Home Hudicial Tres aña di prison pa mama di Rishandroh y Eugene

Tres aña di prison pa mama di Rishandroh y Eugene

628
0
SHARE
- Advertisement -

Hues ta haye culpabel di complice di mata

ORANJESTAD (AAN): Diabierna mainta sentencia a cay pa e muher Risheila F. sospecha di ta complice di mata su yiunan Rishandroh y Eugene y tambe di a maltrata nan y no a yuda nan contra e homber Gabriel M.

Hues promer cu el a dicta sentencia a bisa cu e tin un declaracion prepara pa prensa. El a laga miembronan di prensa haya esaki. Ta di aplaudi cu Hues di Corte di Husticia ta haci esaki. Especialmente den un caso asina lamentable.

Hues a mustra cu Ministerio Publico a pidi un castigo di 4 aña di prison di cual 1 aña ta condicional, y 3 aña di prueba. A pidi pa pone e condicion special cu durante e temporada di prueba Risheila F. mester mantene su mes na indicacionnan di Reclassering, incluso si esaki ta encera prohibicion pa e tin contacto cu Gabriel Martien y coopera pa tratamento.

Hues a bisa cu for di e declaracion y pruebanan por conclui cu Risheila F. tabata consciente cu Gabriel M., prome cu e lesion fatal, tabata maltrata Rishandroh y Eugene. Cu e tabata na altura di e situacion serio den cual su yiunan tabata, ta resulta di e hecho cu na dos ocasion el a trata di bandona e apartamento hunto cu su dos yiunan. Hues ta bisa cu como mama, Risheila F., tabatin e responsabilidad pa cuida di e muchanan, percura pa nan siguridad, nan salud y bienestar. A base di esaki, e mester a tuma medidanan pa evita comportacion violento di Gabriel M. cu ta menaza siguridad, salud, bienestar y bida di su dos yiunan homber.

Hues ta mustra cu e medidanan cu Risheila F. mester a tuma no solamente tabata un exigencia pero tambe tabata posibel. Na opinion di Hues, e sospechoso Risheila F. tabatin oportunidad, e momentonan cu e tabata Sali pa bay trabao, e por a pidi ayudo na coleganan of instancianan concerni di ayudo. Pero e no a haci esaki.

Awo cu e tabata sa di e riesgonan y no a busca ayudo. Hues ta di opinion cu Risheila F. no a haci suficiente pa pone su yiunan na un luga sigur.

Door di no percura pa siguridad di e muchanan, of busca ayudo, concientemente Risheila F. a crea e chens pa Gabriel M., den su ausencia, por maltrata e muchanan y cu tur e riesgonan cu esaki ta trece cun’e.

Hues a bisa cu e ta sali for di e punto di bista cu, Risheila F., sigur despues di morto di Eugene, sa di loke Gabriel M. ta capaz di haci A base di tur e puntonan ariba menciona, Hues ta haya cu ta suficiente proba complicidad di morto di Rishandroh y Eugene, complicidad di maltrato di Rishandroh y Eugene y a neglisha nan bienestar.

Hues ta haya Risheila F. culpabel di complicidad di morto di e dos menornan. Ademas di splica a base di kico ta yega na hay’e culpabel di complicidad, a papia tambe di investigacion psikiatrico y psychologico cu a worde haci riba dje. Hues a bisa cu a pidi un “second opinion” di un psychiatra independiente, di Curaçao. E pregunta den esaki tabata: te con leu Risheila F. por worde teni responsabel, mirando cu tin un diferencia di opinion entre e dos profesionalnan di Aruba.

Hues ta conclui a base di tur e rapportnan cu e acusado Risheila F. por worde teni responsabel pa tur e delitonan declara proba.

Tampoco por papia di cu Risheila F. tabata den un situacion psychico y e no por a haci nada. Den declaracion di testigonan combina cu e investigacion di psychologo y e forma con Risheila F. a expresa su mes den Corte, Hues ta haya cu no ta duna un bista cu Risheila F. ta un persona cu no por defende su mes of su yiunan. Otro prueba ta cu el a reclama su compañero varios biaha y na dos ocasion el a purba huy cu su yiunan. Aunke cu e tabata bou di hopi presion di Gabriel M. y tabata den un situacion di stress door di e continuo menazanan di maltrato door di Gabriel M., Hues ta kere cu Risheila F., como mama di e muchanan, a spera cu e a haci mas como mama pa protege e muchanan.

Pa e castigo Hues a tene na consideracion cu Risheila F. a perde dos yiu y cu durante un temporada largo a worde maltrata door di Gabriel M. Tambe Hues a tene cuenta cu Risheila F. su edad hoben. A base di esaki Hues a dicidi di un un castigo menor di loke Ministerio Publico a pidi. Esaki ta tres aña, kitando e tempo cu el a sinta caba, di cual un aña ta condicional y un tempo di prueba di tres aña. A pone e condicion special cu e ta bay bou guia di Reclassering y cu e mester cumpli cu e reglanan, incluso si esaki ta encera tratamento di psychologo y/of psychiatra; tambe si nan bisa cu e no mag tin contacto cu Gabriel M. y / of e yiu cu nan tin hunto, a menos cu esaki ta den presencia di funcionario di Reclassering.

 

- Advertisement -

DUNA COMENTARIO

Please enter your comment!
Please enter your name here