otro. Mester keda realistico. E ta conta pa tur. E no por ta pa un grupo so. CAO tambe ta conta pa nan tur.

Semper SIWA ta dispuesto pa tira awa den biña. Pero mester keda realistico. Esey ta importante.

No tin duda cu tin gastonan inecesario den staff. Nan tambe mester coopera. Si tin gasto den e CAOernan, tambe mester duna e granito de arena pa por mantene e gastonan mas abao posibel pa e empresa.

Un di e temanan sigur ta aumento. Lo bay drenta den e rondenan di CAO, pues hopi cos lo bin dilanti. Tin cu compronde cu e momento di CAO bukinan mester wordo habri. Eynan ta haya sa claro kico ta pasando.

Ultimo biaha prome minister a bisa cu e no ta mucho interesa den e carta cu a wordo manda. Segun Henriquez, nan ta loco pa haya reunion cu gobierno, pero ta dificil tin ora pa haya nan. Nan ta haci e intento y ta wak e parlamentarionan con por papia cu nan. Pero ta dispuesto pa sinta, pa combersa con ta bay. Na final WEB ta parti di Aruba, Aruba ta parti di WEB y hunto tin cu sali for di e cos aki.

 

- Advertisement -

DUNA COMENTARIO

Please enter your comment!
Please enter your name here