Home General Ta hopi importante pa mantene un registro civil actualisa pa fondo no...

Ta hopi importante pa mantene un registro civil actualisa pa fondo no wordo perhudica

24
0
SHARE
- Advertisement -

Director di SVb:

ORANJESTAD (AAN): SVb a tuma nota den prensa cu hopi satisfaccion cu directora di Registro Civil y Censo a cuminsa ta eherce e autoridad cu ley ta dun’e pa actualisa registro civil.

Pa SVb, Registro Civil ta un base di informacion inmensamente importante y p’esey ta mira cu masha bon wowo e desaroyo cu e directora a cuminsa cun’e, esta di actualisa y mantene e registro actualisa. Cu actualisa kiermen, cu asina cu un persona sali for di e isla y keda un cierto tempo p’afo di e isla, e persona aki ta wordo saca for di e registro.

Segun director di SVb, Edwin Jacobs, tin tres motibo cardinal, pa cual un sistema di Registro Civil actualisa ta importante pa SVb. Primeramente tin e parti di asegurado. Kico e ley di AOV ta bisa? E ta bisa cu cada persona cu ta den e registro civil ta acumula derecho riba bo AOV entre edad di 15 pa edad di pensioen cu na e momento aki ta na 62 aña.

Cada aña cu un persona gana e derecho siendo cu e no ta biba na Aruba, e ta hayando un beneficio cu en principio e no tin derecho riba dje.

P’esey ta importante pa bo registro civil ta actualisa y e personanan cu no ta biba na Aruba, e tempo cu ley ta rekeri pa biba na Aruba pa asina por wordo considera ciudadano y por lo tanto ta parti di e registro civil, no ta haya e derecho aki.

Na e momento aki, pa cada aña asina ey, ta costa e fondo 4150 florin. E ta sona poco, pero si bo tin 100 hende den un aña, ta como 400 mil florin. Bo ta perhudica e fondo, no awo, pero den futuro, ora cu e persona bira pensionado.

Si tur aña asina aki bo ta sleep mey pa 1 miyon florin, cu tempo, bo tin un suma basta bon cu e fondo tin cu bay carga cun’e, siendo cu e persona aki no tabata tin Aruba como su luga di biba principal. Pa SVb, pa e seguro di AOV, ta hopi importante e distincion aki, cu e ta actualisa, y asina e asegurado ta haya su derecho.

E di dos punto ta e parti di pensionado mes. Kico ta e caso? Na momento cu un pensionado ta biba den exterior, e tin e obligacion di entrega cada tres luna un constancia cu ta mustra cu e ta na bida, pa asina SVb sa cu e ta pagando un beneficio na un persona cu tin derecho riba dje, cu ta na bida.

Un persona sali for di e isla y keda inscribi den e registro civil y ta mir’e inscribi den e registro civil, ta asumi cu e persona ta na Aruba, e ta na bida. Si acaso e fayece den exterior, e persona aki por keda cobra e pensioen, siendo cu e no tin derecho riba dje, pasobra e no ta na bida mas. No ta algo cu no a pasa.

El a yega di pasa cu SVb, caminda cu ciudadanonan inscribi na registro civil, ta sali bay afo, fayece. Ora cu a haci cierto controlnan ta bin constata cu e persona tin algun tempo morto. E no tabata tin derecho riba pensioen. Pa bay wak ken a cobra e pensioen, ta full un situacion cu no ta sali afo.

Ta importante pa e oficina di registro civil y censo ta mantene e registro civil actualisa, di biaha bo ta bin haya e notificacion cu e persona ki a wordo saca for di e registro civil y di biaha bo ta bay pon’e riba e lista cu e tin cu entrega un atestat de vita, un constancia di bida.

Sumamente importante pa evita cu ta paga pensioen na personanan cu, pasobra cu nan ta inscribi den registro civil, ta asumi cu nan ta na bida, mientras cu a sali bay for di isla, kisas un tempo afo y hasta por bin fayece den exterior, cu tur e consecuencianan cu e ta trece cun’e, cu ta pagando e beneficio na hendenan cu no tin derecho riba dje.

E di tres punto cu ta importante y cardinal pa SVb, entre e instancianan den reino cu ta paga beneficionan manera AOV, SVb tin un acuerdo riba intercambio di informacion. Ta intercambia di informacion cu SVb Hulanda, ta intercambia di informacion cu SVb Corsou, tin intercambio cu e instituto cu ta haci e pensioen pa St. Maarten.

- Advertisement -

DUNA COMENTARIO

Please enter your comment!
Please enter your name here