Home arte y espectaculo Ta bay cuminza duna les na Aruba pa siña cana riba palo

Ta bay cuminza duna les na Aruba pa siña cana riba palo

72
0
SHARE
- Advertisement -

ORANJESTAD (AAN): Pa di 5 aña caba Caribbean Linked ta organiza programa residencial pa artistanan local y internacional.

DIARIO a haya sa, cu den mas o menos tres siman e artistanan selecciona ta haya e oportunidad pa produci diferente sorto di arte manera: contemporaneo y escenico. Ta na e manera aki cu Fundacion Rancho a bin ta sostene Caribbean Linked pa tres aña caba dunado Rancho Walking Tour na e grupo di artista. Tabata na e manera aki cu e colaboracion entre e artista Kriston Chen di Trinidad and Tobago y Fundacion Rancho a cuminsa.

E artista cu ta forma parti di e grupo 1000mokos un comunidad di ‘Stilt Walkers’ (stelten lopers) cu ta organiza workshop pa nan comunidad. Na manera aki nan ta sostene e tradicion di Stilt Walk (stelten lopen) y e famoso Moko Jumbie, un personahe popular y conoci, origina for di West-Africa.

Carnaval ta hunga un rol hopi grandi den mantene e tradicion bibo mirando cu e actividad ta duna gruponan di ‘stilt walkers’ e oportunidad nan pa nan baila, cana y disfrasa nan mes hunto cu e comunidad. Tambe e musica cu ta worde toca den carnaval ta ‘up-tempo’ y ta hacie mas facil pa baila riba dje ora ta cana riba palo.

Asina Centro di Actividad Rancho a habri su portanan pa e artista den recidencia y na manera aki a bin ta crea e actividad ‘Stick Thing in D Alley’ un workshop unda e comunidad di Rancho y Aruba por a bin siña con pa bira un ‘Stilt Walker’, cuminsando for di 19 te cu 22 di augustus. E prome dia mucha, adulto y interesadonan a bin mira, cana y participa den e actividad. Na mes un momento varios medianan local a pasa pa tuma un bista riba e actividad creativo aki.

E meta di e artista Kriston Chen no tabata solamente pa crea un comunidad di ‘Stilt Walkers’ den e bario di Rancho pero tambe pa educa esnan cu kier siña e tecnica di traha Stilt (stelten) / palo cu ta worde usa pa cana cune. Asina boluntario Roberto Tromp a dedica su tempo y a siña hopi lihe con pa traha e palo for di ‘scratch’.

Durante e siman cu a pasa algun muchanan di bario a yega na e centro y poco poco a cuminsa custuma di cana riba palo. Den varios ocasion e hanchinan y cayanan den e bario a worde usa como espacio pa cana. E habitantenan di bario tabata asombra y tabata duna nan reaccion ora cu mira e grupo cana rond den bario.

Mester bisa cu e ‘deporte’ di ‘stilt walk’ aki por ta peligroso si e persona cu ta practik’e no conoce e reglanan y seguridad cu semper mester tene cuenta cune. Pero alavez mester bisa cu tur deporte tin su dificultadnan pero ta keda na e persona pa sigui practica y dedica su mes na esaki y na e manera aki bira cada biaha mas miho. Asina Alfredo y Jair, dos hoben di bario, a forma parti di e exhibicion di Caribbean Linked cu a tuma lugar dia 25 di augustus den Caya grandi.

Centro di Actividad Rancho lo bay sigui cu e proyecto ‘Stick Thing in D Alley’ y na e manera aki motiva mas hende pa siña e arte di ‘Stilt Walking’.

Di parti di Fundacion Rancho, nan kier gradici Kriston Chen pa e trabao cu el a haci den e rato di tempo cu e tabata na Aruba. Tambe boluntario Roberto Tromp y Ginelly Quandt cu a dedica nan tempo pa haci e actividadnan posibel. Sin laga afo e sosten y apoyo di di e team di Caribbean Linked y Ateliers 89.

Un palabra di motivacion na tur e muchanan cu a yega na e centro y practica e deporte: sigui practica! Centro di actividad lo continua; nos ta conta riba boso presencia! Cuminsando for di 3 di September, tur dialuna y diasabra pa 4or di merdia nos ta sigui cu ‘Stick Thing in D Alley!

- Advertisement -

DUNA COMENTARIO

Please enter your comment!
Please enter your name here