ORANJESTAD (AAN): Dia 12 di September cu a pasa, Shon No Maduro como director interino di NV Elmar a informa Directiva di Sindicato Alvast, cu ta representa e hefenan, cu a nombra Albertico ‘Tico’ Koolman como general manager di e compania di electricidad pa e duracion di e schorsing di sr Henriquez.
Directiva di Sindicato Alvast ta apoya e decision aki y tin pleno confianza den Sr. Koolman mirando e situacion cu Sr. Henriquez a hinca a compania aden, y cu e ta culpable mayor.
Alvast tin confianza cu Koolman lo por saca e compania for di e disaster organisatorio y financiero aki, y alavez ta desea Koolman tur clase di exito den su funcion temporario nobo aki.
Raymond Maduro di Sindicato Alvast a splica, cu durante e 9 aña cu Sr. Henriquez tabatey, el a logra di desorganiza NV Elmar bao e pretexto di reorganizacion y cu tambe e HR manager y Financial Director a aporta activamente den e mal maneho.
Segun Alvast, ehempelnan ta cu ta completamente inaceptable cu e HR manager ta fomenta y causa discordia entre e trahadornan , y tambe cu tin indicacion hopi serio cu e Financial Director y HR Manager a derocha miyones di Florin na Consultants pa trabaonan completamente innecesario.
Alvast a menciona tambe cu e hendenan ey a bin cu contractonan lucrativo pa proyectonan misterioso cu no a genera ningun Florin pa NV Elmar.
E pregunta ta awor na e board di Elmar, cu si awor ta bay tuma e paso necesario pa laga haci un investigacion.
Durante e reunion cu board di NV Elmar, a puntra tambe con leu e investigacion riba colega trahadornan ta, y e board a contesta Sindicato cu ainda ta andando cu e investigacion.
Aki Directiva di Alvast a pidi e board pa acelera e investigacion, ya cu tin indicacion cu tin cover-up a tuma lugar door di e grupitonan, cu a keda atras den Elmar.
Nan ta haya cu lo ta bon pa board di Elmar vigila e paso di e grupitonan aki pa nan no sconde evidencia of pone trampa pa e Manager nobo aki.
Por ultimo directiva di Alvast kier a puntra, si Raad van Commissaris di NV Elmar ta na haltura cu e Director cu ta bao di schorsing y investigacion por subi avion bay den exterior, pasobra segun nan, ora bo ta bou di investigacion cu pago na cas, e Director no mester kere cu e ta cu vacacion. Pa Sindicato, e por bay, pero si acaso e keda sin bin back tambe, e ora kico.
