E ta un hoben di 19 aña di edad…
ORANJESTAD(AAN): Dialuna a habri y keto bay e combersacion cerca hopi hende, ta con un hoben den pleno flor di su hubentud a perde su bida riba parkinglot na Palm Beach.
E asesinato di Camilo Sosa di 22 aña di edad, a trece mas presion di pueblo riba investigadornan, pa nan captura e agresor rapidamente. Pasobra Camilo merece husticia na su banda.
Un ekipo di Recherche di distrito di Noord ta investigando e caso di asesinato di Diadomingo marduga den parkinglot di Arawak Gardens den area di Palm Beach.
Despues cu el a hinca e hoben Camilo Sosa bao su brasa, e asesino a baha na awa den un pick-up color cora kima.
E Pickup ey a resulta di ta un Toyota single-cab Pickup.
Recherche a haya diferente Security Camera video, y tambe informacion di testigonan. Cu esey, autoridad hudicial rapidamente a logra yega na e supuesto Pickup envolvi.
Recherchenan a bishita un cas na Tanki Leendert, unda a topa e Toyota Pickup color cora kima cu a wordo usa pa e asesino huy for di e escena di crimen.
Fiscal a duna ordo pa confisca e Toyota Pickup, y un Takelwagen a wordo usa pa hibe Warda di Polis pa investigacion forensico.
Esaki lo bay yuda check ki rol mas esnan den e vehiculo tabatin despues di e hincamento Diadomingo marduga.
Mirando e adres unda a bay, ta mustra cu Polis ta sospecha cu e asesino lo por ta un hoben di inicial R.P. di apenas 19 aña di edad, kende keto bay ta profugo di husticia.
A manda mensahe pe via famia pa e mes entrega su mes, sino lo buske unda cu ta. Autoridad a haya mensahe, cu e hoben ta dispuesto pa entrega su mes na autoridad riba Dialuna, pero finalmente no a cumpli.
E sospechoso ta un conoci di husticia, cu recientemente a caba di sali for di Prison di KIA, unda el a keda encarcela debi na maltrato pisa. Aparentemente e no a siña nada di keda encarcela den Prison.
Ta algun dia e tin liber y ya a haye den problema riba caya cu awor lo hinke den problema serio cu Husticia.
